Efésius 2 - BIBLIA - traduson antigu in Krioulo

Di mortu pa vida

¹ Na tempu ku pasa bo spiritu staba mortu pabia di bo pekadu ku maldadi.

² Na ki tempu bo na sigiba mau kamiñu di mundu; bo ta obdisiba ŝef ku ta manda riba di puderis spiritual di ar, spiritu ku na manda te gosi na jinti ku ta disobdisi Deus.

³ Na bardadi anos tudu no staba suma elis tambi; no ta yandaba konformi no naturesa umanu; no ta fasiba kualker kusa ku bin na no sintidu, ku no kurpu misti. Anos tambi, na no naturesa, suma utru jinti, no staba bas di raiba di Deus.

⁴ Ma Deus, ku ta ten pena di jinti dimas, pabia di garandi amor ki ten pa nos,

⁵ i vivifikanu juntu ku Kristu, oca no spiritu staba inda mortu pabia di no pekadu. I pabia di si fabur ku no sedu salbu.

⁶ Na no union ku Kristu Jesus i lantandanu di mortu, i sintandanu na mundu selestial juntu ku el.

⁷ I fasi asin pa mostra, na tempus ku na bin, garandi rikesa di si fabur na bondadi ki ten pa nos na Kristu Jesus.

⁸ I pabia di si fabur ku bo sedu salbu, na bo fe. Es i ka bin di bos; i kusa ku Deus pati.

⁹ I ka rusultadu di bo propi sforsu, pa ka ningin ten manera di njata.

¹⁰ I Deus ku fasinu kil ku no sedu; i krianu na union ku Kristu Jesus pa vida di bon tarbaju ki purpara pa no fasi.

Union na Kristu

¹¹ Bo lembra ke ku bo seduba na tempu ku pasa, abos ku padidu jintius, ku ta comadu “jinti insirkunsidadu” pa judeus ku ta coma se kabesa “sirkunsidadu”. (E na fala son di sirmonia ku omi ta fasi na kurpu.)

¹² Na ki tempu bo staba separadu di Kristu; bo ka pertensiba pobu di Israel; bo staba fora di kontratu ku purmesa ku Deus da si pobu. Bo staba na mundu sin speransa, tambi sin Deus,

¹³ ma gosi, na union ku Kristu Jesus, abos ku staba lunju bo tisidu pertu pabia di sangi ku Kristu darma.

^14-15 I el ki no pas; i fasi judeu ku jintiu un pobu son. Ku si kurpu propi i kebra inimisadi ku staba suma un paredi pa separa elis. I kaba ku lei di judeus ku si mandamentu ku regra, pa i fasi di ki dus rasa un nobu pobu unidu ku el, de manera pa fasi elis pas,

¹⁶ pa i pudi toma ki dus juntadu na un son, i pui pas entri elis ku Deus pabia di si mortu na krus ku pajiga se inimisadi.

¹⁷ Asin Kristu bin, i konta Bon Noba di pas pa bos ku staba lunju, ku judeus ku staba pertu.

¹⁸ I pabia di Kristu ku anos dus rasa no pudi yentra na pursensa di no Pape ku ajuda di ki mesmu Spiritu.

¹⁹ Asin bo ka sedu mas stranjerus na un tera strañu, ma bo sedu ja di un tera juntu ku pobu di Deus; bo pertensi familia di Deus.

²⁰ Bo kumpudu riba di alisersu di apostolus ku anunsiaduris. Kristu Jesus, el propi ki purmeru pedra di kantu.

²¹ I el ku ta liga tudu ki kasa pa i kirsi pa i sedu templu santu pa Siñor.

²² Na union ku el, abos tambi, juntu ku utrus, bo na ba ta kumpudu pa lugar nunde ku Deus ta mora na si Spiritu.