Ditus 31 - BIBLIA - traduson antigu in Krioulo

Konsiju pa un rei

¹ Es i palabra di ntindimentu ku mame di rei Lemuel nsinal:

² “O ña fiju, fiju ku N padi, rasposta di ña orason, ke ku N na falau?

³ Ka bu da bu forsa ku bu tempu pa minjeris ku ta dana vida di reis.

⁴ “Lemuel, reis ka dibi di bibi biñu; fiju di rei ka dibi di misti bibida forti.

⁵ Ora ke bibi e pudi diskisi di lei, e tursi diritu di kilis ku foronta.

⁶ Bibida forti i pa kilis ku na pirdi, biñu ta dadu pa kilis ku tene spiritu di kasabi,

⁷ pa e bibi, e diskisi di se koitadesa, e ka lembra mas di se kasabi.

⁸ “Yabri boka bu papia pa juda kilis ku ka pudi papia pa se kabesa, pa buska diritu di kilis ku bandonadu.

⁹ Yabri boka bu julga diritu, bu fasi justisa pa koitadis ku kilis ku ten falta.”

Minjer jiru

¹⁰ Minjer di bon manera, kin ku pudi ojal? I bali muitu mas di ki joias.

¹¹ Si omi ta pui tudu si fiansa nel, i ka ta ten falta di nada.

¹² Minjer ta fasi si omi ben, i ka ta fasil mal, tudu dias di si vida.

¹³ I ta buska lan ku liñu, i ta tarbaja ku bon vontadi ku si mon.

¹⁴ I ta bai buska si kumida lunju, suma barku di nogos.

¹⁵ I ta lanta mandrugada, i purpara kumida pa si familia, i konta si bajudas ke ke dibi di fasi.

¹⁶ I ta bai jubi lugar, i kumpral; ku diñeru ki ngaña i ta paranta orta di pe di uva.

¹⁷ I ta pega tesu na tarbaju, i ten forsa pa tudu ki na fasi.

¹⁸ I ta toma sintidu na si nogos pa i pudi ngaña diritu. Si kanderu ka ta pagadu di noti.

¹⁹ I ta fia si propi liña, i tisi si fazenda.

²⁰ I ta yabri mon, i da koitadis ku kilis ku pirsisa.

²¹ I ka ten medu di friu, pabia tudu si familia ta yanda ku bon ropa ku ta kenta kurpu.

²² I ta kumpu kuberturas pa kama, i bisti di liñu finu di kor purpura.

²³ Si omi i kunsidu na porton di prasa nunde ki ta bai sinta ku garandis di tera.

²⁴ I ta kumpu ropa di liñu finu pa bindi; i ta bindi sintus pa nogosiantis.

²⁵ Tudu jinti ta ojal suma minjer di rispitu ku forsa. I ka ta medi dia di amaña.

²⁶ I ta papia ku jiresa; nsinamentu fiel i sta na si boka.

²⁷ I ta guberna si kasa diritu; i ka ta kume kumida di prigisa.

²⁸ Si fijus ta lanta e papia ben del; si omi tambi ta ngabal, i fala:

²⁹ “Manga di minjer ta fasi ben, ma abo i minjor di tudu.”

³⁰ Bonitasku ta ngana, i ta pasa, ma minjer ku ta rispita SIÑOR i na ngabadu.

³¹ Bo dal rispitu pabia di si tarbaju; na porton di prasa jinti dibi di ngabal pa kusas ki fasi.