Ditus 6 - BIBLIA - traduson antigu in Krioulo

Avisu pa fiadur

¹ Ña fiju, si bu seta sedu fiadur di dibida di utru algin, bu da bu propi mon,

² bu pañadu na ridia di bu propi palabras, ki purmesa ku bu fasi.

³ Asin ku bu na fasi, ña fiju, pa libra bu kabesa, pabia bu kai ja na mon di bu kumpañer. Bai, bu baŝa pa el, bu rogal ku fabur.

⁴ Ka bu seta pa bu durmi, nin pa bu uju diskansa.

⁵ Libra bu kabesa, suma gazela na mon di montiadur, o suma kacu na mon di kin ku ta pañal.

Avisu pa prigisosu

⁶ Abo, prigisosu, bai pa firminga, bu jubi ke ki ta fasi, pa bu sedu jiru.

⁷ I ka tene nin ŝef, nin kapatas, nin kil ku sta riba del,

⁸ ma i ta purpara, i junta si kumida na tempu di kebur.

⁹ O prigisosu! Te kal tempu ku bu na fika ditadu? Kal ora ku bu na lanta di bu sonu?

¹⁰ Bu fala: “N na durmi un bokadu, N na jungu son; N na dita N dobra mon un bokadiñu.”

¹¹ Asin, koitadesa ta bin riba di bo suma ladron; bu falta di kusas i ta bin suma omi yarmadu.

Avisu kontra maldadi

¹² Omi mau, malandru, i ta yanda ku palabras tortu na boka.

¹³ I ta fasi sinal ku uju, ku pe o ku dedus.

¹⁴ Tudu tempu i ta fasi planus tortu konformi maldadi di si korson. I ta yanda i na sumia jus.

¹⁵ E ku manda mufunesa na bin riba del di repenti; i na kebrantadu, i ka na tene kura.

¹⁶ E seis kusa, SIÑOR ka gosta delis; kil di seti, i nuju el:

¹⁷ Uju di orgulyu, lingua di mintida, mon ku ta darma sangi di algin ku ka ten kulpa,

¹⁸ korson ku ta pensa planus mau, pe ku ta kuri pa mal,

¹⁹ tustumuña ku ta konta mintidas ku kil ku ta sumia jus na metadi di ermons.

Avisu kontra dita ku minjer di utru omi

²⁰ Ña fiju, obdisi ordis di bu pape; ka bu njuti nsinamentu di bu mame.

²¹ Mara se palabras sempri na bu korson, bu pindra elis na bu garganti.

²² Ora ku bu na yanda, e na giau; ora ku bu na dita, e na guardau; ora ku bu korda, e na papia ku bo.

²³ E ordi i suma kanderu, e nsinamentu i suma lus. Si i raprindiu, i kuriẑiu, i ta mostrau kamiñu di vida,

²⁴ pa guardau di minjer mau, di palabras sabi di minjer infiel.

²⁵ Ka bu kubisa na bu korson si bonitasku, nin ka i kaptau ku si uju.

²⁶ Minjer ku ta bindi si kurpu, bu pudi kumpral ku un bokadu di kumida, ma si un minjer kasadu dita ku bo, i pudi kustau bu vida.

²⁷ Nta omi pudi toma fugu na si pitu sin si ropa ka kema?

²⁸ O algin pudi yanda riba di brasas sin i ka kema si pe?

²⁹ Asin ki sedu ku kil ku dita ku minjer di si kumpañer. Kil ku toka nel i ka na fika sin kulpa.

³⁰ Jinti ka ta koba ladron ora ki furta pa mata si fomi,

³¹ ma si i pañadu, i ta paga seti bias mas, nin si i kustal tudu kusa na si kasa.

³² Kil ku dita ku minjer di utru omi i ka tene kabesa; i dana si propi vida.

³³ I na sutadu, i tene mau nomi; si borgoña nunka ka na kaba.

³⁴ Siumi di maridu na lantanda raiba forti; i ka na purda na dia ki na torna vingansa.

³⁵ I ka na seta nin pagamentu; inda ku bu da suku di bas garandi, i ka na seta.