Ditus 25 - BIBLIA - traduson antigu in Krioulo

Mas ditus di Salomon

¹ Es tambi i ditus di Salomon ku omis di Ezekias, rei di Judá, kopia.

² Gloria di Deus i pa kubri kusas; gloria di reis i pa diskubri sigridu.

³ Nunka no ka pudi kunsi pensamentu di rei; i altu suma seu, i fundu suma mar.

⁴ Si bu tira impuresa di prata, algin ku ta tarbaja ku metal i pudi kumpu un vasu bonitu.

⁵ Si bu tira konsijaduris mau dianti di rei, si tronu i ta firmantadu ku justisa.

⁶ Ka bu sedu orgulyosu dianti di rei, nin ka bu bai toma lugar na metadi di garandis.

⁷ Minjor bu pera pa e falau: “Subi li” te pa e bin cigantau pa da lugar pa un ŝef.

⁸ Kil ku bu oja, ka bu janti pa bai kontal na tribunal. Ke ku bu na fasi na fin si bu kumpañer bin pou na borgoña?

⁹ Si bu tene purblema ku bu visiñu, tratal ku el; ka bu kontal la fora,

¹⁰ pa i ka bin obil, i bin pou na borgoña, bu ta bin tene mau nomi.

¹¹ Palabra papiadu na ora sertu i ten balur suma fruta di uru na bandeẑa di prata.

¹² Omi jiru ku konsija algin ku sta pruntu pa obi, i ten balur suma brinkus di uru ku fiu di uru puru.

¹³ Algin fiel ku leba rekadu i ta kontenta si patrons ku mandal, suma yagu fresku na tempu di kebur.

¹⁴ Kil ku ta purmiti kusas, ma i ka da, i suma nuven ku bentu ku ka tisi cuba.

¹⁵ Ku pasensa bu pudi konvensi rei; ku palabras kalmu bu pudi kebranta os.

¹⁶ Si bu oja mel, kume kil ku justau, pa bu ka pasanta, bu bin ramasal.

¹⁷ Ka bu ba ta sta na kasa di bu kumpañer sempri, pa ka i bin ŝatia ku bo, i disgosta di bo.

¹⁸ Omi ku ta lantanda falsu tustumuñu kontra si kumpañer i suma martel o spada o fleŝa fiadu.

¹⁹ Algin infiel ku bu misti fiansa nel na tempu di foronta, i suma dinti ku kebra, o pe ku sai na si lugar.

²⁰ Kil ku kanta kantiga pa algin tristi i suma ki na dispil na un dia di friu, o i na tokal na si caga.

²¹ Si bu inimigu tene fomi, dal di kume; si i tene sedi, dal yagu pa i bibi.

²² Si bu fasi asin, bu na pul rostu kinti ku borgoña; SIÑOR na pagau.

²³ Bentu di norti ta tisi cuba; lingua finjidu di papiadur ta tisi rostu di raiba.

²⁴ I minjor mora na un kantu di kasa di ki mora na un kasa garandi ku minjer jusiadur.

²⁵ Bon nobas ku bin di un tera lunju i suma yagu fresku pa algin ku sta kansadu.

²⁶ Algin justu ku seta planu di un omi mau, i suma yagu ku funguli na fonti, o suma uju di fonti ku tene susidadi.

²⁷ I ka bon pa kume manga di mel, nin i ka bon pa buska rispitu pa bu kabesa.

²⁸ Omi ku ka pudi guberna si kurpu i suma prasa ku si mura dana.