Ebreus 13 - BIBLIA - traduson antigu in Krioulo

Kuma ku no dibi di agrada Deus

¹ Bo kontinua ama ŋutru suma ermons.

² Ka bo diskisi di risibi ospri na bo kasa. Utru jinti ku fasi asin e risibi anjus sin e ka sibi.

³ Bo lembra di kilis ku sta prezu, suma ku bo sta prezu ku elis. Bo lembra di kilis ku maltratadu, suma ki pudi sedu na bo kurpu tambi.

⁴ Pa tudu jinti rispita kasamenti. Kama di kasadu pa ka i mancadu ku pekadu. Deus na julga kilis ku ta sta na vida susu, ku pekadu seksual.

⁵ Bo libra di faimadesa di diñeru. Bo fika kontenti ku kil ku bo tene, pabia Deus fala: “N ka na disau, nin N ka na bandonau.”

⁶ E ku manda no pudi fala ku fiansa: “Siñor i ña Judadur; N ka na medi. Ke ku algin pudi fasin?”

⁷ Bo lembra di bo pastoris ku konta bos palabra di Deus. Bo pensa na manera ke yandaba; bo remenda se fe.

⁸ Jesus Kristu i mesmu aonti, ku aos, pa sempri.

⁹ Ka bo disa manga di koldadi nsinamentu strañu tira bos na bo kamiñu. I mas bon pa no korson risibi forsa di grasa di Deus te pa sigi regras di kumida, ku ka tisi nin purbitu pa kilis ku na yandaba di ki manera.

¹⁰ Saserdotis ku ta sirbi na tenda sagradu e ka ten diritu di kume na altar ku no tene.

¹¹ Ŝef di saserdotis ta leba sangi di limaria pa lugar mas sagradu di tudu pa ronia pa pekadu, ma karni di ki limaria i ta kemadu fora di kampamentu.

¹² E ku manda Jesus tambi muri fora di prasa, pa i pudi santifika pobu ku si propi sangi.

¹³ Asin no bai pa el, fora di prasa; no sufri ki njuti ku el i njutidu,

¹⁴ pabia li na tera no ka tene un prasa ku na fika pa sempri, ma no na buska kil ku na bin.

¹⁵ Asin, na Jesus, no ba ta da Deus sempri sakrifisiu di ngabal, ku sedu oferta di no boka ku ta konta di si nomi.

¹⁶ Ka bo diskisi di fasi ben, bo rapati ku utrus kil ku bo tene, pabia i e koldadi sakrifisiu ku Deus ta kontenti ku el.

¹⁷ Bo obdisi bo pastoris, bo suẑeta elis, pabia e ka ta kansa jubi pa bos, suma kin ku ten ku da Deus konta di bo alma. Bo juda elis pa e pudi fasi e tarbaju ku alegria, pa ka e ba ta fasil ku dur di korson, pabia de manera i ka ta bali pa bos.

¹⁸ Bo ora pa nos, pabia no ten sertesa kuma no ten konsiensia limpu, suma ku no misti fasi sempri kil ki diritu.

¹⁹ N roga bos ku mpeñu pa bo ora, pa N pudi tornadu pa bos mas dipresa.

Palabra di kabantada

²⁰ N misti pa Deus ku ta da pas, ku lantanda di mortu no Siñor Jesus Kristu, garandi Pastor di karnel, pabia di sangi di kontratu ki fasi ntidu,

²¹ pa i fasi bos kompletu na kil ki bon, pa bo pudi fasi si vontadi. N misti pa i fasi di nos kil ki misti pa no sedu, pa mon di Jesus Kristu, kil ku no na da gloria pa sempri. Amen.

²² Ermons, N pidi bos pa bo nguenta e palabra di konsiju, pabia e karta i ka kumpridu di ki manera.

²³ N misti pa bo sibi kuma no ermon Timótiu i largadu ja. Si i ciga sedu, N na bai ku el ora ku N na bai visita bos.

²⁴ Bo fala manteña pa tudu bo garandis ku tudu pobu di Deus. Kilis di Itália manda bos manteña.

²⁵ Fabur di Deus ta sta ku bos tudu. Amen.