Ditus 4 - BIBLIA - traduson antigu in Krioulo

Balur di jiresa

¹ Ña fijus, bo sukuta nsinamentu di bo pape; bo para atenson pa bo pudi ngaña ntindimentu.

² I bon nsinamentu ku N na da bos; ka bo disal.

³ Ocan mininu pikininu na kasa di ña pape, N seduba uniku fiju di ña mame.

⁴ Ña pape ta nsinanba, i falan: “Guarda ña palabras na bu korson, bu obdisi ña ordis; asin bu ta tene vida.

⁵ Buska jiresa ku ntindimentu tok bu ten elis. Ka bu diskisi di ña palabras, nin ka bu disvia del.

⁶ Ka bu bandona jiresa; i na guardau. Amal; i na guardau suguru.

⁷ Jiresa i kusa mas importanti; buskal tok bu tenel; nin si i kusta tudu ku bu tene, buska kuñisimentu.

⁸ Rispita jiresa; i na fasiu garandi. Barsal; i na tisiu rispitu.

⁹ I na dau koroa di gloria pa faja bu kabesa.”

¹⁰ Ña fiju, obi, bu seta ña palabras; asin bu ta tene vida kumpridu.

¹¹ N nsinau kamiñu di jiresa, N pou pa bu yanda na kamiñu diritu.

¹² Si bu yanda ne kamiñu, bu ka na fika mbaransadu; si bu kuri, bu ka na da tapada.

¹³ Pega tesu na nsinamentu di bu pape; ka bu largal. Guardal pabia i sedu bu vida.

¹⁴ Ka bu yanda na kamiñu di jinti ku ka kunsi Deus; ka bu sigi isemplu di jinti mau.

¹⁵ Disinvita di se kamiñu, ka bu yanda nel; disvia del, bu pasa lunju.

¹⁶ Jinti mau ka ta pudi durmi si e ka fasi mal; sonu ta kuri delis si e ka pui algin kai,

¹⁷ pabia e ta kume kumida di maldadi, e bibi biñu di violensia.

¹⁸ Kamiñu di justus i suma purmeru lus di mandrugada, ku ta kumsa na aumenta klaridadi tok sol kaba mansi,

¹⁹ ma kamiñu di omis mau i sukuru; nin e ka ta sibi ke ku pui elis pa e kai.

²⁰ Ña fiju, pensa diritu na ña konsiju, bu para sintidu na ña palabras.

²¹ Ka bu disa bu uju lunjusi delis; guarda elis na bu korson.

²² E sedu vida ku saudi pa kurpu di kilis ku oja elis.

²³ Riba di tudu, guarda bu korson, pabia el i fonti di vida.

²⁴ Ka bu disa palabra tortu sai na bu boka, nin kualker kombersa di nganu.

²⁵ Bu uju pa i jubi diritu bu dianti.

²⁶ Pensa diritu na kamiñu ku bu na pega, bu kuji kil ku sedu retu.

²⁷ Ka bu jingi nin pa direita nin pa skerda; tira bu pe di mal.