Atus 21 - BIBLIA - traduson antigu in Krioulo

Paulu na kamiñu di Jerusalen

¹ Dipus di no dispidi elis, no mbarka, no bai diritu tok no ciga Kos. Sol mansi, no ciga Rodis. Di la no pasa pa Pátara.

² No oja un barku ku na bai pa Fenísia. No mbarka nel, no larga.

³ Oca ku no na oja Ŝipri, no disal pa skerda, no pasa pa Siria, no ciga na Tiru, nunde ku barku ten ku diskarga.

⁴ No oja la utru krentis, no tarda la seti dia. Na puder di Spiritu e fala Paulu pa ka i bai Jerusalen.

⁵ Oca ku no pasa ki dias la, no sai, no kontinua no bias. Elis tudu ku minjeris ku se fijus e kumpañanu te fora di prasa. No finka juju na praia, no ora.

⁶ No dispidi ŋutru, no mbarka; elis e riba pa kasa.

⁷ No kontinua no bias di Tiru, no ciga Tolemaida. No fala ermons manteña, no pasa un dia ku elis.

⁸ Sol mansi, no sai di la, no ciga Sesareia. No bai fika na kasa di Filip, ivanjelista, ku seduba un di ki seti ku kujidu na Jerusalen.

⁹ I teneba kuatru fiju bajuda ku ta anunsia rekadu di Deus.

¹⁰ Dipus ku no ten dias la, i ciga di Judeia un anunsiadur di nomi Ágabu.

¹¹ I bin nunde nos, i toma sintu di Paulu, i mara si propi pe ku mon, i fala: “Spiritu Santu fala kuma, asin ku judeus la na Jerusalen na mara omi ku tene e sintu, e na ntregal na mon di jintius.”

¹² Oca ku no obi e kusa, anos ku jinti di la, no pidil ciu pa ka i bai Jerusalen,

¹³ ma Paulu ruspundi: “Ke ku bo na fasi? Bo na cora pa pui ña korson fiks tristi. Ami N sta pruntu, i ka son pa maradu, ma N sta pruntu te pa muri na Jerusalen pabia di nomi di Siñor Jesus.”

¹⁴ Suma ku no ka pudi mainal si bias, no disa, no fala: “I ta sedu ke ku Siñor misti.”

¹⁵ Dipus di ki dias, no ruma bias, no bai pa Jerusalen.

¹⁶ Utru krentis di Sesareia kumpañanu; e lebanu pa kasa di un omi di Ŝipri ku comadu Mnason, krenti antigu. La ku no bai gasija.

Paulu visita Tiagu

¹⁷ Oca no ciga na Jerusalen, ermons risibinu ku alegria.

¹⁸ Sol mansi, no bai ku Paulu pa visita Tiagu. Tudu garandis di igreẑa staba la.

¹⁹ Oca Paulu fala elis manteña, i konta elis, un pa un, kusas ku Deus fasi na metadi di jintius pabia di si tarbaju.

²⁰ Oca e obi ki noba, e ngaba Deus. E fala Paulu: “Ermon, bu oja kantu milyaris di judeu ku sedu ja krentis. Elis tudu e forti na lei.

²¹ Jinti konta elis kuma bu ta nsina judeus ku mora na metadi di jintius pa e bandona lei di Moisés; bu ta fala elis pa ka e sirkunsida se fijus, nin pa ka e fasi kustumus di lei.

²² Ke ku no na fasi gora? I sertu kuma e na sibi kuma bu bin.

²³ Fasi suma ku no na falau. No tene kuatru omi ku fasiba Deus purmesa.

²⁴ Leba elis, bu bai fasi sirmonia di purifikason juntu ku elis. Bu ta paga dispesa pa elis pa e pudi rapa kabesa. Tudu elis e ta sibi kuma ki kusas ke kontadu di bo i ka bardadi, ma abo tambi bu ta obdisi lei.

²⁵ Di ki jintius ku bida krentis, no skirbi ja pa konta elis ke ku no oja, kuma e ka dibi di kume karni ku roniadu na iran, nin sangi, nin karni di limaria ku tursidu garganti, nin e ka dibi di fasi pekadu seksual.”

²⁶ Asin Paulu leba ki omis. Sol mansi, i fasi sirmonia di purifikason ku elis, i yentra na kasa di Deus pa konta dia ke na kaba tempu di purifikason, oferta ta fasidu pa kada un delis.

Paulu prindidu

²⁷ Oca ku seti dia di purifikason sta kuas pa kaba, judeus di Asia e oja Paulu na kasa di Deus, e turmenta tudu pobu, e paña Paulu,

²⁸ e na grita: “Omis di Israel, bo bin judanu! Es i ki omi ku na yanda pa tudu ladu, i na nsina tudu jinti kontra no pobu, kontra lei, kontra e lugar. Kaba, i yentranda gregus na kasa di Deus, i manca e lugar sagradu.”

²⁹ E fala asin pabia e ojalba na prasa juntu ku Trófimu di Éfesu, e kuda kuma Paulu yentrandal na kasa di Deus.

³⁰ Tudu prasa turmenta. Jinti kuri di tudu ladu, e paña Paulu, e rastal fora di kasa di Deus. Logu porta fica.

³¹ E na buskaba matal. Noba ciga na kumandanti di tropas kuma Jerusalen staba tudu na kunfuson.

³² Na ki ora i junta soldadus ku kapitons, i kuri pa elis. Oca ke oja kumandanti ku soldadus, e para suta Paulu.

³³ Kumandanti ciga, i prindil, i manda maral ku dus korenti, i punta: “Es omi i kin? Ke ki fasi?”

³⁴ Na ki multidon, un na fala di un manera, utru na fala di utru manera. Suma ki ka pudi sibi bardadi pabia di baruju, i manda lebal pa kuartel.

³⁵ Oca e ciga na skada, soldadus tenba ku lambul pabia multidon di jinti na pincaba ku forsa

³⁶ pa e pudi pañal; e na grita: “Matal!”

Difesa di Paulu

³⁷ Oca ke staba pa yentrandal na kuartel, Paulu pidi kumandanti, i falal: “Ñu pudi dan lisensa pa N papia ku Ñu?” Kumandanti puntal: “A! Bu obi gregu?

³⁸ Nta abo i ka ki omi di Ejitu ku, e dias li, i lanta kontra gubernu, i leba kuatru mil terorista pa lala?”

³⁹ Paulu falal: “Na bardadi, ami i judeu, sidadon di Tarsu, un prasa importanti na Silísia. N misti pidi si Ñu ta disan papia ku pobu.”

⁴⁰ Oca i dadu lisensa, Paulu sikidu na skada, i fasi sinal ku mon pa pobu. Dipus de kala, i papia ku elis na lingua di judeus, i fala: