Atus 9 - BIBLIA - traduson antigu in Krioulo

Saulu konverti

¹ Saulu ka para inda ameasa mortu pa disipulus di Siñor. I bai pa ŝef di saserdotis,

² i pidil kartas pa leba pa kasas di juntamentu na Damasku. Asin, si i bai kontra ku utrus de nobu kamiñu, omi o minjer, i ta leba elis presu pa Jerusalen.

³ Ocal na kamiñu, pertu di Damasku, di repenti lus di seu lampra, i dal volta.

⁴ I kai na con, i obi un vos ku puntal: “Saulu, Saulu, ke ku manda bu na pirsigin?”

⁵ I punta: “Abo i kin, Siñor?” I ruspundil: “Ami i Jesus, kil ku bu na pirsigi.

⁶ Lanta, bu yentra na prasa. La bu na kontadu ke ku bu dibi di fasi.”

⁷ Omis ku na kumpañaba Saulu na bias e para spantadu, e obi vos ma e ka oja ningin.

⁸ Saulu lanta na con, i yabri uju ma i ka oja nada. E pegal na mon, e lebal pa Damasku.

⁹ I fika la tris dia sin oja, sin kume, sin bibi.

¹⁰ I tenba un krenti na Damasku ku comadu Ananias. Siñor falal na vison: “Ananias!” I ruspundi: “Alin li, Siñor.”

¹¹ Siñor falal: “Lanta, bu bai pa Rua Direita, bu punta na kasa di Judas pa un omi di Tarsu comadu Saulu, pabia i sta la, i na ora.

¹² I teneba un vison ki oja un omi ku coma Ananias yentra, i pui mon riba del pa i pudi oja mas.”

¹³ Ananias ruspundi i falal: “Siñor, N obi na boka di manga di jinti aserka de omi li, kantu mal ki fasi bu pobu na Jerusalen.

¹⁴ Ali i ten otridadi di ŝefis di saserdoti pa prindi tudu ku na coma bu nomi.”

¹⁵ Siñor falal: “Bai, pabia e omi li i un servu ku N kuji pa i leba ña nomi dianti di jintius, ku reis, ku pobu di Israel.

¹⁶ Ami propi N na mostral kantu kusas ki ten ku sufri pabia di ña nomi.”

¹⁷ Ananias bai, i yentra na kasa, i pul mon, i falal: “Ermon Saulu, Siñor Jesus, ku bu oja na kamiñu oca ku bu na bin, i mandan pa bu pudi torna oja, bu inci di Spiritu Santu.”

¹⁸ Na ki ora i kai na si uju kusas suma skama; i torna oja mas, i lanta i batisadu.

¹⁹ Oca ki kume, i fika mas forti. Dipus i fika puku dia ku krentis ku staba na Damasku.

Kil ku ta pirsigiba pirsigidu

²⁰ I kumsa janan na konta na kasa di juntamentu kuma Jesus i Fiju di Deus.

²¹ Tudu kilis ku na obilba ta dimira, e punta: “Nta i ka e omi li ku ta pirsigi kilis ku ta coma e nomi na Jerusalen? I es ki bin li pa el, pa leba elis prezu pa ŝefis di saserdoti.”

²² Saulu torna kada bias mas forti; i ta probaba kuma Jesus i Kristu, i ta kunfundi judeus ku mora na Damasku.

²³ Oca ki pasa manga di dia, judeus filanta pa matal,

²⁴ ma Saulu bin sibi di se planus. Suma ke na guardaba porton di prasa di dia ku di noti, pa pudi tiral vida,

²⁵ krentis toma Saulu di noti, e pul na un balai, e riantal na un buraku na mura.

Saulu na Jerusalen

²⁶ Oca ku Saulu ciga na Jerusalen, i mistiba junta ku krentis, ma tudu tenba medu del. E ka fia kuma i sedu krenti.

²⁷ Barnabé tomal, i lebal pa apostolus, i splika elis manera ki oja Siñor na kamiñu, kuma ku Siñor fala ku el, tambi kuma ki papia ku koraẑen na Damasku, na nomi di Jesus.

²⁸ Asin i fika ku elis, i yanda a vontadi na Jerusalen,

²⁹ i na papia ku koraẑen na nomi di Jesus. I ta fala, i ta diskutiba tambi ku judeus ku ta papia gregu, ma elis e na buskaba matal.

³⁰ Ermons bin sibi, e kumpañal te na Sesareia, e mandal pa Tarsu.

³¹ Asin igreẑa na tudu Judeia, Galileia ku Samaria teneba un tempu di pas. Spiritu Santu fortifika igreẑa, i dal animu. Numeru di krentis na buri; e na vivi ku rispitu pa Siñor.

Kura di Eneias

³² Oca ku Pedru na visita manga di lugar, i ciga tambi nunde pobu di Deus ku moraba na Lida.

³³ I oja la un omi ku comadu Eneias ku tenba oitu anu na kama pabia i teneba duensa di molisimentu.

³⁴ Pedru falal: “Eneias, Jesus Kristu na kurau. Lanta, bu kumpu bu kama.” I lanta janan.

³⁵ Tudu kilis ku mora na Lida ku Sarona e ojal, e seta Siñor.

Tabita lanta di mortu

³⁶ I staba na Jope un minjer krenti ku comadu Tabita. (Si nomi na lingua gregu i Dorkas, ku signifika gazela.) I pasa si vida na fasi ben; i ta judaba pobris.

³⁷ Na ki dias i bin duensi, i muri. Oca ke laba si kurpu, e pul na un kuartu na purmeru andar.

³⁸ Suma ku Lida fika pertu di Jope, krentis obi kuma Pedru staba la; e manda dus omi pa e pidil pa i bai nunde elis dipresa.

³⁹ Pedru lanta, i bai ku elis. Oca ki ciga, e subi ku el, e lebal na ki kuartu. Tudu viuvas rodial, e na cora, e na mostra kamisas ku utru ropa ku Dorkas fasiba oca ki staba ku elis.

⁴⁰ Pedru pui jinti pa e sai tudu na kuartu. I finka juju, i ora, i rabida pa difuntu, i falal: “Tabita, lanta!” Minjer yabri uju, i oja Pedru, i lanta, i sinta.

⁴¹ Pedru dal mon, i lantandal. I coma krentis, tudu ku ki viuvas, i mostra elis el bibu.

⁴² E noba laga pa tudu Jope. Manga di jinti seta Siñor.

⁴³ Pedru fika la manga di dia na kasa di un omi comadu Simon ku ta tarbaja ku kuru.