Efésius 4 - BIBLIA - traduson antigu in Krioulo

Unidadi di kurpu

¹ E ku manda, ami ku sedu katibu pabia N na sirbi Siñor, N roga bos pa bo vivi konformi manera di vida ku bo comadu pa el,

² ku tudu umildadi, mansesa ku pasensa. Bo nguenta ŋutru ku amor.

³ Bo fasi forsa pa ten ligason di pas pa guarda suguru ki unidadi ku Spiritu ta da.

⁴ I ten un kurpu son, ku un Spiritu son, suma tambi ki ten un speransa son ku bo comadu pa el.

⁵ I ten un Siñor son, un fe son, un batismu son,

⁶ un Deus son ki Pape di tudu jinti, ku sta riba di tudu, ku ta tarbaja na tudu, ku sta na tudu.

⁷ Kada un di nos i dadu si don na midida ku Kristu da.

⁸ E ku manda Skritura fala: “I subi na lugar altu, i leba manga di katibu ku el, i da dons pa omis.”

⁹ Agora ke ku faladu “i subi”? I mostra i kil ku disi pa parti mas bas di tera.

¹⁰ Kil ku disi, i el tambi ku subi la riba di tudu seu, pa i pudi inci tudu kau.

¹¹ I el propi ku da es: utru jinti pa e sedu apostolus, utrus pa e sedu anunsiaduris, utrus pa e sedu ivanjelistas, utrus pa e sedu pastoris ku pursoris.

¹² I fasi es pa pudi purpara pobu di Deus pa e tarbaja pa el, pa formason di kurpu di Kristu.

¹³ Asin no na bai tok no ciga na ki unidadi ku bin di no fe, ku no kuñisimentu di Fiju di Deus. No na bin sedu jinti maduru; no na kirsi tok no yangasa altura kompletu di Kristu,

¹⁴ pa ka no sedu mas mininu ku ta boia na maron, ku ta lebadu na tudu urdumuñu di nsinamentu di omis ku ta ngana jinti ku astusias di tarpasa,

¹⁵ ma pa no fala bardadi ku amor, pa no pudi kirsi kompletu na Kristu ki kabesa.

¹⁶ Bas di si orientason tudu parti di kurpu ta filantadu, i ta ligadu, kada junta na si lugar. Si kada parti fasi si propi tarbaju, tudu kurpu ta kirsi pa si formason na amor.

Nobu vida na Kristu

¹⁷ Asin, na nomi di Siñor N na avisa bos. Ka bo yanda mas suma jinti ku ka kunsi Deus, ku tene pensamentu ku ka bali.

¹⁸ Se ntindimentu sta na sukuru. E sta separadu di vida ku Deus da, pabia di se falta di kuñisimentu, pa duresa di se korson.

¹⁹ E kingiti na se sintidu, e ntrega se kurpu pa visiu; e ta lestu pa fasi tudu koldadi kusa susu.

²⁰ I ka asin ku bo nsinadu aserka di Kristu.

²¹ Sertamenti bo obi del; abos krentis bo nsinadu bardadi ku sta na Jesus,

²² kuma bo dibi di disa ki manera antigu di vivi, bo pui di ladu ki naturesa antigu ku na bai bas pa mortu pabia di si mau diseẑu nganadur.

²³ Bo dibi di arnobadu na pensamentu ku spiritu,

²⁴ pa bo bisti nobu naturesa ku Deus kumpu, ku na mostra na vida di bardadi, justu i puru.

²⁵ Asin, bo disa mintida; bo fala bardadi kada kin ku si kumpañer, pabia anos tudu no sedu partis di mesmu kurpu.

²⁶ Si bo paña raiba, ka bo disal i leba bos pa pekadu; nin ka bo fika ku raiba tok sol kai.

²⁷ Ka bo da diabu lugar pa i yentra.

²⁸ Kil ku ta furtaba, pa i para furta, i pega ku si mon, i fasi bon tarbaju, pa i pudi tene kil ku ciga pa i rapati ku kil ku ka tene.

²⁹ Nin un palabra fiu ka dibi di sai na bo boka, ma son kil ki bon, ku ta juda, ku ta kumpu, ku ta fasi ben pa kilis ku obil.

³⁰ Ka bo pui Spiritu Santu di Deus pa i sta tristi, pabia Spiritu i un marka ku bo markadu ku el pa dia di libertason.

³¹ Bo kaba ku tudu amargura, brabesa, raiba, gritaria, koba, ku tudu koldadi malisia na bo metadi.

³² Bo sedu bon, bo sinti pena di ŋutru, bo purda ŋutru, suma tambi ku Deus purda bos na Kristu.