Atus 4 - BIBLIA - traduson antigu in Krioulo

Pedru ku Jon dianti di garandis

¹ Oca Pedru ku Jon na falaba ku pobu, saserdotis ku kapiton di kasa di Deus ku utru saduseus e bai pa elis,

² e fika ku kasabi suma ke na nsina pobu, e na konta elis di Jesus, ku lantandamentu di mortu.

³ E paña elis, e fica na kalabus te utru dia, suma i seduba ja tardi,

⁴ ma manga di kilis ku obiba ki palabra e seta Jesus. Numeru di omis krenti i cigaba ja pertu di sinku mil.

⁵ Oca sol mansi, ŝefis ku garandis ku pursoris di lei e junta na Jerusalen.

⁶ Anás, ŝef di saserdotis, staba la, ku Kaifás, Jon, Alŝandri, ku tudu kilis ku seduba familia di ŝef di saserdotis.

⁷ E pui apostolus pa e firma se dianti, e punta elis: “Ku kal puder o na nomi di kin ku bo fasi es?”

⁸ Pedru, incidu ku Spiritu Santu, fala elis: “Otridadis di pobu, ku abos garandis,

⁹ suma ku aos no na puntadu pabia di un ben ku fasidu pa un omi duenti, manera ki sedu kuradu,

¹⁰ i bon pa bo sibi, abos tudu ku tudu pobu di Israel, kuma e omi sta sikidu, san bo dianti, na nomi di Jesus Kristu di Nazaré, kil ku bo krusifika, ku Deus lantanda di mortu.

¹¹ El i ki pedra ku abos pedrerus bo nega, ku bin sedu purmeru pedra di kantu.

¹² I ka ten nin utru algin ku pudi salba, pabia ne mundu li, Deus ka da jinti nin utru nomi ku pudi salbanu.”

¹³ Oca e oja koraẑen di Pedru ku Jon, e ntindi kuma e seduba omis simplis ku ka teneba skola ciu, e dimira, e rapara kuma e ta staba juntu ku Jesus.

¹⁴ Suma ke oja tambi ki omi ku kuradu sikidu juntu ku elis, e ka teneba nada ke pudi fala.

¹⁵ Asin e manda elis pa e sai fora di sala, e papia entri elis,

¹⁶ e punta: “Ke ku no na fasi ku e omis? Tudu jinti di Jerusalen sibi kuma e fasi un garandi milagri. No ka pudi negal.

¹⁷ Ma pa kusa ka spaja mas di ki asin na metadi di pobu, no ameasa elis pa ka e torna fala mas ku ningin aserka de omi.”

¹⁸ E coma elis, e da elis ordi pa ka e torna fala mas, nin pa ka e nsina jinti na nomi di Jesus.

¹⁹ Pedru ku Jon ruspundi e fala elis: “Bo kuda ben si i diritu dianti di Deus pa no obdisi bos mas di ki Deus,

²⁰ pabia anos no ka pudi disa di fala kusa ku no oja, ku no obi.”

²¹ E torna ameasa elis mas. Suma ke ka oja manera di kastiga elis, e larga elis, pabia tudu pobu na ngaba Deus pa kusa ku kontisi,

²² manera ku ki omi ku kuradu ku milagri teneba mas di korenta anu.

Orason di krentis

²³ Logu ke largadu, e bai pa se kumpañeris, e konta tudu ku ŝefis di saserdoti ku garandis fala elis.

²⁴ Oca ke obil, e yalsa vos tudu juntu pa Deus, e fala: “Siñor, i abo ku fasi seu ku tera ku mar, ku tudu ku sta nelis.

²⁵ Bu papia ku Spiritu Santu na boka di bu servu Davi, no pape; i punta: ‘Ke ku manda nasons lanta ku baruju, pobu na fasi se planu amonton?

²⁶ Reis di tera lanta, otridadis junta, e pui na un son kontra Siñor, kontra si Unjidu.’

²⁷ “Na bardadi Erodis ku Ponsiu Pilatus, ku jintius ku pobu di Israel, e junta ne prasa kontra bu santu servu Jesus, kil ku bu unji.

²⁸ E lanta pa fasi tudu ku bu puder ku bu vontadi markaba ja pa i kontisi.

²⁹ Agora Siñor, obi kuma ke na njata; juda bu servus pa e fala bu palabra ku tudu koraẑen,

³⁰ bu distindi bu mon pa kura, pa sinal ku milagri pudi fasidu na nomi di bu santu servu Jesus.”

³¹ Dipus ke ora, lugar ke juntaba nel tirmi. Elis tudu e incidu ku Spiritu Santu, e kumsa na konta palabra di Deus ku koraẑen.

Krentis rapati kusas ke tene

³² Ki manga di krenti teneba un pensamentu ku un korson. Ningin ka ta falaba: “E kusa li i di mi.” Tudu se kusas, e ta rapatil ku ŋutru.

³³ Apostolus na testifikaba ku garandi puder di manera ku Siñor Jesus lanta di mortu. Garandi fabur di Deus staba riba delis tudu.

³⁴ I ka tenba nin un koitadi na se metadi, pabia tudu kilis ku tene terenu o kasas, e ta bindil, e ta tisiba ki diñeru ke oja, e ditandal dianti di apostolus.

³⁵ E ta rapatil konformi kada kin ten falta.

³⁶ I tenba un omi di jorson di Levi comadu José, ku apostolus da nomi di Barnabé, ku signifika kil ku ta da animu; el i padidu na Ŝipri.

³⁷ I teneba un terenu ki bindi, i tisi diñeru, i pui dianti di apostolus.