Ditus 12 - BIBLIA - traduson antigu in Krioulo

¹ Kil ku kuriẑidu i seta, i ama kuñisimentu, ma kil ku raprindidu i nega, i brutu.

² Omi bon ta yangasa fabur di SIÑOR, ma SIÑOR ta kondena jinti ku ta fasi planus mau.

³ Maldadi ka ta tisi firmesa, ma rais di jinti justu ka pudi rinkadu.

⁴ Minjer di bon manera i koroa di si omi, ma kil ku ta fasi kusas di borgoña i suma podrisa na os di si omi.

⁵ Planus di algin justu e sedu retu, ma konsijus di jinti mau e sedu nganu.

⁶ Palabras di jinti mau i mboskada pa darma sangi, ma palabras di justus e ta libra jinti.

⁷ Jinti mau na kabadu ku el, ma familia di jinti justu na kontinua firmi.

⁸ Si algin sedu jiru, i na ngabadu, ma kil ku tene menti tortu i na njutidu.

⁹ Minjor bu sedu algin umildi ma bu tene kriadus, te pa bu finji sedu algin garandi, ma bu ten falta di kumida.

¹⁰ Un omi justu ta toma konta di si limarias diritu, ma omi mau ta sedu kruel pa di sil.

¹¹ Kil ku labra si con ta bin farta ku kumida, ma kil ku ta kuri tras di ideias bakatela i tulu.

¹² Omis mau ta misti vivi di kusas ku utru jinti mau furta, ma rais di justu na padi si frutu.

¹³ Omi mau ta pañadu na si propi palabra, ma justu ta kapli di foronta.

¹⁴ Di palabra di si boka un omi ta farta di bon kusas; tambi i ta pagadu pa kusas ki fasi ku si mon.

¹⁵ Tulu ta pensa sempri kuma i sta na kamiñu sertu, ma jiru ta sukuta konsiju.

¹⁶ Tulu, si i paña raiba, i ta mostral logu, ma omi jiru ta disdangu algin ku na kobal mal.

¹⁷ Si algin konta bardadi, justisa ta fasidu diritu, ma tustumuña munturus i ta ngana.

¹⁸ I ten utrus ku tene palabra suma ponta di spada, ma palabras di jiru ta da saudi.

¹⁹ Kin ku ta konta bardadi i ta fika pa sempri, ma kin ku ta konta mintida ta tarda son un bokadu.

²⁰ Nganu sta na korson di kilis ku ta fasi planu mau, ma kilis ku ta tarbaja pa pas na ten kontentamentu.

²¹ Nin un kastigu ka na bin pa justu, ma jinti mau na oja manga di mal.

²² SIÑOR ta nuju boka di munturus, ma i ta kontenti ku kilis ku ta kumpri se palabra.

²³ Omi ntindidu ka ta ronka si kuñisimentu, ma tulus ta papia, e mostra se tulesa.

²⁴ Kil ku ta tarbaja ciu i ta bin manda; kil ku prigisosu i ta bin sedu katibu.

²⁵ Miskiñu na korson di omi i ta batil, ma bon palabra ta tisil kontentamentu.

²⁶ Un omi justu i gia pa si kumpañer, ma jinti mau ta pega na kamiñu ku na pui elis pa e yara.

²⁷ Prigisosu ka na yasa karni di limaria ki montia, ma omi tarbajadur ta pui balur na kusas ki tene.

²⁸ Kamiñu di bondadi ta leba pa vida; na ki kamiñu mortu ka ten.