Ditus 7 - BIBLIA - traduson antigu in Krioulo

¹ Ña fiju, lembra di ña palabras, bu rakada ña ordis dentru di bo.

² Fasi konformi N mandau, bu na tene vida; bu tene ña nsinamentu suma un kusa di garandi balur.

³ Maral na bu dedus, bu skirbil na tagua di bu korson.

⁴ Fala jiresa: “Abo i ña irma;” bu coma ntindimentu bu parenti.

⁵ E ta librau di minjer infiel pa si omi, ku ta papia ku si palabras sabi.

Minjeris di mau vida

⁶ Un dia N staba na janela di ña kasa, N na jubi.

⁷ N oja rapasis ku ka tenba spiriensia. Na se metadi N nota un son ku ka ten juisu.

⁸ I na yandaba na rua, pertu di skina nunde ku minjer moraba; i bai na kamiñu pa si kasa.

⁹ I seduba na fuska-fuska, oca sol na noti.

¹⁰ La un minjer sai pa dal kontrada, bistidu suma minjer di mau vida, ku si planu di jiresa.

¹¹ Es ta papiaba altu, i ta jusia; nunka si pe ka ta fikaba na kasa.

¹² Utru ora na rua, utru ora na fera, i ta jimpini na tudu kantus.

¹³ I ciga pertu di rapas, i beẑal, i jubil ku rostu di puku borgoña, i falal:

¹⁴ “Aos N fasi oferta di pas, N paga ña votus. N tene karni na kasa.

¹⁵ E ku manda N sai pa kontra ku bo; N buskau ku mpeñu tok N ojau.

¹⁶ N distindi lensolis na kama di liñu finu di Ejitu, di manga di kor.

¹⁷ N purfuma ja ña kama ku mira, aloés ku kanela.

¹⁸ Bin, no fartanda ŋutru di amor te parmaña; no kontenti ku el!

¹⁹ Ña omi ka sta na kasa, i bai bias lunju.

²⁰ I leba bolsu di diñeru na si mon; son na lua ŝeia ki na riba pa kasa.”

²¹ I atrail ku manga di palabra sabi, i konvensil.

²² El, suma tulu, i sigil logu, suma turu ku na bai matadu, suma gazela ku na pui si pe na armadilia,

²³ suma kacu ku na bua pa ridia. I ka sibi kuma la si vida sta na pirigu tok fleŝa fural na figadu.

²⁴ Asin, ña fijus, bo sukutan, bo para sintidu na palabra ku N na fala bos.

²⁵ Ka bu disa bu korson disvia pa si kamiñu, nin ka bu yanda pirdidu si tras,

²⁶ pabia i bati manga di omi; kilis ki mata ja e ciu.

²⁷ Si kasa i kamiñu pa koba, ku ta bai pa moradas di mortu.