Efésius 3 - BIBLIA - traduson antigu in Krioulo

Tarbaju di Paulu pa jintius

¹ Pabia di kila, ami Paulu, katibu di Kristu Jesus pabia di bos jintius, N ora Deus.

² Sertamenti bo obi kuma Deus, na si grasa, dan e tarbaju pa N fasi pa ben di bos.

³ Deus mostran si planu sukundidu pa N pudi kunsil. N skirbiba ja puku palabra aserka del.

⁴ Si bo lei, bo na rapara kuma N ntindi sigridu di Kristu.

⁵ Na tempu ku pasa, e sigridu ka diskubridu pa jinti, ma gosi Deus usa si Spiritu pa diskubril pa si santu apostolus ku anunsiaduris.

⁶ Ki sigridu i kuma, pabia di Bon Noba, jintius ten parti juntu ku judeus na bon kusas ku Deus ta da. E juntadu na mesmu kurpu; e na ten parti na purmesa ku Deus fasi na Kristu Jesus.

⁷ N fasidu servu pa konta e Bon Noba. N ka mersiba e fabur, ma i Deus ku dan el, suma ku si puder na tarbaja na mi.

⁸ Ami ki menus di tudu pobu di Deus, ma Deus dan e fabur di konta jintius Bon Noba di garandi rikesa di Kristu ku no ka pudi ntindi,

⁹ tambi pa mostra tudu jinti kuma ku e planu sukundidu di Deus na pudu na pratika. Deus, ku kumpu tudu kusa, i sukundi e sigridu tudu tempu ku pasa,

¹⁰ pa ŝefis ku otridadis na mundu selestial, ora ke jubi pa igreẑa, e pudi rapara jiresa di Deus ku ten manga di forma.

¹¹ Es i sedu konformi si planu iternu ki bin fasi pa meiu di Kristu Jesus no Siñor.

¹² Na no union ku Kristu, ku no fe nel, no osa yentra ku fiansa dianti di Deus.

¹³ E ku manda N na pidi bos pa ka bo pirdi koraẑen na ña sufrimentu pa bos, pabia el ku ta tisi bos gloria.

Amor di Kristu

¹⁴ I pabia di kila ku N ta finka juju dianti di no Pape,

¹⁵ kil ku tudu familia na seu ku tera ta toma si nomi.

¹⁶ N pidil pa i tira di rikesa di si gloria pa da bos forsa ku puder dentru di bos, pa meiu di si Spiritu,

¹⁷ pa Kristu mora na bo korson pabia di bo fe, pa bo pudi tene rais ku alisersu fundu na amor,

¹⁸ pa abos ku tudu pobu di Deus pudi ntindi diritu kal ki largura, kumprimentu, altura ku fundura di amor di Kristu.

¹⁹ N misti pa bo kunsi si amor, kontudu i mas no ntindimentu, pa bo inci kun ku tudu ku Deus sedu.

²⁰ Gloria pa kil ki kapas di fasi muitu mas ciu di ki tudu kil ku no pidi, o no pensa, konformi puder ku na tarbaja na nos;

²¹ el pa i dadu gloria na igreẑa na Kristu Jesus, di un jorson pa utru, pa tudu sempri! Amen.