Atus 7 - BIBLIA - traduson antigu in Krioulo

¹ Ŝef di saserdotis puntal: “E kusas i bardadi?”

² Stevon ruspundi: “Ermons ku papes, bo sukuta. Deus di gloria parsi dianti di no pape Abraon oca ki staba inda na Mesopotamia, antis di i bin mora na Aran,

³ i falal: ‘Sai na bu tera, na metadi di bu parentis, bu bai pa un tera ku N na mostrau.’

⁴ “Abraon sai na tera di Kaldeia, i bai mora na Aran. Dipus ku si pape muri, Deus tisil di la pa e tera nunde ku bo mora gosi.

⁵ I ka dal yardansa ne tera, nin largura di pe, ma i fala kuma i na bin dal el, pa i sedu dipus pa si jorson. Ma i ka teneba inda fiju.

⁶ Deus falal asin: ‘Bu jorson na mora na un tera strañu suma ospri. E na pudu na katiberasku; e na maltratadu pa kuatrusentus anu,

⁷ ma N na julga pobu ku pui elis na katiberasku. Dipus e na sai la, e na adoran ne lugar.’ Asin ku Deus fala.

⁸ I fasi kontratu ku el, i dal sinal di sirkunsison. Oca ku Abraon padi Isak, i sirkunsidal na oitavu dia. Isak fasi mesmu kusa ku Jakó; Jakó tambi fasil ku no dozi pape di antigu.

⁹ “Kil no papes, suma ke tenba nveẑa di se ermon José, e bindil; i lebadu pa Ejitu, ma Deus staba ku el,

¹⁰ i libral di tudu si kansera, i dal jiresa, ku fabur na uju di Faraó, rei di Ejitu, ku pul gubernadur pa i manda na Ejitu ku tudu si palasiu.

¹¹ “I kai fomi na tudu Ejitu ku Kanaan, ku tisi garandi kansera. No papes ka ta ojaba nada di kume.

¹² Jakó obi kuma kumida ten na Ejitu, i manda no papes la purmeru bias.

¹³ Na sugundu bias José fasi si ermons raparal. Faraó bin sibi di si familia.

¹⁴ José manda coma si pape Jakó ku tudu si parentis, ku sedu setenta i sinku jinti.

¹⁵ Jakó bai pa Ejitu, i muri la, tudu ku no papes.

¹⁶ Se kurpus lebadu pa Siken, e pudu na koba ku Abraon kumpra pa un sertu diñeru na mon di fijus di Emor na Siken.

¹⁷ “Oca ku tempu pertu pa Deus fasi ke ki falaba Abraon, numeru di no pobu na Ejitu buriba ciu.

¹⁸ I bin lanta utru rei ku ka kunsiba José.

¹⁹ Ki rei ngana no jinti, i maltrata elis. I ta obriga elis bandona fijus ku kumsa padidu, pa ka e ciu.

²⁰ Na ki tempu Moisés padidu. I bonitu ba dimas; i sukundidu tris mis na kasa di si pape.

²¹ Dipus ki tiradu, fiju femia di Faraó tomal, i krial suma si fiju propi.

²² Moisés dadu tudu nsinamentu suma jinti di Ejitu. I tenba puder na si palabra ku kil ki na fasi.

²³ “Oca ki kompleta korenta anu di idadi, i sinti na si korson pa bai visita si ermons, pobu di Israel.

²⁴ I bai oja un delis na maltratadu. I difindi pa el, i vinga, i mata ki omi di Ejitu.

²⁵ I kuda kuma si ermons na ntindi kuma na si mon Deus tenba ku da elis liberdadi, ma elis e ka ntindi.

²⁶ Sol mansi, i oja dus israelita na geria; i misti pui pas na se metadi. I fala elis: ‘Omis, bo sedu ermons. Ke ku manda bo na maltrata ŋutru?’

²⁷ Kil ku tenba kulpa pincal, i puntal: ‘Kin ku pou suma ŝef o juis riba di nos?

²⁸ O bu misti matan suma ku bu mata ejipsiu aonti?’

²⁹ Moisés obi ki palabra, i kuri, i bai sedu ospri na tera di Midian, nunde ki padi nel dus fiju.

³⁰ “Dipus ki pasa mas korenta anu, un anju parsi si dianti na lala di Monti Sinai, na un lingua di fugu ku na yardi na un arvurisiñu.

³¹ Oca ku Moisés ojal, i dimira ku ke ki na oja. I ciga pertu pa jubi diritu. I obi vos di Siñor ku falal:

³² ‘Ami i Deus di bu papes, Deus di Abraon, Isak ku Jakó.’ Moisés fika i na tirmi, i ka osa jubi.

