Ebreus 7 - BIBLIA - traduson antigu in Krioulo

Melkisedek, figura di Kristu

¹ E Melkisedek seduba rei di Salen, saserdoti di Deus ku sta riba di tudu. Oca Abraon na riba, dipus ki geria ku ki reis, i ngaña, Melkisedeki sai i kontra ku el, i bensual.

² Abraon dal desimu parti di tudu ki tisi. Si nomi mostra purmeru kuma i rei justu. Dipus tambi i rei di Salen, ku sedu rei di pas.

³ No ka lei nada aserka di si pape nin si mame, nin si jorson; i ka tene kumsada di dias nin fin di vida, ma, suma Fiju di Deus, i saserdoti pa sempri.

⁴ Bo oja gora kuma ku el i seduba algin garandi. Abraon propi, ku sedu no pape di antigu, dal desimu parti di tudu ki tisi di gera.

⁵ Lei di Moisés manda kilis di jorson di Levi, ku ten tarbaju di saserdoti, pa e kobra pobu dizimu, ku sedu kilis di si rasa, kontudu e sedu fijus di Abraon tambi,

⁶ ma Melkisedek, ku ka sedu di jorson di Levi, i toma dizimu na mon di kil ku risibi purmesa, i bensual, ku sedu Abraon.

⁷ I ka ten nin un duvida kuma kil ku ta da benson i mas di ki kil ku ta risibi benson.

⁸ Na kasu di levitas, omis ku ta muri e ta toma dizimu, ma ne kasu di Melkisedek, dizimu tomadu pa kil ku Skritura fala kuma i sta di vida.

⁹ No pudi fala kuma Levi, ku ta risibi dizimu, el propi i paga dizimu na Abraon,

¹⁰ pabia i staba inda na kurpu di si pape oca Melkisedek kontra ku el.

¹¹ Fundamentu di lei ku Deus da pobu i pa forma saserdotis na jorson di Levi. Si tarbaju di saserdotis di jorson di Levi staba kompletu, i ka pirsis ba torna lantanda utru saserdoti di yardansa di Melkisedek, ku ka sedu di yardansa di Aron.

¹² Si yardansa di saserdoti mundantadu pa utru jorson, lei ten ku mudadu tambi.

¹³ No Siñor, kil ku faladu e kusas del, i di utru jorson. Ningin di ki jorson ka ciga di sirbi na altar.

¹⁴ I sibidu diritu kuma el i padidu na jorson di Judá. Moisés ka fala nada de jorson oca ki na papia di saserdotis.

Kristu i saserdoti pa sempri

¹⁵ Asuntu torna inda mas klaru suma ki parsi utru saserdoti suma Melkisedek,

¹⁶ ku ka fasidu saserdoti konformi lei o ordi di omi, ma i konformi puder di un vida ku ka ta kaba.

¹⁷ Skritura diklara aserka del: “Abo i saserdoti pa sempri konformi yardansa di Melkisedek.”

¹⁸ Asin mandamentu antigu pudu di parti pabia i fraku, i ka ten puder.

¹⁹ Lei ka pui nada pa i sta kompletu. Gosi no tisidu un minjor speransa ku ta cigantanu pa Deus.

²⁰ E nobu saserdoti i fasidu ku juramentu. Ki levitas fasidu saserdotis sin juramentu,

²¹ ma pa e saserdoti Deus jurmenta, i falal: “Siñor jurmenta, i ka na maina: ‘Abo i saserdoti pa sempri.’ ”

²² Asin Jesus fasidu fiadur di un kontratu mas minjor, suma ku Deus fasil ku juramentu.

²³ Na bardadi, ki utru saserdotis e ciu ba; e ta rindi ŋutru. Mortu ta tuji elis kontinua na tarbaju,

²⁴ ma es, suma i na bibu pa sempri, si tarbaju di saserdoti ka ta kaba.

²⁵ E ku manda tambi i pudi da salbason kompletu pa kilis ku bin pa Deus na si nomi, suma ki na bibu pa sempri pa i roga Deus pa elis.

²⁶ No pirsisaba di un Ŝef di Saserdoti suma es, puru, sin pekadu, sin manca, lunjusidu di jinti ku ta peka, yalsadu pa un lugar mas altu na seu,

²⁷ ku ka pirsisa, suma utru ŝefis di saserdoti, di fasi sakrifisiu kada dia pa si propi pekadu purmeru, dipus pa pekadu di pobu, pabia i ronia ja un bias, oca ki da si kurpu.

²⁸ Lei ta fasi omis fraku pa e sedu ŝefis di saserdoti, ma palabra di juramentu, ku bin dipus di lei, i nomia Fiju, kompletu pa sempri, pa i sedu Ŝef di Saserdoti.