Atus 22 - BIBLIA - traduson antigu in Krioulo

¹ “Ermons ku papes, bo sukuta ña difesa ku N na fasi bo dianti.”

² Oca e obi i na fala elis na lingua di judeus, e fika ku mas silensiu. El i kontinua, i fala:

³ “Ami i judeu, padidu na Tarsu di Silísia, ma N kriadu ne prasa li. Bas di Gamaliel N nsinadu diritu na tudu puntu di lei di no papes. N sirbi Deus ku tudu mpeñu, suma ku bo ta fasi aos.

⁴ N pirsigi jinti de kamiñu li te na mortu. N prindi elis, omis ku minjeris, N bota elis na kalabus.

⁵ Ŝef di saserdotis ku tudu garandis di Konseliu e pudi konfirma es ku N na fala. N risibi kartas na se mon pa se ermons judeu na Damasku. N na baiba la pa prindi krentis ku staba la, pa tisi elis maradu pa Jerusalen pa e kastigadu.

⁶ “Oca N staba na kamiñu, pertu ja di Damasku, kuas me-dia, di repenti un garandi lus di seu rodian.

⁷ N kai na con, N obi un vos ku na puntan: ‘Saulu, Saulu, ke ku manda bu na pirsigin?’

⁸ N puntal: ‘Abo i kin, Siñor?’ I falan: ‘Ami i Jesus di Nazaré, kil ku bu na pirsigi.’

⁹ Kilis ku staba ku mi na bardadi e oja lus, ma e ka ntindi vos di kil ku na papiaba ku mi.

¹⁰ N puntal: ‘Siñor, ke ku N dibi di fasi?’ Siñor falan: ‘Lanta, bu bai pa Damasku; la bu na kontadu tudu tarbaju ku bu distinadu pa fasi.’

¹¹ Suma ku N ka na ojaba nada pabia di forsa di ki lus, ña kumpañeris pegan na mon, e leban tok N ciga na Damasku.

¹² “Un omi riliẑiosu comadu Ananias, ku ta yanda konformi no lei, ku tudu judeus ku moraba la ta papia ben del,

¹³ i bin nunde mi, i sikidu na ña ladu, i falan: ‘Ermon Saulu, torna oja mas!’ Na ki mesmu ora ña uju yabri, N ojal.

¹⁴ I falan: ‘Deus di no papes jumna i kujiu ja pa bu kunsi si vontadi, pa bu oja ki Algin Justu, pa bu obi fála di si boka,

¹⁵ pabia bu ten ku sedu si tustumuña, pa konta tudu jinti ke ku bu oja, ku ke ku bu obi.

¹⁶ Agora, ke ku bu na pera? Lanta, bu batisa, bu coma nomi di Siñor, pa bu pekadu labadu.’

¹⁷ “Oca N riba pa Jerusalen, N staba na kasa di Deus, N na ora. Ña sintidu bai lunju, N sinti N ka sta na mi.

¹⁸ N oja Siñor, i falan: ‘Fasi dipresa, bu janti, bu sai na Jerusalen, pabia e ka na seta tustumuñu ku bu na da di mi.’

¹⁹ N falal: ‘Siñor, e sibi diritu kuma N ta baiba na kada kasa di juntamentu, N ta suta kilis ku fia na bo, N bota elis na kalabus.

²⁰ Oca ku sangi di bu tustumuña Stevon darmadu, N mati, N kontenti ku si mortu; ropa di kilis ku matal staba na ña mon.’

²¹ Siñor falan: ‘Bai, pabia N na mandau lunju pa jinti ku ka sedu judeu.’ ”

Paulu, sidadon romanu

²² Jinti sukutal tok i ciga ne palabra. E kumsa na grita, e fala: “Mata e omi! Algin suma el i ka mersi sta na mundu!”

²³ E na grita, e na ferca kapas, e na manda reia pa riba.

²⁴ Kumandanti da ordi pa e leba Paulu dentru di kuartel, i manda pa e puntal, e sutal tok i konta ke ku manda jinti na grita asin kontra el.

²⁵ Oca e na maral ku korda, Paulu punta kapiton ku staba la: “Nta i ka kontra lei pa bo suta sidadon di Roma sin i ka ojadu kulpadu?”

²⁶ Oca ku kapiton obi ki palabra, i bai konta kumandanti, i falal: “Jubi ke ku bu na bai fasi, pabia ki omi i romanu.”

²⁷ Kumandanti bai pa Paulu, i puntal: “Kontan de, abo i romanu?” Paulu ruspundil: “Sin, Siñor.”

²⁸ Kumandanti falal: “N paga garandi pres na diñeru pa N pudi ten e diritu di sidadon.” Paulu falal: “Ma ami N padidu janan sidadon.”

²⁹ Ki ora kilis ku staba pa fasil purgunta e rakua kinti-kinti. Te kumandanti, oca ki sibi kuma Paulu i romanu, i panta, suma ki mandaba maral.

Paulu dianti di Konseliu

³⁰ Sol mansi. Kumandanti misti sibi sertu ke ku judeus na akusa Paulu del; i tiral korenti, i manda pa ŝefis di saserdoti junta ku tudu Konseliu, i leba Paulu, i pul sikidu se dianti.