Atus 23 - BIBLIA - traduson antigu in Krioulo

¹ Paulu jubi diritu pa Konseliu, i fala: “Ña ermons, te aos N yanda dianti di Deus ku tudu bon konsiensia.”

² Ŝef di saserdotis, Ananias, manda kilis ku staba pertu del pa e dal na boka.

³ Paulu falal: “Deus na kastigau tambi, abo paredi kaiadu! Bu sta li sintadu pa julgan suma ku lei manda, ma kontra lei bu na manda bofotian!”

⁴ Kilis ku staba lungu di Paulu e puntal: “Bu osa koba ŝef di saserdotis di Deus?”

⁵ Paulu fala: “Ermons, N ka sibiba kuma el i ŝef di saserdotis, pabia i sta skritu: ‘Ka bu fala mal di ŝef di bu pobu.’ ”

⁶ Paulu sibi kuma un parti i di grupu di saduseus, utru parti di fariseus. Asin i papia risu na Konseliu, i fala: “Ña ermons, ami i fariseu, fiju di fariseu. N na julgadu pabia di speransa di kuma mortus na lanta.”

⁷ Oca ki fala asin, purfia lanta na metadi di fariseus ku saduseus. Konseliu dividi,

⁸ pabia saduseus fala kuma jinti ka ta lanta di mortu, kuma i ka ten nin anju nin spiritu, ma fariseus fia ne kusas tudu.

⁹ Asin i bin ten garandi baruju. Utru pursoris di lei lanta na parti di fariseus, e na purfia ku tudu forsa, e fala: “No ka oja nin un mal ne omi. Si i spiritu o anju ku fala ku el, ka no geria kontra Deus.”

¹⁰ Jus torna forti dimas, tok kumandanti medi pa ka e sapa-sapa Paulu. I manda coma soldadus pa e bin tiral na se metadi, pa e lebal pa kuartel.

¹¹ Di noti Siñor parsi si dianti, i falal: “Paulu, ten koraẑen pabia, suma ku bu da tustumuñu di mi na Jerusalen, asin ku bu ten ku dal tambi na Roma.”

Planu pa mata Paulu

¹² Oca ku sol mansi, utru judeus junta, e fasi un juramentu, e fala e ka na kume nada, e ka na bibi, tementi e ka mata Paulu.

¹³ E seduba mas di korenta omi ku jurmenta asin.

¹⁴ E bai pa ŝefis di saserdoti ku garandis, e fala elis: “No jurmenta pa kusa mau ojanu si no pui kusa na boka tementi no ka mata Paulu.

¹⁵ Asin, abos ku jinti di Konseliu, bo ta pidi kumandanti pa i tisi bos el amaña, pa i sta suma e na fala kuma e misti puntal e kombersa mas diritu. Anos no sta pruntu pa matal antis di i ciga.”

¹⁶ Fiju di ermon femia di Paulu obi kusa de mboskada ke na yarma. I bai yentra na kuartel, i bai konta Paulu.

¹⁷ Paulu coma un di kapitons, i falal: “Leban e rapas pa kumandanti, pabia i tene un kusa ki na kontal.”

¹⁸ I tomal, i lebal pa kumandanti, i falal: “Paulu, ki prezu, i coman, i pidin pa N tisiu e rapas, pabia i tene un kusa pa kontau.”

¹⁹ Kumandanti pegal na mon, i lebal pa un kantu, i puntal: “Ke ku bu tene pa kontan?”

²⁰ I falal: “Judeus filanta pa pidi pa Ñu manda Paulu pa Konseliu amaña; e na fala kuma e misti puntal e kombersa mas diritu.

²¹ Ka Ñu fia, pabia mas di korenta omi na se metadi yarma mboskada; e jurmenta kuma, kusa mau na oja elis si e kume o e bibi tementi e ka mata Paulu. E sta pruntu, e na pera son pa Ñu seta.”

²² Kumandanti falal: “Ka bu konta ningin kuma bu falan e kusa.” Dipus i dispidi rapas.

Paulu mandadu Sesareia

²³ I coma dus kapiton, i fala elis: “Bo pruntia duzentus soldadu, ku mas setenta di kabalu, ku duzentus lanseru, pa e bai Sesareia aos, novi ora di noti.

²⁴ Bo ranja tambi kabalus ku Paulu pudi monta, pa e lebal ku suguransa te na gubernadur Féliŝ.”

²⁵ Dipus i skirbi un karta ku fala asin:

²⁶ “Klaudiu Lísias pa no garandi gubernadur Féliŝ, N mandau manteña.

²⁷ “Judeus paña e omi li, e staba kuas pa matal, ma N ciga ku tropas, N libral, suma N obi kuma el i romanu.

²⁸ N mistiba sibi ke ku manda e na akusal, N lebal pa se Konseliu.

²⁹ N oja kuma e na akusal son na kusas di se lei, ma i ka fasi nin un krimi ku mersi mortu o kalabus.

³⁰ Agora, N kontadu kuma judeus na yarma mboskada kontra el. N mandal logu pa Ñu. N na fala tambi si akusaduris kuma e pudi bai dianti di Ñu pa e konta ke ke ten kontra el. Adeus.”

³¹ Suma soldadus dadu ordi, e toma Paulu, e lebal di noti pa Antipatris.

³² Sol mansi, utrus riba pa kuartel, e disa kilis di kabalu pa e leba Paulu.

³³ Oca ke ciga Sesareia, e ntrega gubernadur karta, e pursental tambi Paulu.

³⁴ Dipus di gubernadur lei karta, i puntal: “Abo i di kal reẑion?” Oca ki sibi kuma el i di Silísia,

³⁵ i falal: “N na obiu ora ku bu akusaduris bin.” I manda pa e guardal na sedi di palasiu di Erodis.