Ditus 1 - BIBLIA - traduson antigu in Krioulo

Balur di Ditus

¹ Es i ditus di Salomon, rei di Israel, fiju di Davi,

² pa juda jinti pa e yangasa jiresa ku nsinu; pa ntindi palabras ku sintidu fundu;

³ pa ngaña un vida ben nsinadu; pa fasi kil ki sertu, justu i diritu;

⁴ pa da jiresa pa algin ku ka ten spiriensia; pa da jovens kuñisimentu ku bon juisu;

⁵ pa omi jiru pudi obil, i kirsi na jiresa; pa omi ntindidu pudi ngaña konsiju jiru;

⁶ pa ntindi ditus ku se signifikadu; pa ntindi palabras ku adiviñas di jirus.

Konsiju pa rapasis

⁷ Rispita SIÑOR i purmeru pasu pa kuñisimentu, ma tulus ta njuti jiresa ku nsinamentu.

⁸ Ña fiju, para sintidu na nsinamentu di bu pape; ka bu disa kusa ku bu mame nsinau,

⁹ pabia i na sedu suma koroa bonitu pa bu kabesa, o suma fiu pa bu garganti.

¹⁰ Ña fiju, si jinti mau misti tentau ku palabra sabi, ka bu seta.

¹¹ E pudi falau: “Bin ku nos, no buska algin pa mata; no monta mboskada pa un algin ku ka fasinu mal!

¹² No nguli elis bibu, di un bias, suma difuntu ku riantadu pa koba.

¹³ No na oja tudu koldadi rikesa, no inci no kasa ku kusas ku no furta.

¹⁴ Bin junta ku nos; no na tene son un bolsu.”

¹⁵ Ña fiju, ka bu yanda juntu ku elis; ka bu pui pe na se kamiñu,

¹⁶ pabia se pe ta kuri pa pekadu, e ta janti pa darma sangi.

¹⁷ I ka bali pena distindi ridia dianti di kacu oca ki na jubiu.

¹⁸ Ki jinti e ta monta mboskada kontra se propi kabesa, e na montia se propi vida.

¹⁹ I asin ki kamiñu di algin ku ta yanda na tarpasa. Ki tarpasa i ta tira vida di algin ku yentra nel.

Jiresa na coma

²⁰ Jiresa na grita na rua; na un kau publiku i yalsa fála.

²¹ I na papia altu na ntronkamentus nunde ku jumbulumani ciu; na portons di prasa i ta da si palabra:

²² “O tulus! Te kal tempu ku bo na ama tulesa? Abos trosaduris, te kal tempu ku bo na kontenti pa fasi trosa? Abos tulus, te kal tempu ku bo na disgosta di kuñisimentu?

²³ Si bo kudi ora ku N raprindi bos, N ta darma ña spiritu ciu riba di bos, N ta pui pa bo sibi ña palabras.

²⁴ N coma, ma bo nega kudi; N distindi mon, ma i ka ten kin ku para sintidu.

²⁵ Bo nega tudu ña konsiju; oca ku N raprindi bos, bo ka mistiba kudi.

²⁶ Asin N na ri ora ku mal bin pa bos; N na fasi trosa ora ku garandi medu ciga pa bos,

²⁷ ora ku garandi medu ciga pa bos suma turbada, ora ku mal bin pa bos suma urdumuñu, ora ku kasabi ku foronta bin riba di bos.” Jiresa kontinua i fala:

²⁸ “Na ki dia e na coman, ma N ka na kudi; e na buskan ma e ka na ojan.

²⁹ E disgosta di kuñisimentu, e ka kuji rispitu pa SIÑOR.

³⁰ E ka misti ña konsiju, e njuti ña raprinson.

³¹ Asin e na risibi rusultadu di kusas ke fasi. Se planus pa mal na kai riba delis.

³² Jinti simplis na muri pabia di se disviu. Jinti tulu ku pensa kuma e sta ben e na pirdi,

³³ ma kil ku para sintidu na ña palabra i na mora suguru, ketu, sin medu di mal.”