Aẑeu 2 - BIBLIA - traduson antigu in Krioulo

Gloria di sugundu templu

¹ Na dia 21 di setimu mis, SIÑOR bin papia ku anunsiadur Aẑeu, i falal:

² “Papia ku Zorobabel, fiju di Sealtiel, gubernadur di Judá, ku Josué, fiju di Jeozadak, ŝef di saserdotis, ku restu di pobu, bu punta elis:

³ ‘Kin ku fika na bo metadi ku oja e kasa na si purmeru gloria? Kuma ku bo na ojal gosi? I ka sedu suma un kusa di nada na bo uju, komparadu ku ki utru?

⁴ Ami, SIÑOR, N fala: Zorobabel, bu ten ku sedu forti! Josué, fiju di Jeozadak, ŝef di saserdotis, bu ten ku sedu forti! Abos, tudu pobu di tera, bo ten ku sedu forti, bo tarbaja, pabia N sta ku bos. Ami, SIÑOR ku ten tudu puder, N fala.

⁵ Asin ku N fala na kontratu ku N fasi ku bos oca ku bo sai na Ejitu. Ña Spiritu sta na bo metadi; ka bo medi.’

⁶ “Asin ku SIÑOR ku ten tudu puder fala: ‘Dentru di puku tempu, mas un bias N na bulbuli seu ku tera ku mar ku con seku.

⁷ N na bulbuli tudu nasons; ki algin ku tudu nasons misti i na bin. Ami, SIÑOR ku ten tudu puder, N na inci e kasa ku gloria.

⁸ Prata ku uru, tudu i di mi.’ Asin ku SIÑOR ku ten tudu puder fala.

⁹ ‘Gloria de kasa nobu na sedu mas garandi di ki gloria di ki purmeru. Ami, SIÑOR ku ten tudu puder, N fala kuma N na da pas ne kau.’ ”

¹⁰ Na dia 24 di nonu mis, na sugundu anu di renansa di Dariu, SIÑOR bin papia ku anunsiadur Aẑeu, i falal:

¹¹ “Asin ku SIÑOR ku ten tudu puder fala: Punta saserdotis aserka di lei, bu fala:

¹² ‘Si algin leba karni sagradu na si kamisa, ki kamisa bin toka na kumida, o na gisadu, o na biñu, o na azeiti, o na kualker utru kumida, kila i ta torna sagradu?’ ” Dipus de puntadu, saserdotis ruspundi e fala: “Nau.”

¹³ Aẑeu punta: “Si algin ku staba impuru pabia i toka na difuntu i bin toka na un de kusas, kila ta torna impuru?” Saserdotis e ruspundi e fala: “I ta fika impuru.”

¹⁴ Aẑeu ruspundi: “SIÑOR fala: ‘Asin ku e pobu ku e nason sta ña dianti. Tudu ke na fasi, ku tudu sakrifisiu ke na pursenta la, i impuru.

¹⁵ “‘Gosi ja, bo jubi e kusa diritu, disna di aos pa dianti. Bo pensa na ki tempu antis di bo pui un pedra riba di utru na kasa di SIÑOR.

¹⁶ Algin ta baiba pa un monti di vinti midida di miju, i ta oja son des; i ta bai pa kau di biñu pa tira sinkuenta litru, i ta oja son vinti.

¹⁷ N kastiga bos na tudu tarbaju di bo mon, ku kemadura, ku ferús, ku cuba di jelu, ma na bo metadi i ka tenba kin ku na riba pa mi.’ Asin ku SIÑOR fala.

¹⁸ ‘Disna di aos pa dianti, ku sedu dia 24 di nonu mis, bo pensa na dia ku alisersu di kasa di SIÑOR kabantadu; N na roga bos pa bo pensa diritu ne kusas.

¹⁹ Miju kaba ja na bemba; pe di uva ka da si fruta, nin pe di figu, nin pe di roman, nin olivera. Ma disna di aos N na bensua bos.’ ”

Purmesa pa Zorobabel

²⁰ SIÑOR bin papia ku Aẑeu sugundu bias na dia 24 di mis, i falal:

²¹ “Papia ku Zorobabel, gubernadur di Judá, bu falal kuma N na bulbuli seu ku tera;

²² N na bati tronu di renus, N dana forsa di renus di nasons; N na kaba ku karus ku kilis ku ta sinta nelis; kabalus ku kilis ku ta monta nelis e na kai, kada un pa spada di si ermon.

²³ “Ami, SIÑOR ku ten tudu puder, N fala kuma, na ki dia N na tomau, abo Zorobabel, fiju di Sealtiel, ña servu, N na fasiu suma anel di karimbu, pabia N kujiu pa bu guberna na ña nomi. Asin ku ami, SIÑOR ku ten tudu puder, N fala.”