Eklesiastis 10 - BIBLIA - traduson antigu in Krioulo

¹ Suma ku moska ku muri ta fasi purfumu pa i cera mal, asin ku un bokadiñu di tulesa ta dana jiresa ku rispitu.

² Korson di omi jiru ta jingi pa kil ki diritu, ma korson di tulu ta jingi pa kil ku ka bali.

³ Nin ku tulu na yanda na kamiñu, i ta falta ntindimentu; asin i ta mostra tudu jinti kuma i tulu.

⁴ Si un gubernadur paña raiba kontra bo, ka bu sai na bu lugar di tarbaju, pabia fika kalmu i suma mesiñu ku ta ketanda garandi pekadu.

⁵ N oja utru mal ne mundu, ku sedu koldadi eru ku ta bin di gubernadur.

⁶ Tulu dadu kau di rispitu, ma rikus sinta na lugar bas.

⁷ N oja katibus na yanda montadu na kabalu, garandis na yandaba ku pe na con suma katibus.

⁸ Kil ku yabri koba i pudi kai nel; kin ku romba mura, kobra pudi murdil.

⁹ Kil ku na koba pedra, pedra pudi molostal; kil ku na raca leña i sta na pirigu.

¹⁰ Si feru di mancadu sta moku, i ka moladu, i pirsis buri forsa; jiresa ta pui kusa sai diritu.

¹¹ Si kobra murdi antis di i nkantadu, i ka ten remediu pa nkantadur, nin si i ten jitu.

¹² Palabra di jiru ta ngañal fabur, ma palabras di tulu ta ngulil.

¹³ Na kumsada, si palabras i tulesa; na kabantada i dudesa tortu.

¹⁴ Tulu ta papia-papia. Ningin ka sibi ke ku na bin; kin ku pudi kontanu ke ku na bin sedu dipus?

¹⁵ Tarbaju di tulu ta kansal; nin i ka kunsi kamiñu di prasa.

¹⁶ Ai di ki tera ku tene mininu suma rei, ku si ŝefis ta mansi pa festa.

¹⁷ Sortiadu i ki tera ku si rei i fiju di garandis, ku tene ŝefis ku ta sinta na mesa na ora sertu, i ka pa cami ma pa ngaña forsa.

¹⁸ Si dunu di kasa i un prigisosu ku ka ta tarbaja ku mon, kankra na fraksi, kasa na cubi.

¹⁹ Festa i pa ri; biñu ta pui jinti kontenti; ku diñeru bu ta safa tudu.

²⁰ Mesmu na bu pensamentu, ka bu fala mal di rei, nin dentru di bu kuartu ka bu fala mal di riku, pabia kacus pudi bua e leba bu palabra, e bai konta ke ku bu fala.