Ditus 26 - BIBLIA - traduson antigu in Krioulo

¹ Suma nevi ka dibi di bin na tempu di kalur, o suma cuba na tempu di kebur, asin ku tulu ka dibi di dadu rispitu.

² Maldison ku ka mersidu i ka na bai na algin, suma ku kacus e ta bua e pasa.

³ Suti i pa kabalu, freiu pa buru, mantampa pa kosta di tulus.

⁴ Ka bu ruspundi tulu konformi si tulesa, pa bu ka bin sedu suma el.

⁵ Ruspundil na un manera ki pudi rapara kuma i ka jiru suma ki pensaba.

⁶ Kil ku manda rekadu na mon di un tulu i suma i korta si pe; i na sufri danu.

⁷ Suma perna di manku ku ta pindra sin forsa, asin ki ditu na boka di tulus.

⁸ Pa da tulu rispitu i suma algin ku mara pedra na si lamparan.

⁹ Ditu na boka di tulu i suma camidur ku misti tira fidida na si mon.

¹⁰ Patron ku ta pui kualker tulu ku na pasa na tarbaju i suma algin ku na manda fleŝa pa tudu ladu.

¹¹ Tulu ku ta ripiti si tulesa i suma kacur ku ta riba pa si ramasadura.

¹² Bu ciga di oja un omi ku pensa kuma i jiru? Tulu mas ten speransa di ki el.

¹³ Prigisosu ta fala: “Lion sta na kamiñu! I na yanda la na rua!”

¹⁴ Suma ku porta ta vira na si dobradisa, asin ku prigisosu ta vira na si kama.

¹⁵ Prigisosu ta miti mon na pratu, ma i ta prigisa yalsal pa si boka.

¹⁶ Prigisosu i ta pensa kuma i mas jiru di ki seti omi ku sibi da bon rasposta.

¹⁷ Kin ku na pasa, i miti boka na jus ku ka pertensil, i suma algin ku paña kacur na oreja.

^18-19 Omi ku ngana si kumpañer, i fala: “N na brinka nan”, i suma dudu ku na brinka ku fugu ku fleŝas di mortundadi.

²⁰ Sin leña, fugu ta paga; sin algin ku ta papia mal, jus na para.

²¹ Suma karbon ku leña ta pui fugu pa i yardi, asin ku omi ku ta garbata asuntu i ta sindi jus.

²² Palabras mau pa jinti i suma kusa sabi ku no kontenti pa nguli!

²³ Palabras di amor ku ta kubri korson mau i suma puti di lama foradu ku kusa baratu ku ta lampra.

²⁴ Inimigu ta finji ku si palabra, ma dentru del i na sukundi nganu.

²⁵ Si i papia sabi ku bo, ka bu fia, pabia seti kusa nujenti sta na si korson.

²⁶ Mesmu ki sukundi si odiu, si maldadi na sai dianti di jinti.

²⁷ Kin ku koba koba i na kai nel. Kin ku rola pedra, pedra na rola riba del.

²⁸ Algin munturus i ta aburisi kil ki papia mal pa el. Boka ku ta ngaba ku nganu i ta tisi danu.