Ditus 13 - BIBLIA - traduson antigu in Krioulo

¹ Fiju jiru ta obi si si pape kuriẑil, ma troseru ta raprindidu, i ta nega obi.

² Omi ta kume bon kusas di frutu di si boka, ma kilis ku ka sedu fiel e ta misti son violensia.

³ Kil ku ta guarda si boka i ta guarda si vida, ma kil ku yabri si boka ciu i na tene kasabi.

⁴ Prigisosu ta misti, ma nada i ka ta yangasa; tarbajaduris e ta farta son.

⁵ Justu ta nuju palabra di mintida, ma omi mau ta tisi borgoña ku kunfuson.

⁶ Bondadi ta guarda kil ku tene korson di bardadi. Maldadi ta pui omi mau pa i kai.

⁷ I ten omi ku ta finji sedu riku, ma nada i ka tene; utru ta finji koitadi, ma i tene manga di rikesa.

⁸ Omi riku i ten ku usa si diñeru pa salba si vida, ma ningin ka ta ameasa koitadi.

⁹ Algin justu i suma lus ku na sindi klaru; algin mau i suma lus ku misti paga.

¹⁰ Orgulyosu ta tisi son jus; jiresa ta ojadu na kil ku seta konsiju.

¹¹ Rikesa ku algin ngaña na tarpasa i ta mingua, ma kil ku junta si rikesa ku forsa di si tarbaju i ta buril.

¹² Speransa ku diadu i ta pui korson duensi, ma vontadi yangasadu i arvuri di vida.

¹³ Kil ku njuti palabra di konsiju i na bin pirdi, ma kil ku rispita ordi i na bin ngaña.

¹⁴ Nsinamentu di jiru i fonti di vida, pa algin pudi disinvita armadilia di mortu.

¹⁵ Bon ntindimentu ta ngaña fabur, ma kamiñu di kilis ku ka sedu fiel i kansadu yanda.

¹⁶ Algin jiru ta pensa antis di fasi un kusa, ma tulu ta mostra si tulesa.

¹⁷ Si un algin ku ta leba rekadu i mau, i ta kai na mal, ma mbaŝadur fiel i ta tisi pas.

¹⁸ Kil ku kuriẑidu, i nega, koitadesa ku borgoña na bin pa el, ma algin ku raprindidu, i seta, i na rispitadu.

¹⁹ Vontadi yangasadu i ta pui algin kontenti. Tulus ka ta misti disa se mal.

²⁰ Si bu yanda ku jiru bu na sedu jiru, ma kumpañer di tulus i na sufri danu.

²¹ Mufunesa na sta tras di kilis ku ta fasi mal, ma justus na bin tene bon pagamentu.

²² Un bon omi ta disa yardansa pa fijus di si fijus, ma rikesa di algin mau i ta guardadu pa justu.

²³ Lugar di koitadi pudi padi ciu, ma falta di justisa ta robal el.

²⁴ Kil ku ka ta usa mantampa i ka gosta di si fiju, ma kil ku ama si fiju i ta kastigal na ora ki mersi.

²⁵ Justu ta kume tok i farta, ma jinti mau e ta pasa fomi.