Ebreus 3 - BIBLIA - traduson antigu in Krioulo

Jesus i mas Moisés

¹ Asin, ermons krenti ku Deus coma, bo pui sintidu na Jesus, ku sedu Apostolu i Ŝef di Saserdoti di ki fe ku no ta konta kuma i di nos.

² I sedu fiel pa kil ku pul na tarbaju, suma ku Moisés tambi seduba fiel na kasa di Deus.

³ Kin ku kumpu kasa i ten mas onra di ki kasa. Asin tambi ku Jesus mersi mas gloria di ki Moisés.

⁴ Kada kasa ten kin ku kumpul, ma kin ku kumpu tudu kusa i Deus.

⁵ Na bardadi Moisés, suma servu, i seduba fiel na kasa di Deus, pa konta kusas ku Deus na bin konta mas tardi,

⁶ ma Kristu, suma Fiju, i fiel na si propi kasa. I anos ku sedu ki kasa, si no rakada no fiansa ku no speransa gloriosu firmi te na fin.

Diskansu pa pobu di Deus

⁷ Asin, suma ku Spiritu Santu fala: “Aos, si bo obi si vos,

⁸ ka bo ndurusi bo korson suma bo papes di antigu, oca e provoka Deus na ki tempu di probason na lala,

⁹ nunde ke tentan, e proban; korenta anu e oja kusas ku N fasi.

¹⁰ E ku manda N raiba kontra ki jinti; N fala kuma, esis, se korson ta yara sempri; e nega kunsi ña kamiñu.

¹¹ Asin N jurmenta na ña raiba kuma, e ka na yentra na ña lugar di diskansu.”

¹² Ermons, bo toma sintidu pa ka nin un di bos tene mau korson, ku ka ta fia, pa i bin fasil lunjusi di Deus bibu.

¹³ I minjor bo ba ta konsija ŋutru tudu dia ku na faladu “Aos”, pa ka nin un di bos fika duru pa nganu di pekadu.

¹⁴ Gosi no toma parti na Kristu, si no rakada no fiansa di kumsada firmi te na fin.

¹⁵ Suma ku Skritura fala: “Aos, si bo obi si vos, ka bo ndurusi bo korson suma na ki dias di provokason.”

¹⁶ I kal jinti ku obil, e provokal? Nta i ka sedu tudu ki jinti ku Moisés tira na Ejitu?

¹⁷ Kin ku Deus paña raiba ku elis korenta anu? I ka kilis ku peka, ku se difuntus kai na lala?

¹⁸ Pa bakin ki jurmenta kuma e ka na yentra na si lugar di diskansu? I ka kilis ku disobdisi?

¹⁹ No oja kuma e ka pudi yentra pabia e ka fia.