Ditus 15 - BIBLIA - traduson antigu in Krioulo

¹ Bon rasposta ta kalma raiba, ma palabra duru i ta lantandal.

² Palabra di jiru ta fasi kuñisimentu pa i sedu un kusa sabi, ma boka di tulu i ta darma tulesa.

³ Uju di SIÑOR sta na tudu kau, i na jubi jinti mau ku bon.

⁴ Palabra sabi i arvuri di vida, ma palabra tortu ta kebranta spiritu.

⁵ Tulu, si si pape kuriẑil, i ta njuti, ma kil ku ta raprindidu i seta, el i ta mostra ntindimentu.

⁶ Na kasa di justu i ten garandi rikesa, ma kil ku omi mau ngaña i ta tisi kasabi.

⁷ Boka di jiru i ta darma kuñisimentu, ma korson di tulu ka ta fasi asin.

⁸ Sakrifisiu di jinti mau i nujenti pa SIÑOR, ma orason di jinti retu i si kontentamentu.

⁹ Kamiñu di omi mau i nujenti pa SIÑOR, ma i ta ama kil ku na yanda diritu.

¹⁰ Kastigu duru na pera kil ku sai na kamiñu; kil ku raprindidu i nega, i na muri.

¹¹ SIÑOR pudi jubi dentru di mundu di mortus, ku fadi korson di omis.

¹² Orgulyosu ka ta gosta di algin ku raprindil, nin i ka ta ciga pa pidi konsiju na jirus.

¹³ Korson kontenti ta fasi rostu bonitu, ma dur di korson i ta kebranta spiritu.

¹⁴ Korson ntindidu ta buska kuñisimentu, ma boka di tulus i ta kume tulesa.

¹⁵ Jinti ku kalkadu e ta sta tristi kada dia, ma kil ku tene korson kontenti i tene sempri festa.

¹⁶ Minjor bu tene puku, bu rispita SIÑOR, te pa bu tene rikesa, bu ka ten susegu.

¹⁷ Minjor kumida di orta, ku amor, di ki karni di baka gurdu, ku odiu.

¹⁸ Omi ku ta lestu pa paña raiba ta lantanda jus, ma omi di pasensa i ta kalma gera.

¹⁹ Kamiñu di prigisosu i suma tapada di fidida, ma kamiñu di omi retu i suma strada.

²⁰ Fiju jiru ta kontenta si pape, ma tulu ta njuti si mame.

²¹ Tulu ta kontenti ku tulesa, ma omi ntindidu i ta yanda pa dianti.

²² Nunde ki ka ten konsiju, projetus ta sai amonton, ma ku manga di konsijadur e ta bai dianti.

²³ Omi ta kontenti si i da bon rasposta; palabra sertu na si tempu propi i bon.

²⁴ Pa ntindidu, kamiñu di vida ta subi pa riba, pa i pudi jingi lunju di mundu di mortus ku sta bas.

²⁵ SIÑOR na dana kasa di orgulyosus, ma i na guarda yardansa di viuva.

²⁶ Pensamentus di algin mau i nujenti pa SIÑOR, ma palabra di jinti puru i sabi.

²⁷ Omi kubisosu ta tisi mufunesa pa si kasa, ma kil ku ta nega suku di bas i ta bibu.

²⁸ Justu ta pensa na kil ki dibi di ruspundi, ma boka di jinti mau ta tira manga di kusa mau.

²⁹ SIÑOR ta sta lunju di jinti mau, ma i ta obi orason di justu.

³⁰ Rostu kontenti ta tisi kontentamentu na korson; bon nobas ta tisi saudi pa os.

³¹ Algin ku ta para sintidu na konsiju ku ta da vida i pudi mora na metadi di jirus.

³² Kil ku nega si algin kuriẑil i ta njuti si kabesa, ma algin ku sukuta ora ki raprindidu i ta ngaña ntindimentu.

³³ Rispitu pa SIÑOR ta nsina jiresa. Algin ku misti rispitu i ten ku sedu umildi.