Ebreus 12 - BIBLIA - traduson antigu in Krioulo

Firmesa na tempu di probason

¹ Anos tambi, ku tudu e tustumuñas ku rodianu suma nuven, no sakudi tudu kusa ku ta mbaransanu, ku pekadu ku ta lestu ku maranu; no kuri ku tudu mpeñu na kurida ku sta no dianti.

² No pui uju na Jesus, kil ku no fe ta kumsa nel, i ta kaba nel. Pabia di sabura ku staba si dianti, i nguenta krus, i dispreza borgoña di ki ora; i bai sinta na direita di tronu di Deus.

³ Bo pensa na kil ku nguenta manga di kusa ku jinti mau lantanda kontra el. Asin bo ka ta pirdi koraẑen, pa bo dismaja.

⁴ Na bo luta kontra pekadu bo ka risisti inda tok bo tiradu sangi.

⁵ Bo diskisi ja di ki palabra di koraẑen ku Deus konsija bos suma si fijus, i fala: “Ña fiju, ka bu njuti disiplina di Siñor; ka bu disanima ora ki na raprindiu,

⁶ pabia Siñor ta disiplina kil ki ama. Tudu kil ki coma suma si fiju, i ta sutal.”

⁷ Kil ku bo na sufri i pa bo disiplina. Deus na trata bos suma fijus. Kal fiju ku si pape ka ta krial?

⁸ Si bo ka ten kriason ku tudu fiju dibi di ten, nta abos i fijus ku padidu fora di kasamenti; bo ka sedu fijus propi.

⁹ Tambi no tene no papes de mundu ku ta disiplinanu; no ta da elis rispitu. Nta no ka pudi suẑeta mas inda no Pape spiritual pa no tene vida?

¹⁰ Elis e krianu pa puku tempu suma ke ntindi, ma Deus ta krianu pa no purbitu, pa no pudi tene vida puru suma el.

¹¹ Na bardadi, nin un kastigu ka ta sabi na ki ora; i ta punu tristi, ma mas tardi i ta da bon frutu di pas na kilis ku kriadu nel, pa e tene vida limpu.

Manga di konsiju

¹² Asin bo lantanda bo mon kansadu, bo tesanta bo juju ku na tirmi!

¹³ Bo kumpu kamiñu diritu pa bo yanda nel, pa pe manku ka kabanta mankusi, ma pa i kuradu.

¹⁴ Bo buska ten pas ku tudu jinti; bo buska tambi un vida puru, pabia sin el ningin ka na oja Siñor.

¹⁵ Bo toma sintidu pa ka ningin pirdi fabur di Deus, pa ka nin un rais malgos nasi pa kansa bos, i bin venena manga di jinti;

¹⁶ pa i ka ten ningin na bo metadi ku vida susu, o algin ku pensamentu de mundu, suma Esaú, ku bindi si diritu di garandesa pabia di un pratu di kumida.

¹⁷ Bo sibi kuma, mas tardi, oca i bin misti risibi benson di yardansa, i tujidu el, pabia i ka oja manera di rabida kil ki fasi, kontudu i buskal ku larma.

¹⁸ Bo ka ciga na ki monti ku pudi palpadu, ku na yardi ku fugu, sukuru pretu nok, ku turbada,

¹⁹ ku korneta ku na toka, ku fala ku na papia. Oca ke obil, e pidi pa ka i papia mas ku elis,

²⁰ pabia e ka pudi nguenta ki ordi ku dadu, kuma nin ki un limaria ku toka na monti, i na matadu ku pedra.

²¹ Kusa ke oja i seduba meduñu dimas, tok Moisés fala kuma i na tirmi ku medu.

²² Ma bo ciga pa monti di Sion, pa prasa di Deus bibu, Jerusalen di seu, ku si manga di milyaris di anju

²³ ku sta na juntamentu alegri; pa igreẑa di purmeru fijus di Deus ku se nomis sta skritu na seu; pa Deus ku sedu juis di tudu jinti, pa spiritus di jinti justu ku sta ja pirfitu,

²⁴ pa Jesus ku ranja nobu kontratu entri nos ku Deus, pa sangi ku wagadu, ku ta fala minjor di ki sangi di Abel.

²⁵ Bo toma sintidu pa ka bo nega obi kil ku na papia. Kilis ku nega obi vos ku na papia ku elis na tera e ka kapli kastigu; ku fadi anos, si no da kosta pa kil ku na papia ku nos la na seu.

²⁶ Na ki dia si vos pui tera tirmi, ma gosi i fala kuma, mas un bias i ka na fasi son tera tirmi, ma seu tambi.

²⁷ Agora e palabra “mas un bias” mostra kuma kusas ku ta bulbuli, ku sedu kusas ku kumpudu, e na mundantadu, pa kilis ku ka ta bulbuli pudi fika.

²⁸ Renu ku no risibi ka pudi bulbulidu. Asin no ba ta fala Deus obrigadu, no adoral ku rispitu, ku medu, suma ki misti,

²⁹ pabia no Deus i un fugu ku ta kaba ku tudu.