Atus 8 - BIBLIA - traduson antigu in Krioulo

¹ Saulu kontenti ku si mortu. Na ki dia i lanta garandi pirsigison kontra igreẑa na Jerusalen. Tudu krentis, menus apostolus, e pajigadu na partis di Judeia ku Samaria.

Pirsigison na igreẑa

² Utru omis di Deus bai ntera Stevon, e coral ciu.

³ Saulu mistiba kaba ku igreẑa. I ta yentraba na kasas, i rasta omis ku minjeris pa fica elis na kalabus.

Filip na Samaria

⁴ Kilis ku pajigadu e baiba pa tudu parti, e na konta palabra.

⁵ Filip bai pa prasa di Samaria, i na kontaba elis di Kristu.

⁶ Oca ku multidon di jinti obi Filip, e oja milagris ki na fasi, elis tudu e para atenson na kil ki na fala,

⁷ pabia spiritu mau sai na manga di jinti ku garandi gritu; i kuradu manga di jinti ku teneba duensa di molisimentu, tudu ku mankus.

⁸ I tenba garandi alegria na ki prasa.

Simon jambakus

⁹ I staba la un omi comadu Simon ku tarda ta fasi arti di jambakus, i na nganaba jinti di Samaria, i ta fala kuma el i algin garandi.

¹⁰ Tudu jinti ta sukutal diritu, jinti altu ku koitadis; e ta fala kuma es algin i puder di Deus ku ta comadu Puder Garandi.

¹¹ E ta sukutal pabia i tarda ki na ngana elis ku arti di jambakus.

¹² Oca ke seta palabra di Filip ku konta elis Bon Noba di renu di Deus, ku nomi di Jesus Kristu, omis ku minjeris tudu batisa.

¹³ Simon propi seta Jesus tambi, i batisadu. I fika juntu ku Filip. Ora ki oja milagris ku kusas garandi ki fasi, i ta dimira dimas.

¹⁴ Apostolus ku staba na Jerusalen obi kuma jinti di Samaria seta palabra di Deus. E manda elis Pedru ku Jon.

¹⁵ Oca e ciga, e ora pa elis pa e pudi risibi Spiritu Santu.

¹⁶ Spiritu ka riaba inda riba di nin un son delis; e batisaduba son na nomi di Siñor Jesus.

¹⁷ Asin apostolus pui mon riba delis; e risibi Spiritu Santu.

¹⁸ Simon oja kuma, si apostolus pui mon riba di algin, i ta risibi Spiritu Santu. I mostra elis diñeru,

¹⁹ i fala: “Dan tambi e puder, pa ora ku N pui mon riba di algin, si dunu ta risibi Spiritu Santu.”

²⁰ Pedru falal: “Bai ku bu diñeru pa kondenason, pabia bu kuda kuma puder di Deus ta kumpradu ku diñeru.

²¹ Bu ka ten diritu di toma parti na no tarbaju, pabia bu korson ka sta limpu dianti di Deus.

²² Ripindi de mal ku bu fasi, bu pidi Deus pa i purdau e pensamentu ku sta na bo,

²³ pabia N oja kuma bu korson inci ku kusas malgos; bu sta prezu na pekadu.”

²⁴ Simon ruspundi i fala elis: “Bo pidi Siñor pa mi, pa ka nada di kil ku bo fala bin riba di mi.”

²⁵ Pedru ku Jon kaba testifika, e konta palabra di Siñor, e riba pa Jerusalen. Na kamiñu e konta Bon Noba na manga di tabanka di jinti di Samaria.

Filip ku omi di Etiopia

²⁶ Un dia un anju di Siñor fala Filip: “Lanta, bu bai pa ladu di sul, pa kamiñu ku ta bai di Jerusalen pa Gaza, ki kamiñu di lala.”

²⁷ Filip lanta, i bai. I bin oja un omi di Etiopia, ku seduba eunuku, funsionariu altu, nkargadu di tudu rikesa di Kandasi, raiña di Etiopia. I baiba Jerusalen pa adora Deus.

²⁸ Filip ojal oca ki na riba, sintadu na si karu; i na lei libru di anunsiadur Isaias.

²⁹ Spiritu fala Filip: “Ciga, bu bai pertu ki karu.”

³⁰ Filip kuri, i obil i na lei libru di anunsiadur Isaias; i puntal si i ntindi ke ki na lei.

³¹ I ruspundi: “Kuma ku N pudi ntindi si algin ka splikan?” Asin i pidi Filip pa i subi, i sinta juntu ku el.

³² Parti di Skritura ki na leiba i es: “I lebadu suma karnel pa matadur. Manera ku karnelsiñu ta mudu dianti di kil ku na tiskial, asin tambi ki fika kaladu.

³³ I lebsidu, i ka fasidu justisa. Ningin ka na pudi konta di si futuru jorson, pabia si vida tiradu na tera.”

³⁴ Funsionariu fala Filip: “Kontan di fabur, kin ku anunsiadur na fala del. I na fala di si kabesa o di utru algin?”

³⁵ Filip toma palabra, i kumsa na ki kau ki lei, i kontal Bon Noba di Jesus.

³⁶ Oca ke na pasa pertu di un lugar ku teneba yagu, funsionariu fala: “Ali yagu. Ke ku na tujin pa N batisadu?” [

³⁷ Filip falal: “I pudi sedu si bu fia ku tudu korson.” I ruspundi Filip i falal: “N fia kuma Jesus Kristu i Fiju di Deus.”]

³⁸ I manda para karu, e ria na yagu, elis dus, Filip ku funsionariu; Filip batisal.

³⁹ Oca ke sai na yagu, Spiritu di Siñor rabata Filip. Funsionariu ka ojal mas. I kontinua si kamiñu, kontenti.

⁴⁰ Filip parsi na Azotu, i pasa dianti. Suma ki na bai, i na konta Bon Noba na tudu tabanka tok i ciga na Sesareia.