Daniel 6 - BIBLIA - traduson antigu in Krioulo

Daniel na koba di lions

¹ Dariu oja kuma i dibi di pui sentu i vinti presidenti pa e sta riba di tudu si renu.

² Riba delis i pui tris ministru ku ki presidentis tenba di da konta pa elis, pa ka rei sufri nin un danu. Daniel seduba un di ki tris ministru.

³ I mostra kuma i pudi tarbaja minjor di ki utru ministrus ku presidentis, pabia i seduba omi jiru dimas. Rei na pensaba pul riba di tudu renu.

⁴ Ki ministrus ku presidentis fika e na buska roson pa pudi keŝa di Daniel na parti di si tarbaju na renu, ma e ka oja kulpa nel, pabia Daniel seduba di fiansa. E ka oja nin kurupson nin falia nel.

⁵ E fala ŋutru: “Nunka no ka na oja roson pa keŝa de algin, si no ka buskal na ladu di lei di si Deus.”

⁶ Asin ki ministrus ku presidentis bai juntu pa rei, e falal: “Ñu Rei Dariu ta bibu pa sempri!

⁷ Tudu ministrus di renu, ku ŝefis, presidentis, kapitons ku gubernaduris, e ruma entri elis kuma, rei dibi di da ordi ku ten ku obdisidu, ku fala kuma, na prazu di trinta dia, algin ku fasi pididu pa kualker deus o omi, ku ka sedu pa Ñu Rei, i na botadu na koba di lions.

⁸ Agora, Ñu Rei pudi konfirma e lei, Ñu sinal, pa ka i mudadu, suma ku lei di medus ku persas ka ta pudi mainadu.”

⁹ Asin rei Dariu sina ki lei.

¹⁰ Oca ku Daniel bin sibi kuma ki lei sinadu, i yentra na si kasa, nunde ki tenba un kuartu ku janelas abertu na ladu di Jerusalen. Tris bias na un dia i ta finkaba juju i ora, i fala si Deus obrigadu, suma ki kustumaba ta fasi.

¹¹ Ki omis bai juntu, e oja Daniel na ora, i na pidi dianti di si Deus.

¹² E bai pa rei, e puntal: “Nta Ñu ka sina ki lei ku fala kuma, na prazu di trinta dia, algin ku fasi pididu pa kualker deus o omi, ku ka sedu pa Ñu Rei, i na botadu na koba di lions?” Rei ruspundi i fala elis: “Ki lei i sertu, konformi lei di medus ku persas ku ka pudi maina.”

¹³ E ruspundi e fala rei: “Daniel, un di ki katibus ku tisidu di Judá, i ka ta mporta ku Ñu Rei, nin ku ki lei ku Ñu sina. I ta fasi si orason tris bias na un dia.”

¹⁴ Oca ku rei obi e kusa, i fika ku kasabi garandi, i fasi tudu ki pudi pensa nel pa tenta libra Daniel, tok sol noti.

¹⁵ Ki omis junta mas, e bai pa rei, e falal: “Ñu Rei sibi kuma, konformi lei di medus ku persas, nin un ordi o lei ku rei sina ka pudi mainadu.”

¹⁶ Asin rei da ordi pa tisi Daniel; e botal na koba di lions. Rei fala Daniel: “Bu Deus ku bu ta sirbi sempri, i na librau.”

¹⁷ Un pedra tisidu, i pudu na boka di koba. Rei karimbal ku si anel, ku anel di si fidalgus, pa ka situason di Daniel mudadu.

¹⁸ Rei bai pa si palasiu, i pasa noti sin kume; i ka disa pa e tisi nin un instrumentu di musika si dianti. I ka pudi durmi ki di noti.

¹⁹ I lanta parmaña sedu, i bai kinti-kinti pa koba di lions.

²⁰ Oca ki ciga pertu di koba, i coma Daniel ku vos tristi, i falal: “Daniel, servu di Deus bibu! Nta bu Deus ku bu ta sirbi sempri, i seduba kapas di librau di lions?”

²¹ Daniel kudi i fala rei: “Ñu Rei ta bibu pa sempri!

²² Ña Deus manda si anju ku fica boka di lions pa e ka molostan, pabia N ojadu sin kulpa si dianti. Tambi N ka fasi mal kontra Ñu Rei.”

²³ Rei fika kontenti dimas, i manda tira Daniel na koba. Asin Daniel tiradu na koba; nin un molostu ka ojadu na si kurpu, pabia i fiansa na si Deus.

²⁴ Rei da ordi; e tisi ki omis ku keŝaba di Daniel, e bota elis na koba di lions, elis ku se fijus ku se minjeris. E ka cigaba inda na fundu di koba, lions rabata elis, e kebra-kebra se os.

²⁵ Rei Dariu skirbi pa tudu rasas, nasons, ku jinti di tudu linguas ku mora na tudu mundu, i fala: “N dija bos pas!

²⁶ N na da ordi pa jinti na tudu parti di ña renu pa e medi, e rispita Deus di Daniel. “El i Deus bibu, ku na kontinua pa sempri. Si renu ka pudi kabadu ku el; si puder di manda ka ten kabantada.

²⁷ El i ta libra, i ta salba; i ta fasi milagris ku maravilyas na seu ku tera. I libra Daniel di puder di lions.”

²⁸ Tudu kusa kuri diritu ku Daniel na renu di Dariu, ku di Siru di Persia.