Atus 3 - BIBLIA - traduson antigu in Krioulo

Kura di un omi manku

¹ Un dia, na tris ora di tardi, oca ora di orason ciga, Pedru ku Jon na baiba pa kasa di Deus.

² I tenba un omi, disna ki padidu i manku ba. Jinti kustuma ta lebalba kada dia na porta di kasa di Deus ku ta comadu Formosa, pa i pudi ba ta pidi simola na mon di jinti ku ta yentraba la.

³ Oca ki oja Pedru ku Jon na yentra na kasa di Deus, i pidi elis simola.

⁴ Pedru ku Jon finka uju nel; Pedru falal: “Jubi pa nos.”

⁵ Omi yalsa uju pa elis; i kuda kuma e na dal kualker kusa.

⁶ Pedru falal: “N ka tene nin prata nin uru, ma N na dau kil ku N tene. Na nomi di Jesus Kristu di Nazaré, lanta bu yanda.”

⁷ I pegal na mon direita, i judal lanta. Logu forsa yentra na si pe tudu ku uju di pe.

⁸ I jukuta, i firma, i bai i yentra juntu ku elis na kasa di Deus; i na jukuta, i na yanda, i na ngaba Deus.

⁹ Tudu jinti ojal i na yanda, i na ngaba Deus.

¹⁰ E rapara kuma i el ku ta sintaba, i na pidi simola na ki porta di kasa di Deus ku tene nomi di Formosa. E fika ntrumpidu, e dimira ciu pabia di kusa ku kontisi.

Pedru papia ku jinti na kasa di Deus

¹¹ Oca ki omi pega Pedru ku Jon na mon, tudu jinti fika dimiradu, e kuri pa elis na lugar ku comadu baranda di Salomon.

¹² Oca ku Pedru oja elis, i punta: “Omis di Israel, pa ke ku bo na dimira e kusa ku kontisi? Ke ku manda bo na jubinu suma ki no forsa o i no vida puru ku pui e omi yanda?

¹³ Deus di Abraon, Isak ku Jakó, Deus di no papes, i glorifika si servu Jesus, kil ku bo ntrega na otridadi, ku bo nega dianti di Pilatus, oca ku kila mistiba largal.

¹⁴ Bo nega kil ki santu, ki justu; bo pidi Pilatus pa i larga bos ki omi matadur.

¹⁵ Bo mata Dunu di vida, ma Deus lantandal di mortu. Anos no sedu tustumuñas de kusa.

¹⁶ I fe na si nomi ku da forsa pa e omi, ku bo na oja, bo kunsi. I nomi di Jesus, ku fe ku bin pabia del, ku dal e kura kompletu ku abos tudu bo oja.

¹⁷ “Agora ermons, N sibi kuma abos tudu ku bo ŝefis bo fasi e kusa pabia bo ka sibi ke ku bo na fasi.

¹⁸ Ma i asin ku Deus fasi kil ki tarda fala na boka di tudu si anunsiaduris, kuma Kristu ten ku sufri.

¹⁹ Asin, bo ripindi, bo konverti, pa bo pekadu limpadu, pa Siñor da bos tempu di arnobason,

²⁰ pa manda Kristu ki tarda kuji pa bos, ku sedu Jesus.

²¹ Ma i ten ku fika na seu te ora ku tempu ciga ku Deus na arnoba tudu kusa, suma ki fala disna na boka di si santu anunsiaduris.

²² Moisés fala kuma Siñor bo Deus na lantanda un anunsiadur suma el. I na sedu di bo pobu. I el ku bo na obi na tudu ki na fala bos.

²³ Tudu kin ku ka obi e anunsiadur i na tiradu na metadi di pobu.

²⁴ Tudu anunsiadur disna di Samuel, ku tudu kilis ku bin si tras ku palabra di Deus, e konta tambi de dias ku no sta nel.

²⁵ “Abos ku sedu fijus di anunsiaduris. Bo yarda kontratu ku Deus fasi ku bo papes di antigu, oca i fala Abraon: ‘Tudu rasas na mundu na sortiadu pabia di bu jorson.’

²⁶ Deus lantanda si servu, i mandal pa bos purmeru, pa i bensua bos, pa i pui kada un di bos rabida di si mau kamiñu.”