Ebreus 1 - BIBLIA - traduson antigu in Krioulo

Deus papia ku nos na Kristu

¹ Na tempu ku pasa, Deus papia manga di bias, na manga di manera, ku no papes di antigu pa boka di anunsiaduris. Ne dias di kabantada i papia ku nos suma ki mandanu si Fiju,

² kil ki pui pa i yarda tudu kusa, ki kumpu mundu tambi pa si mon.

³ I el ku sedu briliu di gloria di Deus, ku si parsensa sertu; el ku nguenta tudu kusa ku puder di si palabra. Dipus di da si vida pa yangasa limpesa di no pekadu, i sinta na mon direita di garandi Rei na seu.

⁴ I fasidu mas garandi di ki anjus, suma ku nomi ki yarda i mas garandi di ki nomi di anju.

Garandesa di Fiju di Deus

⁵ Deus nunka ka fala nin un anju: “Abo i ña Fiju; aos N padiu.” Tambi i ka fala di nin un anju: “N na sedu si Pape; el i na sedu ña fiju.”

⁶ Oca ki na mandaba si purmeru Fiju na mundu, i fala tambi: “Tudu anjus di Deus pa e adoral.”

⁷ I fala di anjus: “Kil ku ta fasi si anjus pa e sedu bentus, si servus pa e sedu linguas di fugu.”

⁸ Ma i fala di Fiju: “O Deus, bu tronu na kontinua pa sempri; Na bu renansa bu ta guberna ku justisa.

⁹ Bu ama kil ki bon; bu odia kil ki mau. E ku manda Deus, bu Deus, i unjiu ku azeiti di kontentamentu, i dau lugar riba di bu kumpañeris.”

¹⁰ I fala inda: “Abo, Siñor, na kumsada bu kumpu tera; seu sedu tarbaju di bu mon.

¹¹ E na disparsi, ma abo bu na kontinua. Tudu elis na beju suma ropa;

¹² bu na mbulja elis suma kapa; suma ropa e na torkiadu; ma abo bu sedu mesmu; bu anus ka ta kaba.”

¹³ Deus nunka i ka fala nin un anju: “Sinta na ña direita tok N pui bu inimigus suma tapeti pa bu diskansa pe nel.”

¹⁴ Ke ku sedu anjus? Elis i spiritus ku ta sirbi, ku Deus manda pa e bin juda kilis ku na bin tene salbason.