Daniel 11 - BIBLIA - traduson antigu in Krioulo

¹ Na purmeru anu di renansa di Dariu di Media, ami N lanta pa dal koraẑen pa apoial.

Rei di norti, ku sedu Siria, ku rei di sul, ku sedu Ejitu

² “Gosi N na kontau bardadi. I na bin lanta mas tris rei na Persia; kil di kuatru na tene manga di rikesa, mas di ki tudu. Ora ki ngaña puder pabia di si rikesa, i na cuci jinti pa e lanta kontra renu di Gresia.

³ Dipus un rei di gera na lanta, i na rena ku garandi puder, i na fasi kil ki misti.

⁴ Ora ki sta ben firmi, si renu na kebradu, i na rapatidu na kuatru parti, na norti, sul, lesti ku kaida di sol. Reis ku ka sai na si jorson na toma si lugar, ma e ka na ten ki puder ku el i tenba, pabia si renu na rinkadu, i na pasa pa utrus.

⁵ “Rei di sul na torna mas forti, ma un di si ŝefis na torna mas forti di ki el, i na manda ku puder riba di un renu mas garandi.

⁶ Dipus ku anus pasa, ki dus rei na fasi kontratu. Fiju femia di rei di sul na bai kasa ku rei di norti, ma i ka na guarda si forsa. Nin rei nin si jorson ka na kontinua. Minjer na ntregadu, ku kilis ku bin ku el, ku si pape, ku kil ku tomal.

⁷ “Un di familia di ki minjer na lanta na lugar di se pape, i na bai ku tropas, i na yentra na kuartelis di rei di norti, i na geria kontra elis, i na ngaña.

⁸ Tambi i na toma se deusis ku manga di se imaẑens, ku utru kusas di balur di prata ku uru, i na leba elis pa Ejitu. Dipus di puku anus di pas,

⁹ rei di norti na yentra na tera di rei di sul, ma i na rakua pa si tera.

¹⁰ Si fijus na purpara gera, e na junta manga di tropa. Un di ki fijus na bai kinti-kinti, suma korenti di yagu, i na pasa dianti, i leba gera te na kuartel di rei di sul.

¹¹ “Asin, rei di sul na paña raiba, i sai pa geria kontra rei di norti. Kila i na mobilisa manga di tropa, ma ki multidon tudu na ntregadu na mon di rei di sul.

¹² Dipus ki leba ki multidon prezu, korson di rei di sul na inci orgulyu. I na mata manga di milyaris, ma si vitoria ka na tarda,

¹³ pabia rei di norti na riba, i na mobilisa manga di tropa, mas ciu di ki purmeru. Anus mas tardi i na bin kinti-kinti ku manga di tropa, ku tudu se material di gera.

¹⁴ “Na ki tempu manga di jinti na lanta kontra rei di sul. Utru omis brabu, di bu propi pobu, Daniel, e na lanta pa tenta kumpri kualker vison, ma e na kai.

¹⁵ Rei di norti na bai, i na lantanda rampas di kamba, i toma prasa fortifikadu. Tropas di sul ka na pudi nguenta; te ki mas minjoris ka na ten forsa pa firma kontra inimigu.

¹⁶ Ki rei di norti ku bin kontra el na fasi konformi i misti; ningin ka na pudi firma kontra el. I na firmanta si puder na tera bonitu di Judá, i na tenel tudu na si mon.

¹⁷ I na disidi bai ku tudu forsa di si renu, i na fasi akordu ku rei di sul, i na dal un bajuda pa kasamenti, ku na sedu manera di kaba ku renu di sul, ma ki planu ka na bin judal.

¹⁸ Dipus rei di norti na vira si rostu pa teras lungu di Mar Mediteraneu, i na toma manga delis, ma un ŝef di tropas stranjeru na kaba ku si orgulyu, tok i pui ki orgulyu pa i kai riba di si propi kabesa.

¹⁹ Dipus i na riba pa kuartel di si propi tera, ma i na da tapada, i na kai; i ka na bin ojadu mas.

²⁰ “I na bin lanta utru na si lugar ku na manda algin pa i kobra mpustu pa buri rikesa di si renu. Kila tambi ka na tarda, i na muri, ma i ka ku raiba nin na gera.

²¹ “Kil ku na toma si lugar i na sedu omi ku ka bali, ku ka ten diritu di sedu rei. I na bin ketu na tempu ku jinti ka spera, i na toma renu ku nganu.

²² Tropas ku na bin kontra el suma korenti e na pincadu, e na kabadu ku el, suma tambi ŝef di kontratu.

