Efésius 6 - BIBLIA - traduson antigu in Krioulo

Fijus ku se papes

¹ Abos fijus, bo obdisi bo papes, pabia i bon pa bo fasi asin, suma ku bo sedu di Siñor.

² “Rispita bu pape ku bu mame” i purmeru mandamentu ku tene purmesa juntadu ku el, ku fala asin:

³ “pa tudu kuriu diritu; bu tene vida kumpridu na tera.”

⁴ Abos papes, ka bo provoka raiba na bo fijus, ma bo kria elis na disiplina ku nsinamentu di Siñor.

Katibu ku si mestre

⁵ Abos katibus, bo obdisi bo mestres na tera ku rispitu, ku medu, ku korson limpu, suma pa Kristu.

⁶ Ka bo tarbaja son na uju di bo mestre, pa jinti pudi kontenti ku bos, ma bo fasi kil ku Deus misti ku tudu bo korson, suma katibus di Kristu.

⁷ Bo fasi bo tarbaju ku tudu vontadi, suma pa Siñor; i ka son pa omi.

⁸ Bo lembra kuma Siñor na paga kada un, katibu o libri, pa tudu ben ki fasi.

⁹ Abos mestres, bo trata elis di ki mesmu manera; bo disa di fasi ameasa. Bo lembra kuma abos ku elis bo tene mesmu mestre na seu, ku ka ta fasi skuju.

Armadura di Deus

¹⁰ Pa kabanta, bo fika mas forti na Siñor pabia di si forti puder.

¹¹ Bo bisti tudu armadura ku Deus da bos, pa bo pudi fika firmi kontra armadilia di astusia di diabu,

¹² pabia no ka na geria kontra jinti, ma kontra garandi puderis ku otridadis ku ŝefis sataniku ku ta manda ne mundu sukuru, ku forsa spiritual di mal na mundu selestial.

¹³ Asin bo bisti tudu armadura di Deus. Ora ku dia mau ciga, bo na pudi risisti. Dipus di geria te na fin, bo ta sta firmi inda.

¹⁴ Asin, bo firma risu; bo tene bardadi suma sintu ku bo mara; bo vida retu i ta sedu bo armadura di pitu.

¹⁵ Bo pruntia pa konta Bon Noba di pas — es i ta sedu bo sapatu.

¹⁶ Riba de kusas tudu, bo toma fe suma darga ku bo ta pudi paga ku el tudu fleŝa di fugu ku ki malvadu na ferca pa bos.

¹⁷ Bo toma tambi salbason suma kapasiti, ku spada ku Spiritu ta da ku sedu palabra di Deus.

¹⁸ Bo pui bo sintidu na orason ku pididu; bo ora tudu tempu na puder di Spiritu. Pa mesmu fin bo bisia, bo ora sin para, bo pidi sempri pa tudu pobu di Deus.

¹⁹ Bo ora tambi pa mi, pa Deus pudi dan palabra sertu ora ku N na yabri boka pa papia; pa N pudi fala ku koraẑen, pa fasi jinti kunsi sigridu di Bon Noba.

²⁰ N sedu mbaŝadur de Bon Noba kontudu N sta prezu. Bo ora pa N ten koraẑen pa fala del, suma ki dibi di sedu.

Manteña di kabantada

²¹ Tíkiku, no ermon ku no ama, servu fiel na tarbaju di Siñor, i na da bos tudu noba di mi, pa bo pudi sibi kuma ku N sta, ku ke ku N na fasi.

²² E ku manda N na mandal pa bos, pa bo pudi sibi kuma ku no sta tudu, pa i anima bos.

²³ N misti pa Deus no Pape ku Siñor Jesus Kristu da ermons pas ku amor ku fe;

²⁴ tambi pa fabur di Deus sta ku tudu kil ku ama no Siñor Jesus Kristu ku amor di bardadi.