Daniel 8 - BIBLIA - traduson antigu in Krioulo

Vison di karnel ku kabra

¹ Na terseru anu di renansa di Belsazar, ami, Daniel, N teneba vison, dipus di ki utru ku N teneba purmeru.

² Na tempu ku N teneba ki vison, N staba na prasa fortifikadu di Susan, na pruvinsia di Elan, ma na vison N oja kuma N staba lungu di riu Ulai.

³ N yalsa uju, N oja un karnel macu ku firma lungu di riu, ku teneba dus cifri kumpridu. Kil ku kumsa kirsi na ultimu i bin sedu mas kumpridu di ki ki utru.

⁴ N oja ki karnel manera ki na ataka ku cifris pa ladu di kaida di sol, pa norti i pa sul. Nin un limaria ka pudiba nguental, ku fadi pa libra di si puder. I ta fasiba konformi i misti; asin i ta mostra si garandesa.

⁵ Oca ku N na jubiba, di repenti i sai un kabra macu na ladu di kaida di sol. I pasa kinti-kinti riba di tudu tera suma ki na bua, sin toka pe na con. Ki kabra macu teneba un cifri garandi na metadi di si uju.

⁶ I bai pa ki karnel ku teneba dus cifri, ku N ojaba lungu di riu, i kuri kontra el ku tudu si forsa.

⁷ N ojal i ciga pertu di karnel ku garandi raiba; i maja ki karnel, i kebral si dus cifri. Asin karnel ka tenba forsa pa difindi. I botal na con, i masal ku pe; i ka tenba kin ku pudi libra ki karnel na si mon.

⁸ Ki kabra macu mostra si garandesa, ma ocal na si forsa mas altu, si cifri garandi kebradu. I nasi na ki lugar kuatru cifri garandi; un bai pa norti, utru pa sul, utru pa lesti, utru pa kaida di sol.

⁹ Na un delis i sai un cifri pikininu dimas, ma i bin kirsi ciu pa ladu di sul, pa saida di sol, suma tambi pa tera bonitu di Judá.

¹⁰ I torna forti tok i ataka tropas ku staba suma strelas di seu, i bati utru di ki tropas pa con, i masa elis.

¹¹ I mistiba disafia ŝef di tropas di seu, tok i kaba ku ki sakrifisiu ku ta fasidu pa el kada dia; kau sagradu di ŝef di tropas batidu na con.

¹² Pabia di pekadu, ki tropas ntregadu na si mon, ku sakrifisiu di kada dia. I toma bardadi, i botal na con. Tudu ki fasi i ta kurilba diritu.

¹³ Dipus N obi un anju ku na papia. Utru anju ruspundi, i puntal: “Te kal tempu ku kusas de vison na kontinua? E pekadu ku ta dana, kantu tempu ki na kontinua toma lugar di sakrifisiu di kada dia? Kantu tempu ku tropas di seu ku kau sagradu na masadu ku pe?”

¹⁴ N obi rasposta ku fala: “Te 2.300 di tardi ku parmaña, ku sedu 1.150 dia. Dipus kau sagradu na purifikadu.”

Splikason di vison

¹⁵ Ami, Daniel, dipus ku N oja ki vison, N buska ntindil. Di repenti i bin ña dianti un algin ku parsi ku omi.

¹⁶ N obi vos di un omi lungu di riu Ulai ku na grita i fala: “Gabriel, splika e omi ki vison.”

¹⁷ Oca ki ciga pertu di kau nunde ku N firmaba, N fika ku medu tok N mborka na con. I falan: “Fiju di omi, ntindi kuma e vison i sta ligadu ku tempu di kabantada.”

¹⁸ Oca ki na papia ku mi, N kai na con, N dismaja. El i pegan, i firmantan,

¹⁹ i falan: “N na kontau ke ku na bin sedu na kabantada, na tempu di raiba di Deus, pabia e vison i sta ligadu ku tempu markadu di kabantada.

²⁰ Ki karnel macu ku bu oja ku dus cifri i reis di Media ku Persia.

²¹ Ki kabra macu ku manga di kabelu i rei di Gresia. Cifri garandi na metadi di si uju i si purmeru rei.

²² Ki kuatru cifri ku lanta na lugar di kil ku kebradu i kuatru renu ku na bin lanta na mesmu nason, ma e ka na ten forsa suma kil di purmeru.

²³ “Na kabantada di se renansa, ora ku pekadu di jinti ciu dimas, un rei na bin lanta, ku rostu duru, ku sedu garandi nganadur.

²⁴ I na bida kada bias mas forti, ma i ka na sedu pa si propi forsa. I na dana kau dimas; i na ten sorti, i na fasi ke ki misti. I na kaba ku omis di forsa, ku pobu di Deus tambi.

²⁵ Ku si jiresa i na pui pa nganu vensi. Dipus i na sinti orgulyu na si korson. I na kaba ku manga di jinti sin avisu. I na lanta kontra Rei mas garandi di tudu, ma i na kebradu sin ajuda di mon di omi.

²⁶ “Ki vison aserka di 2.300 di parmaña ku di tardi ku bu kontadu, i bardadi, ma bu na guarda ki vison na sigridu, pabia i na fala di dias ku lunju inda.”

²⁷ Ami, Daniel, N pirdi forsa, N fika duenti pa puku dia. Dipus N lanta, N fasi tarbaju di rei. N fikaba ku spantu ku ki vison; i ka tenba algin ku na splikan el.