²³ I na fasi kontratu ma i na ngana jinti. I na torna forti, mesmu ku si judaduris sedu puku.

²⁴ I na bai ketu pa lugaris mas riku di pruvinsia na tempu ke ka na spera. I na fasi kil ku si pape ka fasi, nin pape di si pape. I na rapati kusas ki toma na gera pa si jinti. I na fasi planus kontra kuartelis, ma si tempu kurtu ja.

²⁵ “I na mara koraẑen pa bai kontra rei di sul ku manga di tropa. Rei di sul tambi na yentra na gera ku garandi numeru di tropas forti, ma i ka na pudi nguenta pabia di nganu ke fasi kontra el.

²⁶ Kilis ku ta kume si kumida e na tenta kaba ku el. Si tropas na pincadu; manga del na matadu.

²⁷ Ki dus rei na pui sintidu pa fasi mal. E na sinta na un mesa ma e na konta ŋutru mintida. E ka na purbita nada, pabia kabantada na ciga na tempu markadu.

²⁸ Rei di norti na riba pa si tera ku garandi rikesa, ma na si korson i na sta kontra kontratu sagradu, ku sedu lei di Moisés. I na fasi ke ki misti; dipus i na riba pa si tera.

²⁹ “Na tempu markadu i na torna bai kontra sul, ma kusas ka na kuri suma purmeru.

³⁰ Barkus di Kitin na bin kontra el; i na bin pirdi koraẑen. I na riba ku raiba, i gasta ki raiba na riliẑion di judeus; i na fasi ke ki misti. I na mostra si fabur pa kilis ku disvia di lei di Moisés.

³¹ “Si tropas na sai pa manca kau sagradu ku kuartel, e na kaba ku sakrifisiu di kada dia; e na firmanta ki kusa nujenti i meduñu.

³² Ku palabra sabi i na ngaña kilis ku bandona kontratu, ku sedu lei di Moisés, ma kilis ku kunsi se Deus e na fika firmi, e na geria.

³³ Jirus na metadi di pobu e na nsina manga di jinti, ma pa un sertu tempu e na matadu ku spada o ku fugu, e na tomadu prezu o se kusas na furtadu.

³⁴ Ora ke kai, e na risibi un bokadiñu di ajuda, ma manga di jinti na junta ku elis ku palabras falsu.

³⁵ Utru di ki jirus na kai pa e probadu, e purifikadu, pa e bida sin manca, te na kabantada di tempu, pabia i na bin sedu na tempu markadu.

³⁶ “Ki rei di norti na fasi ke ki misti. I na lanta, i na yalsa si kabesa riba di tudu deusis, i na papia kusas fiu kontra ki Deus ku sta riba di deusis. Kusas na kuril diritu, tok tempu di raiba di Deus bin kompleta, pabia kil ku markadu ja i ten ku sedu.

³⁷ I ka na ten rispitu pa deusis di si papes, nin pa ki deus ku minjeris ten amor pa el, nin pa kualker deus, pabia i na yalsa si kabesa riba delis tudu.

³⁸ Na lugar di ki deusis i na rispita deus di kuartel, ku si papes ka kunsiba. I na mostra rispitu pa ki deus, tambi pa uru, prata, pedras di balur ku utru kusas bonitu.

³⁹ I na difindi si kuartelis forti ku ajuda di un deus stranjeru. Kilis ku rikuñisil, i na da elis rispitu, i na pui elis pa e manda riba di manga di jinti, i na rapati elis tera suma premiu.

⁴⁰ “Na tempu di kabantada, rei di sul na geria kontra el. Rei di norti na bai kontra el suma turbada, ku karus, kabalus ku manga di barku. I na yentra na manga di tera, i pasa suma korenti di yagu.

⁴¹ I na yentra tambi na tera bonitu di Judá; manga di tera na kai, ma Edon, Moab ku ŝefis di fijus di Amon e na kapli di si mon.

⁴² Ora ki distindi si mon na manga di tera, Ejitu ka na kapli.

⁴³ I na toma kusas bonitu di uru ku prata ku tudu rikesas di Ejitu. I na ngaña riba di jinti di Libia ku Etiopia,

⁴⁴ ma nobas ki na obi di saida di sol ku di norti na pantandal. I na sai ku garandi raiba pa dana, pa kaba ku manga di jinti.

⁴⁵ I na pui si tendas garandi suma palasiu na metadi di Mar Mediteraneu ku monti sagradu i gloriosu, ma si kabantada na ciga; i ka na ten kin ku na judal.