Ditus 21 - BIBLIA - traduson antigu in Krioulo

¹ SIÑOR ta diriẑi pensamentus di rei suma ki ta pui yagu na riusiñus pa i kuri na manera ku el i misti.

² Tudu kamiñu di omi ta parsi bon na si propi uju, ma SIÑOR ta jubi dentru di si korson.

³ Si bu fasi kusa bon, bu julga diritu, i ta mas pui SIÑOR kontenti di ki sakrifisiu.

⁴ Pa jubi riba ku korson di orgulyu i kanderu ku ta gia jinti mau na se pekadu.

⁵ Algin ku fasi planu ku kudadi, i tarbaja diritu, i na tene ciu, ma kil ku fasi tudu ku turmenta i ta bin kai na koitadesa.

⁶ Rikesa ku ngañadu ku palabra di mintida i suma serenu ku ta disparsi; tambi i armadilia di mortu.

⁷ Violensia di jinti mau na rabata elis, pabia e nega fasi ben.

⁸ Omi mau ta yanda tortu dimas, ma omi di bardadi i ta yanda diritu.

⁹ I minjor mora na un kantu di kasa di ki mora na kasa garandi ku minjer ku ta jusia.

¹⁰ Algin mau ta pui sintidu na mal; nin i ka ta sinti pena di si visiñu.

¹¹ Si bu kastiga kil ku ta fasi trosa, kil ku ka jiru inda i ta torna jiru. Si bu nsina algin jiru i ta buri kuñisimentu.

¹² Deus justu ta jubi tudu ku na fasidu na kasa di jinti mau, i ta leba elis pa kastigu.

¹³ Kil ku tapa oreja ora ku koitadi na comal, el tambi i na coma, i ka na obidu.

¹⁴ Pursenti ku dadu sukundidu i ta kaba ku garandi raiba.

¹⁵ Si justisa fasidu diritu, jinti bon e ta kontenti; jinti mau e ta panta.

¹⁶ Omi ku disvia di kamiñu di ntindimentu i na bai diskansa juntu ku mortus.

¹⁷ Kil ku ama kusas di mundu i na bida koitadi; kil ku gosta di biñu ku azeiti nunka i ka na riku.

¹⁸ Jinti mau e ta tisi riba di se kabesa ki sufrimentu ke tenta pui riba di jinti bon.

¹⁹ I minjor vivi na lala di ki mora juntu ku minjer ku ta jusia tok i pirdi kontrolu.

²⁰ Azeiti ku kumida sabi e sta na armazen di jiru, ma omi tulu ta kume tudu ki tene.

²¹ Kil ku sedu justu i bon i na tene vida; jinti na rispital, e tratal diritu.

²² Omi jiru na kamba mura di prasa di jinti forti, i na bati se kau forti ke fiansaba nel.

²³ Kil ku guarda si boka ku si lingua i na libra si vida di foronta.

²⁴ Ki algin orgulyosu ku ta pensa kuma i algin, si nomi i Trosadur. I ta mostra sempri orgulyu ku falta di pasensa.

²⁵ Prigisosu na muri ku fomi pabia si mon nega tarbaja.

²⁶ Tudu dia i na pensa son na kil ki misti, ma omi bon ta da ku mon abertu.

²⁷ Sakrifisiu di omi mau i nujenti pa SIÑOR; i mas nujenti inda si i pursental ku motivu mau.

²⁸ Tustumuña munturus na pirdi, ma omi obdienti, ora ki papia, si palabra na setadu.

²⁹ Omi mau ta finji ku rostu di koraẑen, ma omi retu i ta pensa diritu na si kamiñu.

³⁰ Si bu sta kontra SIÑOR, nin jiresa nin ntindimentu nin planus e ka na baliu.

³¹ Kabalu ta purparadu pa dia di gera, ma vitoria i ta bin di SIÑOR.