Ditus 23 - BIBLIA - traduson antigu in Krioulo

¹ Si bu sinta pa kume ku un ŝef, jubi diritu kin ku bu sta ku el.

² Si bu ta kume ciu, bu ta miti faka na bu garganti.

³ Ka bu faima si kumida sabi, pabia i nganadur.

⁴ Ka bu fadiga pa sedu riku, ma tarbaja ku jiresa, dentru di limiti.

⁵ Bu na pui uju na kil ku ka na tarda. Bu rikesa na ranja asa, i bua pa seu suma agia.

⁶ Ka bu kume na kau di algin ku ta miskiña, nin ka bu kubisa si kumida sabi,

⁷ pabia suma ki pensa, asin ki sedu. I ta falau: “Kume, bu bibi,” ma si korson ka sta kontenti ku bo.

⁸ Bu na ramasa ki bokadu ku bu kume; bu palabra di gardisimentu i ta pirdi.

⁹ Ka bu papia na oreja di tulu, pabia i na njuti jiresa di bu palabras.

¹⁰ Ka bu tira sinal antigu di limiti nin ka bu yentra na yardansa di orfans.

¹¹ Kil ku na difindi pa elis i forti, i na bin toma se parti kontra bo.

¹² Pui bu sintidu na nsinu, bu ngaña mas kuñisimentu.

¹³ Ka bu medi kria bu fiju. Nin si bu sutal ku mantampa, i ka na muri.

¹⁴ Si bu sutal ku mantampa bu na libra si alma na nfernu.

¹⁵ Ña fiju, si bu korson sedu jiru, di mi na kontenti.

¹⁶ N na sinti orgulyu si N obiu bu na fala kusas bon.

¹⁷ Ka bu ten nveẑa di jinti ku ta fasi mal; rispitu pa SIÑOR i na sedu purmeru kusa na bu vida.

¹⁸ Asin bu na tene bon futuru; bu speransa ka na mpididu.

¹⁹ Ña fiju, obi, bu sedu jiru; gia bu korson na kamiñu retu.

²⁰ Ka bu sta na metadi di bibiduris, nin di kilis ku ta kume karni ciu,

²¹ pabia bibiduris ku kilis ku ta kume ciu e na kai na koitadesa; sonu na bisti elis ku rataju.

²² Obi bu pape ku dau vida; ka bu njuti bu mame ora ki bin beju.

²³ Kumpra bardadi, ka bu bindil; kumpra tambi jiresa, nsinamentu ku ntindimentu.

²⁴ Pape di algin justu i na kontenti dimas; kil ku padi jiru i na sinti orgulyu pa el.

²⁵ Pui bu pape ku mame pa e kontenti; pui bu mame ku padiu pa i sinti orgulyu.

²⁶ Ña fiju, dan bu korson; ba ta jubi manera ku N ta yanda.

²⁷ Minjer ku ta bindi si kurpu, o minjer infiel, i suma koba fundu, pertadu.

²⁸ I ta sukundi pa pera, suma bandidu, i ta pui manga di omi pa e sedu infiel.

²⁹ Foronta i pa kin? Kin ku ten tristesa? Kin ku tene jus? Kin ku tene keŝas? Kin ku tene cagas ki ka pirsisa di tene? Kin ku tene ujus burmeju?

³⁰ I pa kilis ku ta tarda na bibi, ku ta yanda na buska bibida ku misturadu pa i sedu mas forti.

³¹ Ka bu jubi pa biñu ora ki mostra burmeju, i na lampra na kopu, i na kua sabi.

³² Na kabantada i ta murdi suma kobra, i ta venena suma kakuba.

³³ Bu ta bin na oja kusas strañu, bu pensamentu ku bu palabras e ta sedu saklata.

³⁴ Bu ta bin sedu suma algin ku durmi na metadi di mar, ku na balansa la riba di mastru.

³⁵ Bu na fala: “E sutan, N ka sinti dur; e bati na mi, N ka sinti. Kal ora ku N na bin korda? N na torna bibi mas!”