Atus 28 - BIBLIA - traduson antigu in Krioulo

Paulu na Melita

¹ Oca ku no salba ja, no sibi kuma ki jiu ta comadu Melita.

² Jinti di la e tratanu diritu. Suma cuba na cubi, kau staba friu, e sindi fugu garandi, e rukujinu tudu.

³ Paulu junta manga di leña, i bai pui na fugu. Un kobra ku staba na leña i na kuri di kentura, i pega na mon di Paulu.

⁴ Oca ku jinti di ki jiu oja kobra pindradu na si mon, e fala ŋutru: “E omi sertamenti i matadur. I kapli di mar, ma Justisa ka na disal pa i bibu.”

⁵ Paulu sakudi kobra na fugu, i ka sinti nin mal.

⁶ Ki jinti na pera pa ojal i na inca o pa i kai mortu di repenti. E pera tok e ka oja nada sedu; e muda ideia, e fala kuma el i un deus.

⁷ Pertu di ki lugar i staba utru pontas ku pertensiba Públiu, ŝef di jiu, ku risibinu, i gasijanu diritu pa tris dia.

⁸ Pape di Públiu staba na kama duenti ku febri ku panga bariga. Paulu bai visital, i ora, i pui mon riba del, i kural.

⁹ Oca ki fasi es, utru duentis ku staba na jiu e bin pa Paulu, e kuradu.

¹⁰ E kumsa mostranu manga di sinal di rispitu. Oca ku no na mbarka, e lebanu pa barku kusas ku no na pirsisaba del na bias.

Di Melita pa Roma

¹¹ Dipus di tris mis, no sai na un barku di Alesandria ku kababa cuba na jiu, ku tene nomi di deus jemia: Kastor ku Poluŝ.

¹² No ciga na Sirakusa, no fika la tris dia.

¹³ Di la no bai ngostadu ku tera tok no ciga Réjiu. Sol mansi, bentu di sul na supra; no ten dus dia, no ciga na Putéoli,

¹⁴ nunde ku no oja utru ermons. E kumbidanu pa no fika ku elis seti dia. Dipus, no bai pa Roma.

¹⁵ Ermons di la e obiba ja no noba, e bai danu kontrada na Prasa di Apiu, ku lugar ku comadu Tris Taberna. Oca ku Paulu oja elis, i fala Deus obrigadu, i fika animadu.

Na Roma

¹⁶ Oca ku no ciga Roma, kapiton ntrega prezus, ma Paulu dadu lisensa pa i mora na si kasa aparti, ku un soldadu ku na guardal.

¹⁷ Oca i pasa tris dia, Paulu manda coma garandis di judeu. Dipus ke junta, i fala elis: “Ña ermons, N ka fasi nada kontra ña pobu, nin kontra kustumus di no papes, ma N prindidu na Jerusalen, N ntregadu na mon di romanus.

¹⁸ Dipus ke puntan, e misti largan, suma ke ka oja kuma N fasi mal ku mersi mortu,

¹⁹ ma, suma ku judeus ka misti pa N largadu, N oja kuma N dibi di pidi pa bin pa rei garandi, kontudu N ka tene nada pa keŝa kontra ña pobu.

²⁰ E ku manda N kumbida bos, pa N oja bos, pa no papia. I pabia di kusa ku Israel na pera ku manda N sta maradu ku e korenti.”

²¹ E falal: “No ka risibi nin un karta ku bin di Judeia ku fala di bo, nin i ka bin ermons di la ku tisi bu noba, o ku fala kusa mau di bo,

²² ma no misti obi na bu boka ke ku bu na kuda, pabia e seita li, no sibi son kuma, na tudu ladu, jinti ta fala kontra el.”

²³ E marka dia; manga delis bai na ki dia pa kasa di Paulu. Disna di parmaña te di tardi i konta elis, i splika elis kusas di renu di Deus, i buska konvensi elis pa e fia na Jesus. I mostra elis na lei di Moisés ku librus di anunsiaduris.

²⁴ Utrus fia na si palabra, ma utrus nega.

²⁵ E kumsa dispidi, sin ciga na ntindimentu. Antis de bai, Paulu fala elis e palabra: “Bardadi ku Spiritu Santu fala no papes na boka di anunsiadur Isaias:

²⁶ “‘Bai pa e pobu li, bu fala elis: “Ora ku bo obi, bo na sukuta, ma bo ka na ntindi; bo na jubi-jubi, ma bo ka na oja nada.”

²⁷ Korson de pobu bida risu; se oreja kuas surdu; e fica uju. Si i ka asin, e ta oja ku se uju, e ta obi ku se oreja, e ta ntindi na se korson, e ta konverti pa mi, N ta kura elis.’

²⁸ “Asin N misti pa bo sibi kuma e salbason di Deus i mandadu pa jinti di utru rasas. Elis e na obi.” [

²⁹ Oca ki fala asin, judeus sai ku garandi jus na se metadi.]

³⁰ Paulu mora dus anu ntidu na ki kasa ki renda; i ta risibi tudu kilis ku bai visital,

³¹ i ta konta elis palabra di renu di Deus, i ta nsina elis kusas di Siñor Jesus Kristu, ku tudu liberdadi, sin ningin tujil.