Eklesiastis 1 - BIBLIA - traduson antigu in Krioulo

Tudu kusa de mundu i bakatela

¹ Es i palabras di filósofu, rei na Jerusalen, fiju di Davi.

² “Bakatela! Bakatela!” Asin ku filósofu fala. “Tudu i bakatela, i ka ten balur.”

³ Kal purbitu ku omi ten di tudu si tarbaju ki fasi bas di sol?

⁴ Un manjuandadi ta lanta, i muri; utru ta lanta, ma mundu sempri i ta fika.

⁵ Sol ta mansi, i ta kai, i torna da volta pa kau ki sai nel.

⁶ Bentu ta bai pa sul, i ta rabida pa norti; sempri i ta fika i na boltia, i riba pa si rumu ki sai nel.

⁷ Tudu rius ta bai pa mar, ma mar ka ta inci. Yagu ta riba sempri pa lugar ku riu kumsa nel, pa torna kuri mas.

⁸ Tudu e kusas ta kansa jinti mas di ki kil ku N pudi splika. Uju ka ta farta jubi, nin oreja pa obi.

⁹ Kil ku seduba i na torna sedu; kil ku fasidu i na torna fasidu mas. Asin i ka ten nada nobu bas di sol.

¹⁰ O i ten un kusa ku pudi faladu: “Jubi, e kusa i nobu”? Nau, i kusa ku seduba ja disna, antis di no padidu.

¹¹ Ningin ka ta lembra di kusas ku pasa; kil tambi ku na bin sedu, jinti ku na bin padidu mas tardi e ka na lembra del.

Jiresa ka bali nada

¹² Ami, filósofu, N sedu rei na Jerusalen riba di Israel.

¹³ N pui sintidu pa rabista, pa N studa ku jiresa tudu ku pasa bas di seu. Es i kargu kansadu ku Deus pui riba di omis!

¹⁴ N jubi diritu pa tudu tarbaju ku ta fasidu bas di sol, N oja kuma tudu i bakatela, suma kin ku na serka bentu.

¹⁵ Kusa ku jingi ka pudi ndiritadu; kil ku ka sta ka pudi fasidu konta del.

¹⁶ N fala na ña sintidu: “N bin sedu algin garandi, N torna mas jiru di ki tudu ku rena na Jerusalen antis di mi. Na bardadi, N ngaña manga di jiresa ku kuñisimentu.”

¹⁷ N pui sintidu pa ntindi jiresa, pa N ntindi tambi ke ki tulesa ku ke ki kabesa mbariadu, ma N bin rapara kuma i suma N na serka bentu.

¹⁸ Manga di jiresa ta tisi manga di kansera; mas ku bu sibi, mas tristesa ku bu ta ten.