Daniel 1 - BIBLIA - traduson antigu in Krioulo

Trenamentu di Daniel na Babilonia

¹ Na terseru anu di renansa di Jeoiakin, rei di Judá, Nabukodonosor, rei di Babilonia, bin pa Jerusalen, i tajal.

² SIÑOR ntrega Jeoiakin, rei di Judá, na si mon, ku un parti di kusas sagradu di kasa di Deus. I leba elis pa tera di Babilonia pa baloba di si deus, i pui elis na armazen di rikesa di si deus.

³ Rei fala Aspenaz, ŝef di si funsionarius di palasiu, pa i tisil utru fijus di Israel, di familia di rei ku di utru familias mas altu,

⁴ jovens sin difeitu na kurpu, bonitu, ben nsinadu, ku sibi ciu, lestu pa ntindi, ku sibi vivi na palasiu di rei. I falal tambi pa i nsina elis skirbi ku lei na lingua di Babilonia.

⁵ Rei da ordi pa e dadu un sertu kiñon kada dia di mesmu kumida ku el i ta kumeba, ku di biñu ki ta bibiba. E tenba ku trenadu pa tris anu. Dipus e ten ku bai pursenta dianti di rei.

⁶ Daniel, Ananias, Misael ku Azarias staba na metadi di kilis ku kujidu na fijus di Judá.

⁷ Ŝef di funsionarius pui elis utru nomis. I pui Daniel nomi di Beltesazar; i coma Ananias Sadrak; i coma Misael Mesak; Azarias, i comal Abednegu.

⁸ Daniel pui na si sintidu pa ka i kontamina ku kumida di rei, nin ku ki biñu ki ta bibi. Asin i pidi ŝef di funsionarius lisensa pa ka i kontamina.

⁹ Deus pui ki ŝef di funsionarius pa i mostra fabur ku bondadi pa Daniel,

¹⁰ ma i falal: “N ten medu di Ñu Rei. I el ku da ordi aserka di bo kumida ku bibida. Kuma ki ten ku oja bo rostu mas magru di ki utru jovens di bo idadi? Rei pudi kortan kabesa pabia di bos.”

¹¹ Daniel papia ku ki nkargadu ku ŝef di funsionarius puiba riba del, ku Ananias, Misael ku Azarias, i falal:

¹² “Ten pasensa, spurmentanu des dia, bu danu kusas di orta pa no kume, ku yagu pa bibi.

¹³ Dipus bu ta jubi no kurpu, kuma ki na parsi, ku kurpu di ki jovens ku na kume kumida di rei. Konformi bu oja, asin ku bu na fasi ku bu servus.”

¹⁴ Asin, i konkorda pa spurmenta elis des dia.

¹⁵ Oca ku ki des dia pasa, e parsi mas minjor, tambi mas forti di ki tudu ki utru jovens ku ta kumeba kumida di rei.

¹⁶ Asin, nkargadu maina da elis ki kumida di rei, ku biñu ke dibi di bibi, i ta da elis kusa di orta.

¹⁷ Deus da ki kuatru joven kuñisimentu ku ntindimentu na tudu kultura, ku jiresa, ma i da Daniel kapasidadi di ntindi tudu tipu di vison ku suñu.

¹⁸ Ki tris anu pasa; tempu ciga ku rei marka pa e lebadu si dianti. Ŝef di funsionarius leba elis dianti di Nabukodonosor.

¹⁹ Rei papia ku elis tudu, ma na se metadi i ka oja utru joven suma Daniel, Ananias, Misael ku Azarias. Asin e yentra na tarbaju di rei.

²⁰ Tudu asuntu ku rei punta elis ku ta iziẑi kuñisimentu ku ntindimentu, i ta oja elis des bias mas jiru di ki tudu diviñaduris ku jambakusis ku staba na tudu si renu.

²¹ Daniel staba la te na purmeru anu di rei Siru di Persia.