Ditus 14 - BIBLIA - traduson antigu in Krioulo

¹ Minjer jiru ta firmanta si kasa, ma minjer tulu ta bati di sil ku si mon.

² Kil ku ta yanda na bardadi i ta rispita SIÑOR, ma kil ku ta yanda na kamiñu tortu i ta njutil.

³ Kombersa orgulyosu di tulu i sedu mantampa pa si kurpu; palabra di jiru i ta guardal.

⁴ Ku falta di turu bemba ta fika limpu, ma ku forsa di tarbaju di turu bu ta oja bon kebur.

⁵ Tustumuña di fiansa ta konta sempri bardadi, ma kil ki ka di fiansa i ta konta son mintida.

⁶ Algin ku ta fasi trosa i ta buska jiresa, i ka ta ojal, ma algin ntindidu i lestu pa prindi.

⁷ Fika lunju di tulu, pabia bu ka na obi nin palabra di jiresa na si boka.

⁸ Un omi spertu i ten jiresa pa buska kamiñu sertu, ma tulesa di omi tulu i ta nganal.

⁹ Tulus ka ta mporta si e peka, ma jinti retu ta misti ten pas na se metadi.

¹⁰ Kada korson i kunsi si propi kasabi ku si kontentamentu; algin strañu ka pudi toma parti ku el.

¹¹ Kasa di jinti mau na danadu, ma morada di kilis ku retu i na tene tudu.

¹² I ten kamiñu ku omi pudi pensa i sertu, ma kabantada di ki kamiñu i mortu.

¹³ Te na ri, korson pudi sta na kasabi. Kontentamentu pudi kaba na tristesa.

¹⁴ Omi infiel di korson na risibi ke ki mersi, ma omi bon na premiadu pa kil ki fasi.

¹⁵ Algin ku ka maduru ta seta tudu palabra, ma algin ntindidu i na pensa antis di bai dianti.

¹⁶ Jiru ta toma sintidu, i jingi di mal, ma tulu ta tene sangi kinti, i ka ta nota pa pirigu.

¹⁷ Kil ku lestu pa paña raiba i ta fasi suma dudu; omi ku ta fasi planu mau ta odiadu.

¹⁸ Kilis ku ka maduru e ta yarda tulesa, ma jinti ntindidu na premiadu ku kuñisimentu.

¹⁹ Jinti mau e na mpina dianti di bons; kilis ku ka mporta ku Deus na mpina dianti di porton di justu.

²⁰ Koitadi, nin si visiñu i ka ta gosta del, ma amigus di riku e ciu dimas.

²¹ Kil ku njuti si kumpañer i na peka, ma kil ku mostra bondadi pa koitadis i na sortiadu.

²² Nta kilis ku fasi planus di mal e ka sta na kamiñu eradu? Ma kilis ku fasi planus di ben e na ngaña fiansa ku amor di jinti.

²³ Si algin ta tarbaja, i ten purbitu, ma si i sinta i na papia son, i ta bai pa koitadesa.

²⁴ Jinti jiru ta risibi koroa di rikesa, ma tulu ta fajadu son ku tulesa.

²⁵ Tustumuña ku ta konta bardadi i ta salba vidas; kil ku ta konta mintida i ta ngana son.

²⁶ Kil ku ta rispita SIÑOR i ten konfiansa firmi; i na sedu kau suguru pa si fijus.

²⁷ Rispitu pa SIÑOR i fonti di vida pa libra di armadilia di mortu.

²⁸ Garandesa di rei i ta dipindi di numeru di si jinti; si i ka tene ningin pa manda riba delis, el i ka ningin.

²⁹ Omi di pasensa i ten garandi ntindimentu, ma kil ki turmentadu i ta mostra tulesa.

³⁰ Korson kalmu ta da saudi pa kurpu, ma nveẑa ta podrisi os.

³¹ Kin ku kalka koitadi i na koba kil ku kumpul, ma kin ku mostra bondadi pa koitadi i na da Deus gloria.

³² Omi mau, si propi maldadi na batil, ma justu i ten speransa, mesmu na si mortu.

³³ Jiresa mora na korson di ntindidu, ma i ka kunsidu na korson di tulus.

³⁴ Vida justu ta yalsa un nason, ma pekadu i borgoña pa pobu.

³⁵ Rei ta kontenti ku ŝef jiru, ma i ta paña raiba ku kil ku ka ta tarbaja diritu.