Atus 5 - BIBLIA - traduson antigu in Krioulo

Ananias ku Safira

¹ I tenba utru omi comadu Ananias, ku Safira si minjer; e bindi un terenu.

² I rapati diñeru, i guarda utru. Si minjer tambi sibi. I leba ki utru parti, i pul dianti di apostolus.

³ Pedru puntal: “Ananias, kuma ku bu disa Satanas inci bu korson tok bu konta mintida pa Spiritu Santu, bu guarda parti di pres di terenu?

⁴ Antis di bu bindilba, i di bo; dipus ku bu bindil, diñeru staba na bu mon. Ke ku pou pa bu kuda fasi e kusa? Bu ka konta mintida pa omis ma pa Deus.”

⁵ Ananias kaba obi ki palabra, i kai, i muri. Garandi medu bin riba di tudu kilis ku obi ki kusa.

⁶ Rapasis lanta, e kubri kurpu, e lebal pa fora, e bai nteral.

⁷ Oca ki pasa kuas tris ora ku omi muri, si minjer ciga tambi, ma i ka sibi di nada ku kontisi.

⁸ Pedru falal: “Kontan de, bo bindi ki terenu pa e pres?” I ruspundi: “I asin ki bindidu.”

⁹ Pedru rabida i puntal: “Ke ku manda bo filanta pa proba Spiritu di Siñor? Kilis ku bai ntera bu omi, ali se pe ciga na porta; e na lebau tambi.”

¹⁰ Ki ora i kai dianti di Pedru, i muri. Rapasis yentra, e ojal mortu, e lebal, e ntera lungu di si omi.

¹¹ Tudu igreẑa ku tudu kilis ku obi e kusas e fika ku garandi medu.

Manga di milagri

¹² Apostolus fasi manga di sinal ku milagri na metadi di pobu. E filantaba pa ba ta junta na baranda di Salomon.

¹³ Kin ku ka seduba krenti ka ta osaba junta ku elis, ma tudu jinti ta falaba ben delis.

¹⁴ Omis ku minjeris na setaba Siñor; numeru na buri kada bias mas.

¹⁵ Asin jinti ta lebaba duentis pa rua; e ta ditandadu na kama o na stera, pa ora ku Pedru na pasa, nin si i pa si sombra kubri utrus.

¹⁶ Tambi na utru prasas pertu i ta binba manga di jinti pa Jerusalen; e ta tisi duentis, ku kilis ku spiritu mau na kansaba. E ta kuradu, elis tudu.

Apostolus pirsigidu

¹⁷ Ŝef di saserdotis ku tudu si kumpañeris (kilis di grupu riliẑiosu di saduseus) e tenba nveẑa, e lanta,

¹⁸ e paña apostolus, e pui elis na kalabus di pobu,

¹⁹ ma di noti un anju di Siñor bin yabri porta di kalabus, i tira elis fora, i fala:

²⁰ “Bo bai, bo yentra na kasa di Deus, bo splika pobu diritu aserka de nobu vida.”

²¹ Apostolus obi ke ku anju fala, e bai parmaña sedu na kasa di Deus, e kumsa na nsina jinti. Oca ku ŝef di saserdotis ciga ku si kumpañeris, e manda coma tudu garandis di pobu di Israel pa un juntamentu di Konseliu. E manda guardas pa e bai tisi apostolus na kalabus.

²² E bai, e ka oja elis na kalabus; e riba, e bai konta elis,

²³ e fala: “Na bardadi no oja kalabus ficadu suguru, guardas staba sikidu na porta, ma oca ku no yabri porta, ningin ka staba dentru.”

²⁴ Ki ora ku kapiton di kasa di Deus ku ŝefis di saserdoti obi ki palabra, e fika e na punta: “Es i ke ku kontisi ku e jinti? Ke ku na bin sedu gora?”

²⁵ Dipus un omi ciga, i fala elis: “Ki omis ku bo pui na kalabus, ala elis sikidu na kasa di Deus, e na nsina pobu.”

²⁶ Ki ora kapiton bai ku guardas, e bai tisi elis, ma i ka ku forsa, pabia e mediba, pa ka pobu da elis ku pedra.

²⁷ E tisi elis, e pursenta dianti di Konseliu. Ŝef di saserdotis kumsa na punta elis, i fala:

²⁸ “Nta no ka tujiba bos pa ka bo nsina na ki nomi? Ma bo inci Jerusalen ku bo nsinamentu. Tambi bo misti kulpanu di mortu di ki omi.”

²⁹ Pedru ku utru apostolus fala elis: “I mas minjor obdisi Deus di ki obdisi omis.

³⁰ Deus di no papes i lantanda Jesus, kil ku bo mata, bo pindra na krus di madera.

³¹ Deus yalsal pa i sta na si mon direita, pa i sedu Ŝef ku Salbadur, pa da Israel manera di ripindi, pa se pekadu purdadu.

³² Anos no sedu tustumuñas de kusas, suma tambi Spiritu Santu ku Deus da pa kilis ku obdisil.”

Konsiju di Gamaliel

³³ Oca ke obi ki palabra, e paña raiba; e misti mata elis,

³⁴ ma un fariseu ku comadu Gamaliel, dutur di lei, ku tudu jinti rispita, i lanta na metadi di Konseliu, i manda pa tira apostolus fora un bokadu.

³⁵ I fala: “Omis di Israel, bo toma sintidu ku kil ku bo misti fasi e omis,

³⁶ pabia i ten un tempu ku un omi lanta ku comadu Teudas, i fala kuma el i algin garandi. Serka di kuatrusentus omi junta ku el, ma dipus, i matadu; tudu kilis ku na sigilba pajiga; i fika na nada.

³⁷ Dipus del i lanta utru omi di nomi di Judas, di Galileia, na tempu di resensiamentu; i leba manga delis si tras, ma kila matadu tambi; kilis ku na sigilba pajiga tudu.

³⁸ Agora N na fala bos, bo disa e omis, bo larga elis, pabia si se pensamentu ku se tarbaju i di omi, i na pajiga,

³⁹ ma si i di Deus, bo ka na pudi kaba ku el, pa ka i bin sedu kuma bo na geria kontra Deus.”

⁴⁰ E seta konsiju di Gamaliel, e coma apostolus, e manda suta elis; e da elis ordi pa ka e fala mas na nomi di Jesus. Dipus e largadu.

⁴¹ E sai na metadi di Konseliu, kontenti dimas pabia Deus oja elis mersidur di sufri borgoña pabia di nomi di Jesus.

⁴² E ka ta kansaba di bai tudu dia na kasa di Deus, ku kada kasa, pa nsina ku konta Bon Noba kuma Jesus i Mesias.