Ditus 22 - BIBLIA - traduson antigu in Krioulo

¹ I minjor kuji bon nomi di ki manga di rikesa. Pa sedu rispitadu i minjor di ki prata ku uru.

² Riku ku koitadi e junta na un kusa: I SIÑOR ku kumpu elis tudu.

³ Algin ku ta pensa diritu i ta oja pirigu, i bai sukundi, ma kil ku ka ta pensa diritu i ta yentra na pirigu, i ta bai sufri.

⁴ Si bu baŝa kabesa, bu ten rispitu pa SIÑOR, bu na ngaña rikesa, rispitu ku vida.

⁵ Fididas ku armadilia e sta na kamiñu di algin tortu, ma kin ku misti si vida i ta disvia di ki kamiñu.

⁶ Nsina mininu na kamiñu ki dibi di yanda; ora ki bin beju i ka na disvia del.

⁷ Riku ta domina riba di koitadis; kil ku pistadu un kusa i katibu di kil ku pistal.

⁸ Kin ku sumia mal, mal ki na kebra; mantampa ki ta usa ku raiba i na kabadu ku el.

⁹ Kin ku ta pati i ta sedu bensuadu, pabia i rapati si kumida ku koitadi.

¹⁰ Si bu tira fora kil ku ta fasi trosa, jus ta sai juntu ku el; keŝa ku kusa di borgoña ta kaba.

¹¹ Kil ku ama puresa di korson, ku ta papia palabras sabi, i ta sedu amigu di rei.

¹² SIÑOR ta guarda kil ku ten kuñisimentu, ma palabra di tarpaseru, SIÑOR na proba kuma i ka bardadi.

¹³ Prigisosu ta fala: “Lion sta la fora! N na matadu la na rua!”

¹⁴ Boka di minjer di utru omi i koba fundu; kil ku SIÑOR ten raiba del i na kai nel.

¹⁵ Tulesa sta na fundu di korson di mininu, ma disiplina ku mantampa ta tiral nel.

¹⁶ Kil ku ta kalka koitadis pa buri si rikesa, o ku ta pati rikus, i na bin sedu koitadi.

Mas ditus di omi jiru

¹⁷ Para sintidu, bu obi palabras di jirus, bu pui sintidu na kil ku N na nsinau,

¹⁸ pabia i bonitu si bu guardal na bu korson, pa i sta tudu pruntu na bu boka.

¹⁹ N misti dau nsinamentu aos propi, pa bu fiansa pudi sta na SIÑOR.

²⁰ Nta N ka skirbi kusas muitu bon aserka di konsiju ku kuñisimentu,

²¹ pa mostrau sertesa di palabras di bardadi, pa bu pudi leba rasposta pa kilis ku mandau?

²² Ka bu splora koitadi pabia i koitadi; ka bu kalka un koitadi na tribunal,

²³ pabia SIÑOR na difindi si kasu; i na tira vida di kilis ku na robal kusas.

²⁴ Ka bu sedu sos di algin ku ta pirdi kontrolu, nin ka bu yanda ku algin ku ta lestu di paña raiba,

²⁵ pa bu ka bin nsina yanda na se kamiñu, bu pui bu vida na armadilia.

²⁶ Ka bu sedu algin ku ta da mon pa sedu fiadur di dibidas.

²⁷ Si bu ka bin tene di paga, bu kama ta bin robadu.

²⁸ Ka bu tira sinal antigu di limiti di yardansas ku bo papes pui.

²⁹ Bu oja un omi ku ta tarbaja diritu? I na bin kolokadu na tarbaju di rei; i ka na tarbaja pa kualker algin.