Ditus 24 - BIBLIA - traduson antigu in Krioulo

¹ Ka bu ten nveẑa di omis mau, nin ka bu misti sta ku elis,

² pabia e ta pensa sempri na violensia; se kombersa i son kusa di fasi mal.

³ Ku jiresa un kasa ta kumpudu; ku ntindimentu i ta firmantadu;

⁴ ku kuñisimentu si kuartus ta incidu ku kusas bonitu, di balur.

⁵ Omi jiru i mas ten puder di ki omi forti; kil ku ten kuñisimentu i mas di ki kil ku tene kurpu forti.

⁶ Pa fasi gera bu pirsisa di konsiju jiru; pa ngaña gera bu pirsisa di manga di konsijadur.

⁷ Jiresa ta pasa riba di kabesa di tulu; na juntamentu na porton di prasa i ka ta yabri si boka.

⁸ Algin ku ta pensa sempri na fasi mal i ta comadu pursor di malvadesa.

⁹ Planus di tulu i sempri pa mal. Jinti ta nuju algin ku ta fasi trosa.

¹⁰ Si bu mostra fraku na dia di foronta, na bardadi bu forsa i pikininu.

¹¹ Libra kilis ku na lebadu pa matadu, bu salba kilis ku na rastadu pa matansa.

¹² Bu pudi fala: “No ka sibi nada.” Nta kil ku ta julga korson i ka na rapara bu motivu? Kil ku ta guarda bu vida i na sibi. I na paga omi konformi kil ki fasi.

¹³ Ña fiju, kume mel, pabia i bon; bagus di mel i sabi na bu boka.

¹⁴ Bu na sibi kuma jiresa tambi i sabi pa bo. Si bu ojal, bu na tene bon futuru; bu speransa i ka na sedu mpididu.

¹⁵ Abo, omi mau, ka bu fika na mboskada kontra kasa di omi bon, nin ka bu furta kusas na si kuartu.

¹⁶ Nin si algin justu kai seti bias, i na lanta, ma omis mau e na kai na mal.

¹⁷ Ora ku bu inimigu kai, ka bu ŋuminil, nin ka bu fika kontenti si i da tapada.

¹⁸ SIÑOR na oja manera ku bu na ŋuminil, i ka na kontenti ku bo; i ta bin disvia raiba ki ten pa ki algin.

¹⁹ Jinti ku ta fasi mal, ka bu disa elis pa e kansau sintidu, nin ka bu ten nveẑa di kilis ku ka mporta ku Deus.

²⁰ Algin mau i ka tene bon futuru; si kanderu i na bin pagadu.

²¹ Ña fiju, rispita SIÑOR, ku rei tambi; ka bu sedu sos ku jinti ku ta lanta kontra elis.

²² Di repenti danu pudi bin pa elis; kastigu ku SIÑOR ku rei na manda pa elis, kin ku sibi del?

²³ Ali mas ditus ku jinti jiru papia: Na julgamentu bu ka pudi diferensia jinti.

²⁴ Kin ku fala algin kulpadu: “I abo ku ten roson,” jinti na maldisual; nasons na odial,

²⁵ ma juis ku kastiga kil ku ten kulpa, vida na kuril diritu; benson garandi na bin riba del.

²⁶ Rasposta ku palabra di bardadi i suma beẑu na boka.

²⁷ Kabanta bu tarbaju la fora, bu labra bu lugar; dipus bu ta kumpu bu kasa.

²⁸ Ka bu sedu tustumuña kontra bu kumpañer sin roson. Ke ku manda bu na konta mintida ku bu boka?

²⁹ Ka bu fala: “Suma ki fasin, asin ku N na fasil; N na vingal ke ki fasin.”

³⁰ N pasa na lugar ku orta di uva di un algin prigisosu ku ka ten ntindimentu,

³¹ N ojal i inci ku fididas; con kubri ku paja, tapada di pedra tudu danadu.

³² Oca ku N ojal, N pensa diritu, N prindi lison di kil ku N oja.

³³ Durmi un bokadu, jungu un bokadu, kursa mon un bokadu pa diskansa;

³⁴ asin koitadesa na bin pa bo suma ladron yarmadu; bu na kumsa sinti falta.