Ditus 8 - BIBLIA - traduson antigu in Krioulo

Jiresa ngabadu

¹ Nta jiresa ka na coma? Ntindimentu ka na yalsa fála?

² Riba di montis lungu di strada, na ntronkamentus di kamiñus, i firma.

³ Lungu di portons, na entrada di prasa, i na yalsa si vos i fala:

⁴ “N na coma pa bos omis, N na yalsa fála pa tudu jinti di mundu.

⁵ Abos ku ka ten spiriensia, bo nsina sedu maduru. Abos tulus, bo nsina jiresa.

⁶ Bo obi, pabia N na papia kusas bon dimas; ña boka na papia kusa ki sertu.

⁷ Palabras mau i nujenti pa mi; ña boka na papia bardadi.

⁸ Tudu palabra di ña boka i justu; i ka ten nin un palabra tortu nin di nganu.

⁹ Tudu ña palabras i retu pa kilis ku ta ntindi elis; e sedu justu pa kilis ku ten kuñisimentu.

¹⁰ Bo seta ña nsinamentu te pa bo seta prata; bo kuji kuñisimentu mas di ki uru finu kujidu,

¹¹ pabia jiresa i minjor di ki joias; tudu ku bu misti i ka pudi komparadu ku el.

¹² “Ami, jiresa, N sinta juntu ku bon juisu. N ten kuñisimentu ku konsiju.

¹³ Pa rispita SIÑOR i pa nuju mal. Ami N nuju orgulyu, ronku, kamiñu mau, ku palabras di mintida.

¹⁴ Konsiju ku jiresa i di mi; N ten ntindimentu ku forsa.

¹⁵ N ta juda reis pa e manda, N ta juda ŝefis pa e da ordis justu.

¹⁶ Regulus ku garandis e ta manda ku ña ajuda, suma tambi tudu juisis na mundu.

¹⁷ N ama kilis ku aman; kilis ku buskan parmaña sedu e na ojan.

¹⁸ N tene rikesa ku gloria; sin, rikesa ku ta tarda, ku justisa.

¹⁹ Ña frutu i minjor di ki uru mas finu; ña rindimentu i mas di ki prata mas puru.

²⁰ N ta yanda na kamiñu di justisa; N ta sigi kamiñus diritu.

²¹ N ta da rikesa pa kilis ku aman; N ta inci se kasas ku kusas di balur.

²² “SIÑOR tenenba oca ki kumsa si tarbaju, antis di kumpu kualker kusa na kumsada.

²³ Disna di iternidadi N kujidu, disna di kumsada, antis di mundu kumpudu.

²⁴ N padidu antis di mar ten, antis di fontis tenba ku manga di yagu.

²⁵ Antis di montañas formadu, ku montis mas pikininu, ami N padiduba ja,

²⁶ antis di Deus kumpu tera ku matu, oca ki ka tenba nin puera.

²⁷ Oca ki koloka seu na si lugar, N staba la; oca ki marka divison di seu ku mar,

²⁸ oca ki fiksa nuvens la riba, i pui fontis di mar firmi na se lugar,

²⁹ oca ki pui frontera na mar, pa yagu ka pasa ki limiti ki pui, oca ki kumpu alisersus di con, N staba la.

³⁰ N staba lungu del pa judal, N sedu si kontentamentu; N ta fikaba sempri ku pas si dianti.

³¹ N staba kontenti ku mundu ki kumpu, ku jinti ku staba la.

³² “Asin, ña fijus, bo obin, pabia kilis ku yanda na ña kamiñus e na sortiadu.

³³ Bo obi nsinamentu; ka bo negal, pa bo pudi sedu jiru.

³⁴ Sortiadu i ki omi ku paran sintidu, i na pera na ña porta kada dia, i firma na entrada di ña kasa.

³⁵ Kil ku ojan i na oja vida; i na ngaña fabur di SIÑOR.

³⁶ Kil ku peka kontra mi i dana si propi vida; tudu kilis ku aburisin e misti mortu.”