³³ Siñor falal: ‘Tira sapatu na bu pe, pabia lugar ku bu sikidu nel i tera sagradu.

³⁴ Na bardadi N oja kansera di ña pobu na Ejitu; N obi kuma ke na jimi, N ria pa libra elis. Agora bin pa N mandau na Ejitu.’

³⁵ “I e Moisés ke nega, e puntal: ‘Kin ku pou suma ŝef o juis?’ I el ku Deus manda suma ŝef i libertadur, kontra i papia na boka di anju ku parsi na ki arvurisiñu.

³⁶ I e Moisés ku tira pobu fora, ku fasi milagris ku sinal na tera di Ejitu, na Mar Burmeju, tambi na lala, pa korenta anu.

³⁷ I e mesmu Moisés ku fala pobu di Israel: ‘Deus na lantanda bos un anunsiadur suma mi na metadi di bo propi pobu.’

³⁸ Oca e staba tudu juntadu na lala, i e Moisés ku staba ku no papes, tudu ku anju ku papia ku el na Monti Sinai; i risibi palabra di vida pa i pudi pasantal pa nos.

³⁹ “Ma no papes ka mistiba obdisil, e negal; na se korson e riba pa Ejitu.

⁴⁰ E fala Aron: ‘Kumpunu deusis ku na bai no dianti, pabia e Moisés ku tiranu na tera di Ejitu, no ka sibi ke ku kontisi ku el.’

⁴¹ Na ki dias e fasi idulu na forma di bakasiñu, e tisi sakrifisiu pa el, e fasi festa pa da rispitu pa un kusa ke kumpu ku se mon.

⁴² Deus lunjusi delis, i bandona elis pa e adora astrus di seu, suma ki sta skritu na libru di anunsiaduris: ‘Abos pobu di Israel, i ka pa mi ku bo tisi limarias, bo ronia ku elis pa korenta anu na lala.

⁴³ Bo karga tenda di Molok, ku strela di bo deus Renfan, ku sedu idulus ku bo kumpu pa adora. E ku manda N na serka bos pa bo fika na utru ladu di Babilonia.’

⁴⁴ “No papes di antigu teneba tenda sagradu ku elis na lala, suma ku Deus manda, oca ki fala Moisés pa kumpul konformi planta ki oja.

⁴⁵ Mas tardi no papes di antigu e tomal na mon di se papes, e lebal ku elis oca e bai ku Josué pa toma tera di ki nasons ku Deus serka se dianti. Tenda fika la te na tempu di Davi.

⁴⁶ Davi oja fabur di Deus, i pidi pa i disal pa i fasi morada pa Deus di Jakó.

⁴⁷ Kontudu i Salomon ku bin kumpu ki kasa.

⁴⁸ “Ma Deus ku sta riba di tudu i ka ta mora na kasa ku omi kumpu, suma ku anunsiadur skirbi kuma:

⁴⁹ Siñor fala: ‘Seu i ña tronu, tera i tapeti pa ña pe. Kal koldadi kasa ku bo na kumpun? O kal kau ki di ña diskansu?

⁵⁰ O i ka ña mon ku kumpu tudu e kusas?’

⁵¹ “Abos i omis ku risu garganti, korson risu tambi, ku oreja ku ka ta obi! Abos sempri bo ta luta kontra Spiritu Santu; suma ku bo papes fasi, asin tambi ku bo sedu.

⁵² Kal anunsiadur ku bo papes ka pirsigi? Tok e mata kilis ku jumna konta kuma ki Algin Justu na bin, kil ku bo falsia, bo mata ne dias.

⁵³ Abos ku risibi lei ku anjus ntrega, bo ka obdisil!”

Mortu di Stevon

⁵⁴ Oca ke obi ki palabra, e raiba na se korson; e ñeme dinti kontra Stevon.

⁵⁵ Ma el, incidu di Spiritu Santu, i pui si uju na seu, i oja gloria di Deus, ku Jesus sikidu na mon direita di Deus.

⁵⁶ I fala: “Jubi, N oja seu yabri, ku Fiju di omi sikidu na mon direita di Deus!”

⁵⁷ Ki ora e grita ku forsa, e tapa oreja, e junta, e kuri pa el,

⁵⁸ e fercal fora di prasa, e dal ku pedras. Tustumuñas ditanda se ropa na pe di un joven ku comadu Saulu.

⁵⁹ Suma ke na dalba ku pedra, Stevon ora, i fala: “Siñor Jesus, risibi ña spiritu.”

⁶⁰ Dipus i kai ku juju, i grita ku vos forti: “Siñor, ka bu guarda e pekadu kontra elis.” Oca ki fala asin, i diskansa.