Ditus 5 - BIBLIA - traduson antigu in Krioulo

Avisu kontra dita ku minjer di utru omi

¹ Ña fiju, para sintidu na ña jiresa, ku ña palabras di ntindimentu,

² pa bu rakada ña avisu, pa bu boka mostra kuñisimentu.

³ Boka di minjer di utru omi i pudi sabi suma mel; si palabra i mas sabi di ki azeiti,

⁴ ma na kabantada i malgos suma fel, i ta fidi suma faka ku moladu na dus ladu.

⁵ Si pes ta ria pa mortu; si pasus ta bai diritu pa kau di mortus.

⁶ I ka ta pensa na kamiñu di vida; i ta yanda-yanda di un ladu pa utru sin sibi ke ki na fasi.

⁷ Gosi, ña fijus, bo sukutan; ka bo disvia di kusas ku N konta bos.

⁸ Lunjusi di ki minjer; ka bu ciga pertu di porta di si kasa,

⁹ pa ka bu bin pirdi bu rispitu dianti di jinti, bu muri sedu na mon di jinti kruel.

¹⁰ Jinti strañu e ta bin farta di bu rikesa. Tudu kusa ku bu tarbaja pa el i ta bin bai pa kasa di utru.

¹¹ Bu na jimi na kabantada di bu vida ora ku kurpu kaba ku bo.

¹² Bu na fala: “Jubi manera ku N kuriẑidu, ma N nega! N raprindidu, ma N njutil na ña korson!

¹³ N nega obi ña pursoris, nin N ka para sintidu na se palabras.

¹⁴ N bin nota kuma N na kaiba ja na borgoña na metadi di tudu juntamentu.”

¹⁵ Bibi yagu di bu propi fonti.

¹⁶ Nta bu dibi di disa yagu di bu fonti kuri suma korenti na rua?

¹⁷ Ki yagu dibi di sedu son pa bo; i ka dibi di rapatidu ku utru jinti di fora.

¹⁸ Bu fonti, ku sedu bu minjer ku bu kasa ocau nobu, pa i sedu bensuadu; kontenti ku el.

¹⁹ El i suma gazela bonitu, ku tene si forma di yanda bonitu. Bu ta fika kontenti ku si pitu pa sempri, bu sedu atraidu pa si amor tudu dia.

²⁰ Ña fiju, ke ku manda bu na disa utru minjer kaptau? Kuma ku bu na barsa pitu di minjer di utru omi?

²¹ SIÑOR ta oja tudu ku omi na fasi, i ta jubi pa tudu si kamiñus.

²² Pekadus di omi mau i si armadilia; i ta pañadu ku kordas di si propi pekadu.

²³ I na bin muri pa falta di disiplina; i na yanda mal pabia di si garandi tulesa.