Ditus 2 - BIBLIA - traduson antigu in Krioulo

Purbitu di jiresa

¹ Ña fiju, si bu seta ña palabras, bu sukundi ña mandamentus dentru di bu korson,

² bu para oreja pa jiresa, bu mpina bu korson pa ntindimentu,

³ si bu pidi pa ntindimentu, bu roga pa jiresa,

⁴ si bu buskal suma prata o suma rikesa sukundidu,

⁵ bu ta ntindi rispitu pa SIÑOR, bu ta oja kuñisimentu di Deus,

⁶ pabia SIÑOR i ta da jiresa; di si boka i ta bin kuñisimentu ku ntindimentu.

⁷ El i ta guarda jiresa di bardadi pa kilis ku sedu justu; i sedu tajadera pa kilis ku ta yanda ku korson di bardadi.

⁸ I ta guarda kilis ku ta trata utru jinti diritu; i ta difindi pa kilis ki di sil.

⁹ Asin bu na ntindi kusas sertu, justu i diritu; bu na sibi yanda na bon kamiñus,

¹⁰ pabia jiresa na yentra na bu korson; kuñisimentu ta sedu bonitu pa bo.

¹¹ Bon juisu ku jiresa na guardau,

¹² e na librau di kamiñu mau, ku di omis ku ta papia kusas tortu,

¹³ di kilis ku disa kamiñu retu pa yanda na kamiñu sukuru,

¹⁴ ku ta gosta di fasi mal, ku ta kontenti ku kusas tortu ku jinti mau ta fasi,

¹⁵ ku ta disvia, e bai na kamiñu tortu.

¹⁶ I na librau di minjer infiel pa si omi, o kualker minjer ku misti atraiu ku si palabras bonitu,

¹⁷ ku disa si amigu di nobresa, i diskisi di si kontratu ki fasi dianti di Deus.

¹⁸ Si kasa ta mpina pa mortu; si kamiñu ta bai pa mundu di mortus.

¹⁹ Tudu kilis ku bai pa el e ka na riba, nin e ka na yangasa kamiñu di vida.

²⁰ Asin bu dibi di sigi pasus di omis bon, bu fika na kamiñu di justus.

²¹ Kilis ku sedu retu, ku ka ten kulpa, e na fika ntidu ne tera,

²² ma jinti mau na rinkadu na tera; jinti infiel na kabadu ku el.