Atus 6 - BIBLIA - traduson antigu in Krioulo

Seti diákunu (o judadur) kujidu

¹ Na ki dias, suma ku numeru di krentis na buri, ki judeus ku ta papia gregu e na keŝaba kontra kilis ku ta papia lingua di judeus, pabia se viuvas ta diskisidu na ora di rapati kumida, suma ki ta fasidu kada dia.

² Ki dozi apostolu junta krentis tudu, e fala elis: “I ka bon pa no disa konta palabra di Deus pa no bin sirbi mesa.

³ Ermons, bo kuji na bo metadi seti omi di fiansa, incidu di Spiritu Santu ku jiresa, pa no ntrega elis e garandi tarbaju,

⁴ ma anos no ta pega tesu na orason ku tarbaju di konta palabra.”

⁵ Tudu fika kontenti ku e ideia. E kuji Stevon, omi incidu di fe ku Spiritu Santu, Filip, Prókoru, Nikanor, Timon, Parmenas ku Nikolau di Antiokia ku setaba riliẑion di judeus.

⁶ E tisi elis dianti di apostolus. Apostolus pui mon riba delis, e ora.

⁷ Asin palabra di Deus na spajaba kada bias mas. Numeru di krentis na buri ciu na Jerusalen. Manga di saserdoti seta fe di Jesus.

Stevon prindidu

⁸ Stevon, ku tenba garandi fe ku puder di Deus, i na fasiba milagris ku garandi sinal na metadi di pobu.

⁹ I lanta utru omis ku seduba di kasa di juntamentu ku ta comadu di Libertus. Ki omis seduba di Sireni, Alesandria, Silísia ku Asia. E diskuti ku Stevon.

¹⁰ Spiritu da Stevon garandi jiresa ke ka pudi nguenta pa diskuti ku el.

¹¹ E paga utru omis pa e fala kuma e obi Stevon fala palabra mau kontra Moisés, tambi kontra Deus.

¹² E cuci pobu ku garandis ku pursoris di lei. E rabata Stevon, e lebal na Konseliu.

¹³ E pursenta falsu tustumuñas ku fala: “Es omi li i ka ta para fala palabras kontra e lugar sagradu, kontra lei tambi.

¹⁴ No obil i fala kuma, e Jesus di Nazaré ten ku dana e lugar li; i na torkia kustumus ku Moisés danu.”

¹⁵ Tudu ki jinti ku staba sintadu na Konseliu e pui se uju na Stevon, e oja si rostu suma rostu di un anju.