Ditus 28 - BIBLIA - traduson antigu in Krioulo

¹ Jinti mau ta kuri nin si algin ka serka elis, ma justu ta ten konfiansa suma fiju di lion.

² Pabia di pekadu, con ta muda sempri si ŝefis, ma un omi jiru ku ten ntindimentu ta pui con pa i sta firmi.

³ Omi di otridadi ku na kalka koitadis i suma cuba di turbada ku ka ta disa arus na lugar.

⁴ Kilis ku ta bandona lei e ta ngaba omis mau, ma kilis ku ta obdisi lei e ta risisti elis.

⁵ Omis mau ka ta ntindi ke ki justisa, ma kilis ku ta buska SIÑOR e ta ntindi tudu.

⁶ Koitadi ku ta yanda na bardadi i minjor di ki riku ku ta yanda na kamiñu tortu.

⁷ Kil ku obdisi lei i fiju ntindidu, ma kumpañer di jinti ku ta yanda sin kontrolu i ta tisi borgoña pa si pape.

⁸ Kil ku ta ngaña si rikesa ku kobra juru ku splorason i na juntal pa algin ku ta pati koitadis.

⁹ Kil ku nega obi lei, si orason i nujenti pa SIÑOR.

¹⁰ Kil ku disvianta jinti retu pa un kamiñu mau, i na kai na koba ki fasi, ma jinti ku yanda na bardadi e na yarda rikesa.

¹¹ Omi riku pudi pensa kuma i jiru, ma koitadi ku ten ntindimentu i ta rapara logu kuma ki sta.

¹² Ora ku bon jinti ngaña puder, pobu ta kontenti, ma ora ku omis mau subi na puder, jinti ta bai sukundi.

¹³ Kil ku sukundi si pekadus nunka i ka na bai dianti, ma kil ku konfesa, i disa, i ta yangasa miserikordia.

¹⁴ Sortiadu i omi ku ta rispita SIÑOR sempri, ma kil ku ndurusi si korson na bin kai na mal.

¹⁵ Suma lion ku na pupa o ursu ku tene fomi, asin ki omi mau ku ten puder riba di un pobu koitadi.

¹⁶ Ŝef sin ntindimentu i ta buri kastigu riba di jinti, ma kil ku nega avaresa i ta manda manga di tempu.

¹⁷ Omi ku mata si kumpañer i na kuri te dia di si mortu; ka ningin judal.

¹⁸ Kil ku ta yanda na bardadi i na fika suguru, ma kil ku ta yanda na kamiñu tortu i na kai di repenti.

¹⁹ Kil ku ta labra si lugar i na bin farta ku kumida, ma kil ku ta pirdi si tempu na nada i na farta di koitadesa.

²⁰ Omi fiel i ta incidu ku bensons, ma kil ku janti pa sedu riku i ka na kapli kastigu.

²¹ Pa fasi skuju di jinti i ka bon, ma, pa ngaña un bokadiñu di kumida, omi sta pruntu pa fasi mal.

²² Algin nveẑosu i ta kuri tras di rikesa, ma i ka sibi kuma koitadesa na peral.

²³ Si bu raprindi algin, mas tardi i na sta mas kontenti ku bo di ki ku utru algin ku ta ngabal son ku boka.

²⁴ Kil ku furta di si pape o mame, i fala: “I ka pekadu,” i kumpañer di danadur.

²⁵ Algin kubisosu i ta lantanda jus, ma kil ku fia na SIÑOR i ta pasa ben.

²⁶ Kil ku fiansa na si kabesa i tulu, ma kil ku ta yanda na jiresa i ta sta suguru.

²⁷ Kin ku pati koitadis i ka na falta nada, ma kil ku fica uju pa elis, manga di jinti na maldisual.

²⁸ Ora ku omis mau subi na puder, jinti ta sukundi, ma ora ke pirdi, justus na bai dianti, e na ciu.