Ebreus 6 - BIBLIA - traduson antigu in Krioulo

¹ Asin no ten ku disa kumsada di nsinamentu aserka di Kristu, no bai dianti pa nsinamentu mas kompletu. Ka no torna pui alisersu di ki purmeru nsinamentu, di ripindi di kusas ku no ta fasi ku ta tisi mortu, di fe na Deus,

² di nsinamentu di batismus, di pui mon riba di algin pa bensual, di resureison di mortu, ku di kastigu ku ka ta kaba.

³ Asin ku no ten ku fasi, si Deus disanu.

⁴ Kilis ku ciga di risibi lus di Deus, ku sinti gustu ja di kil ku Deus danu di seu, ku toma parti na Spiritu Santu,

⁵ ku spurmenta kuma palabra di Deus i bon, ku sinti forsa di mundu ku na bin bin,

⁶ si dipus e bin kai, e ka ta pudi lebadu utru bias pa ripindimentu, pabia ku se mon propi e na krusifika Fiju di Deus utru bias, e na pui pa jinti fasi trosa del.

⁷ Deus ta mostra si bondadi pa con ku ta bibi yagu di cuba ku ta kai riba del manga di bias, i ta da bon planta ku bali pa kil ku labral,

⁸ ma con ku ta pruduzi pe di spiñu ku paja brabu i ka bali nada. I pertu pa Deus maldisual; na kabantada i na kemadu.

⁹ Mesmu ku no fala asin, ña kiridu amigus, no na pera kusas minjor di bos, kusas ku ta kumpaña salbason.

¹⁰ Deus i ka injustu pa diskisi di bo tarbaju, ku amor ku bo mostra pa el, manera ku bo sirbi si pobu, suma ku bo na fasi te gosi.

¹¹ I no vontadi pa kada un di bos mostra mesmu interes te na fin, pa bo pudi yangasa kusas ku bo na pera.

¹² No ka misti pa bo bin sedu prigisosu, ma pa bo remenda kilis ku na risibi kil ku Deus purmiti, pabia di se fe ku pasensa.

Deus ta kumpri si purmesa

¹³ Oca ku Deus fasi si purmesa pa Abraon, suma ki ka teneba utru algin mas garandi pa jurmenta nel, i jura pa si kabesa,

¹⁴ i fala: “N jurmenta kuma N na dau garandi benson; N na buri bu jorson ciu.”

¹⁵ Abraon pera ku pasensa, i yangasa kil ku Deus fala i na da.

¹⁶ Si un algin jurmenta, i ta jurmenta na nomi di utru ku sedu mas garandi di ki el. Juramentu i un kusa sertu ku ta kaba ku tudu palabra.

¹⁷ Asin Deus misti mostra klaru pa kilis ku na risibi kusa ki fala i na da, kuma, kusa ki tene na sintidu ka na maina. E ku manda i papia ku juramentu.

¹⁸ Asin i ten e dus kusa ku ka pudi maina, ku Deus ka pudi konta mintida pa el, ku ta danu koraẑen, anos ku sta suguru, manera ku no pega na speransa ku sta no dianti.

¹⁹ No ten e speransa suma feru di fundia ku ta sugura no alma firmi. I ta yentra te dentru di kurtina di seu

²⁰ nunde ku Jesus bai dianti di nos, i yentra la pa no fabur. I fasidu Ŝef di Saserdoti ntidu, konformi yardansa di Melkisedek.