Ditus 27 - BIBLIA - traduson antigu in Krioulo

¹ Ka bu njata pa dia di amaña, pabia bu ka sibi ke ki na tisiu.

² Utru ku pudi ngabau, i ka abo ku na ngaba bu kabesa.

³ Pedra i pisadu, reia tambi, ma raiba di tulu i mas pisadu di ki elis tudu.

⁴ Raiba ta fasi dur, i suma turbada, ma kin ku pudi nguenta nveẑa?

⁵ I minjor algin raprindiu klaru te pa i sukundi si amor.

⁶ Amigu ku amau i pudi dau dur, ma i pabia i fiel. Beẑu di algin ku ka gosta di bo i di nganu.

⁷ Algin ku farta i ta masa bagus di mel, ma kil ku tene fomi, tudu kusa malgos i ta sabi pa el.

⁸ Omi ku ta yanda-yanda lunju di si kasa i suma kacu ku ta bua lunju di si niñu.

⁹ Suma oliu ku purfumu ta kontenta korson, asin ku amigu ta kontenti ku konsiju di amor.

¹⁰ Ka bu bandona bu amigu nin amigu di bu pape. Ka bu bai pa kasa di bu ermon na dia ku bu foronta; visiñu pertu i minjor di ki ermon ku mora lunju.

¹¹ Ña fiju, sedu jiru, bu pun pa N kontenti, pa N pudi sibi ruspundi kil ku njutin.

¹² Jiru ta oja pirigu, i bai sukundi, ma kil ku ka ta pensa i ta bai son pa dianti, i ta bin sufri.

¹³ Si algin fika suma fiadur pa algin ku ka kunsidu, tomal si ropa, bu mpiñal.

¹⁴ Si algin bensua si visiñu parmaña sedu ku vos altu, si benson i na tomadu suma maldison.

¹⁵ Minjer ku ta jusia ciu i suma pingu di cuba ku ta kai tudu dia riba di lata.

¹⁶ Pa kalantal i suma paranta bentu, o pega azeiti na mon.

¹⁷ Suma ku feru ta fia feru, asin ku un omi ta prindi di si kumpañer.

¹⁸ Kil ku toma konta di pe di figu i na kume si fruta. Kil ku ta jubi diritu pa si patron i na rispitadu.

¹⁹ Manera ku yagu ta mostra rostu suma spiju, asin ku korson di omi ta mostra kil ki sedu.

²⁰ Nfernu ku mundu di mortus ka ta farta, suma ku uju di omi ka ta farta.

²¹ Suma ku prata ku uru ta probadu na fugu, karater di omi ta probadu ora ki ngabadu.

²² Nin si bu suta tulu tok bu kansa, si tulesa ka na sai nel.

²³ Buska sibi kuma ku bu karnel sta, bu kuda di bu limarias.

²⁴ Rikesas ka na fika pa sempri, nin koroa ka ta bai sempri pa fijus ku netus.

²⁵ Ora ku fenu tiradu i ta sai nobu fojas. Dipus algin ta junta paja di montis.

²⁶ Fijus di karnel pudi dau di bisti; bu pudi bindi kabras macu, bu kumpra utru lugar.

²⁷ Liti di kabras na ciga pa sustentau ku bu familia, ku bu bajudas.