Efésius 5 - BIBLIA - traduson antigu in Krioulo

Vivi na lus

¹ Suma bo sedu fijus ku Deus ama, bo fasi forsa pa parsil.

² Bo yanda ku amor, suma ku Kristu tambi amanu, i da si vida pa nos, suma oferta ku sakrifikadu, ku ta da bon ceru ku Deus ta kontenti ku el.

³ Pekadu seksual ku tudu koldadi vida susu ku kubisa, i ka bon pa i comadu na bo metadi, suma ku bo sedu pobu di Deus.

⁴ Bo ka dibi di papia palabra fiu, nin kombersa tulu, nin brajerisa indisenti, ma bo dibi di ba ta fala Deus obrigadu.

⁵ Bo pudi ten sertesa kuma, algin ku ta fasi pekadu seksual, o kil ku tene vida susu, o kil ku ten kubisa (ki suma idulatria), i ka pudi pertensi renu di Kristu, ku sedu renu di Deus.

⁶ Ka bo disa ningin ngana bos ku palabra bakatela; i pabia de kusas propi ku raiba di Deus na bin riba di kilis ku ka ta obdisi.

⁷ Ka bo sedu se kumpañeris.

⁸ Purmeru, bo staba na sukuru, ma gosi, suma bo sedu di Siñor, bo sta na lus. Asin bo yanda suma kilis ku pertensi lus.

⁹ Nunde ku lus sta, tudu bondadi ta nasi, ku kusa justu, ku bardadi.

¹⁰ Bo buska sibi kusa ku Deus ta kontenti ku el.

¹¹ Ka bo toma parti na obras di sukuru ku ka ten purbitu, ma bo pui ki obras na lus.

¹² Kusas ke ta fasi sukundidu, te pa falal i borgoña.

¹³ Tudu kusa ku pudu na lus, i ta ojadu si koldadi, pabia lus ta mostra klaru.

¹⁴ E ku manda i fala na un kantiga: “Korda, abo ku na durmi! Lanta na metadi di mortus; Kristu ta numiau.”

¹⁵ Bo toma sintidu kuma ku bo na yanda. Ka bo yanda suma kil ki ka jiru, ma suma algin jiru.

¹⁶ Bo purbita pa fasi tudu ku bo pudi, pabia no sta na mau tempu.

¹⁷ Pabia des, ka bo sedu tulu, ma bo buska ntindi ke ku Siñor misti pa bo fasi.

¹⁸ Ka bo cami biñu ku ta dana vida, ma bo inci ku Spiritu Santu.

¹⁹ Bo fala ku ŋutru ku salmu, inu ku kantiga spiritual; bo kanta, bo fasi musika pa Siñor na bo korson.

²⁰ Bo fala Deus no Pape sempri obrigadu pa tudu, na nomi di no Siñor Jesus Kristu.

Maridu ku si minjer

²¹ Bo suẑeta ŋutru suma ku bo rispita Kristu.

²² Abos minjeris, bo fika bas di bo omis, suma ku bo sta bas di Siñor,

²³ pabia omi i kabesa di si minjer suma ku Kristu i kabesa di igreẑa. Na bardadi, el ki Salbadur di kurpu ku sedu igreẑa.

²⁴ Suma ku igreẑa sta bas di Kristu, asin tambi ku minjer dibi di fika bas di si omi na tudu kusa.

²⁵ Abos omis, bo ama bo minjer suma ku Kristu ama igreẑa, i da si vida pa el,

²⁶ pa i separal pa el. I labal ku yagu ku palabra pa limpal,

²⁷ pa i pudi pursental pa si kabesa, un igreẑa gloriosu, sin manca, sin marlota, nin kualker utru difeitu, ma puru, ku ningin ka pudi culil dedu.

²⁸ Asin ku omi dibi di ama si minjer suma si kurpu propi. Kin ku ama si minjer, i ama si kabesa.

²⁹ Nunka ningin ka nfastia si propi kurpu, ma i ta alimental, i toma konta del, suma ku Kristu ta fasi pa igreẑa,

³⁰ pabia no sedu membrus di si kurpu.

³¹ Suma ku Skritura fala, pa omi disa si pape ku si mame, pa i junta ku si minjer; elis dus e ta sedu un kurpu son.

³² Es i garandi bardadi ku sta sukundidu ne palabra. N na falal pa Kristu ku si igreẑa,

³³ ma tambi N na falal pa bos. Kada un di bos dibi di ama si propi minjer suma si kabesa. Minjer dibi di rispita si omi.