Ditus 9 - BIBLIA - traduson antigu in Krioulo

Jiresa na kumbidanu

¹ Jiresa kumpu si kasa, i labra seti firkija pa el.

² I mata si limarias, i pui kusas sabi na biñu, i pui kusas na mesa.

³ I da ordis pa si kriadas, i bai pa kau mas altu di prasa, i kumbida jinti, i fala:

⁴ “Abos ku ka jiru, bo yentra.” I fala kilis ku ka ten ntindimentu:

⁵ “Bo bin, bo kume di ña kumida, bo bibi biñu ku N purpara.

⁶ Bo disa kilis ku tulu, bo na tene vida. Bo yanda na kamiñu di ntindimentu.”

⁷ Kin ku raprindi algin ku na fasi trosa, i na kobadu. Kin ku raprindi un omi mau, i na molostadu.

⁸ Ka bu raprindi algin ku ta fasi trosa, pa ka i bin fika diskontenti ku bo, ma si bu raprindi algin jiru, i ta amau.

⁹ Da nsinamentu pa algin jiru; el i ta sedu mas jiru. Nsina algin justu, i ta kirsi na ntindimentu.

¹⁰ Rispita SIÑOR i purmeru pasu pa jiresa. Si bu kunsi ki Algin Puru, bu ten ntindimentu.

¹¹ Jiresa i ta buri anus na bu vida.

¹² Si bu sedu jiru, i na sedu purbitu pa bo. Si bu ta fasi trosa, i abo son ku na sufri.

Tulesa na kumbidanu

¹³ Tulesa i suma minjer ku ta lantanda baruju sin borgoña, i ka sibi nada.

¹⁴ I ta sinta na porta di si kasa, o na un asentu na kau mas altu di prasa,

¹⁵ pa coma kilis ku na pasa na se kamiñu.

¹⁶ I ta fala: “Abos ku ka jiru, bo yentra.” I fala kilis ku ka ten ntindimentu:

¹⁷ “Yagu furtadu i dos; bianda ku kumedu sukundidu i sabi.”

¹⁸ Ma ki jinti ka sibi kuma mortu sta na si kau; si kumbidadus sta na koba di mortu.